LOUTAO 119 - SHEEYU BAIBEL (BSI)

Mapao Vei Chikha

¹ Mahmo lia soupfü moa Mapao vei chikha hinou hrüa laiyu maitao hai savayu maitaore.

² Puhvei kharochi khesü züa laiyu maitao, ae puletao vei tsüle veishi nou peia puh chi züyu maitao hai vasayu maitao-e.

³ Puletao hai kaomoyu vah haso ali-a soumoe; puletao nou Mapao vei ludu hinou ta-a baiwe.

⁴ Mapao, nenou Etaoye nevei chikha khesü peie, ae sütao hai soutao soua zülo tea nenou Etao hi paopeie.

⁵ Nenou paodou peikhai touyu khesü züloure donou Eye panou soutaosoua latou toulo.

⁶ Enou nevei chikha khesü soutaosoua reitou tea nou züa bulouyu thaio, Eye panou hraongu daokhailai moe.

⁷ Nenou acheche hinou chikude peiyu khesü Enou sülouyu thaio, avei tsüle sheesha tea nou neye paosholai.

⁸ Enou nevei chikha khesü zülai, Eye thaokhai peiso!

Mapao vei Chikha Züyu

⁹ Nahlemai alinou kabüa puhvei hrümamai sü sheesha tea hrülou laige? Nevei chikha khesü züa bulouzü puhvei hrümamai hai sheesha tea hrülou süe.

¹⁰ Avei hrümai veishi nou peia nevei kuvah soure donou E te-a nou bue; Eye panou nevei chikhatao hinou tacho tarei taso.

¹¹ Nevei nghingao hinou mahmo soumore donou Enou nevei chikha khesü avei tsüle hi thoukhai toue.

¹² Oh Mapaowo, Enou neye paoshowe; nevei ludu khesü Eye paodou peio.

¹³ Nenou peikhai touyu chikha khesü Enou pai chishoa nou phoukhai phoukhai-a bue.

¹⁴ Kini taoli buyu jüolouzü nevei chikhatao züa buyu nanou E jüpapue.

¹⁵ Nenou paodou peikhai touyu khesü Enou licho-a nou bue; nenou doupei khesü soutaosoua Enou zhu-a nou bue.

¹⁶ Nevei chikhatao hinou E sava-a nou hrülai; nenou peikhai touyu kharochi khesü Enou ngaikhailai moe.

Mapao vei Chikha hinou Vasayu

¹⁷ Nevei kilai Eye panou nevei chipao khesü züa buloure donou ahi veisho peio.

¹⁸ Khupasoua checheyu nevei chikhatao hai Eye panou ngaoloure donou anghithou souhepa peio.

¹⁹ E hai deiphao hai hi teile jütou likhai bua bailai, südonou nevei chikha khesü ahinou poku peiso.

²⁰ Nenou chikude peiyu khesü teisa nou sülou nüsho-a buyu donou ale sü buthoulou hore.

²¹ Puhnou khaophu souyu maiye sü tudee peiwe, nevei kharochi züba-a tayu maiye sü chaa peie.

²² Puletao nou Eye ngaonghia hraongu soupeiyu hinou Eye popa peio, daiolouzü Enou nevei chikha khesü züa bue.

²³ Nuh teidei khasa-a buyu maitao nou vejüloua Eye soushire donou bure, ana Enou nevei doupei khesü licho-a bu bailai.

²⁴ Nevei paodou peiyu taonou Eye sousava peiwe, sütao nou Eye süthaisa-a tapeie.

Mapao vei Chikha Zülai tea Lela Louyu

²⁵ Ewo veilou hoa deiphi hi kaokou dazütare; nenou apaokhai touyu thaifüa Eye souvei souhripu peio.

²⁶ Enou soupü khaitouyu mahmo khesü paopayu thai, nenou avei akho khesü kei peie; nevei ludu khesü Eye paodou peio.

²⁷ Nevei chikha khesü Eye panou süloure donou soukha peio, ae Enou nevei khupayu vah haso khesü licho-a bulai.

²⁸ Ewo veahoyu khaikho dao-a bu baire; nenou apaokhai touyu thaifüa Eye soukhou soutsü peio.

²⁹ Eye panou kaomoyu ludu hilo taso, ae nevei aveih sünou Eye nevei chikha khesü paodou peio.

³⁰ Paoyu chi zülai tea Enou doloure; nenou chikude peikhai touyu khesü Enou poa anghoujü hi khailoure.

³¹ Oh Mapaowo, nenou paodou peikhai touyu khesü Enou thaifü loure; südonou Eye panou hraongu daoso.

³² Enou nevei kharochi khesü soutaosoua nou züloulai, daiolouzü sütao nou Eye tsü veipuyu nasü peilai.

Tsüvei Loure donou Veachi Paoyu

³³ Oh Mapaowo, nevei chikha khesü daivanou peikhai toue touyu süloure donou Eye paodou peio ae Enou sütao hai teisa nou züa bulai.

³⁴ Nevei chikha khesü ahi paongao peio, Enou sütao sü zülai; Enou sütao hai avei hrümai veishi nou peia pokhai loulai.

³⁵ Nevei chikhatao hai Eye panou zülo, daiolouzü sütao hinou savayu nasü Enou ngaoloue.

³⁶ Eye panou toungiyu jü-o nevei chikhatao züa hrüyu naye pa jüpa pulo.

³⁷ Eye panou komoyu nali hi avei tsüle hai peiso, nenou apaokhai touyu thaifüa ahi veisho-a bupeio.

³⁸ Neye tsükhoua ne chi züa buyu mai hi nenou paokhai peiyu nasü nevei kilai, ahi-a paohkhai peio.

³⁹ Enou ngaopi-a buyutao hinou Eye khailupa peio; nevei chidei khesü daizhou koute khupasa!

⁴⁰ Enou nevei chikha khesü züyu jüpawe, nevei checheyu nasü Eye tsü ashu thoupeio.

Mapao vei Chikha Loucheyu

⁴¹ Mapao nenou Eye daizhou koute leshiwe touyu nasü ngaopeio, ae nenou paopeikhai touyu thaifüa Eye khailupa peio.

⁴² Süthaisü Eye paoshi-a buyu maitao hi Enou chila peilai, daiolouzü Enou nevei chipao sü louchewe.

⁴³ Teisa panou acheche chi paoloure donou Eye soukha peio, daiolouzü avei areih hai nevei chipao hinou bua baie.

⁴⁴ Enou teisa nou nevei chikha züa bukoute-a bailai.

⁴⁵ Enou lahdo soua hrüa bulai, daiolouzü nenou paodou peikhai touyu khesü Enou züre donou te-a bue.

⁴⁶ Enou nevei chikha khesü veo maitao hi paongao peilai, ae E hraokhai toulai moe.

⁴⁷ Nevei chikhatao züa buyu hinou E savayu sü ngaowe, daiolouzü Enou sütao hai leshi-e.

⁴⁸ Enou nevei chikha khesü tsükhouwe ae leshi-e, nenou paodou peikhai touyutao hai Enou teisa licho-a bulai.

Mapao vei Chikha Lüloucheyu

⁴⁹ Mapao kilai ahi nenou paopeikhai touyu nasü licho peio, sünasü vuzhi poa nou Esü bua baie.

⁵⁰ E veaho sho-a nou buyu phaki-a sava-a nou Ewo bubaie, daiolouzü nenou apaokhai touyu nasü nou Eye ahri sü peie.

⁵¹ Khaophu souyu maitao nou Eye sü teisa nou jünüa lai-a baiwe; ana Enou nevei chikha hinou tala takhai toulai moe.

⁵² Nenou raichoki chidei peiyu khesü Enou ngaikhai toumoa taipoa nou buwe, ae sütao nou ahi vasayu nasü pove peie, Oh Mapaowo.

⁵³ Mai ashi maitao nou nevei chikha pfüthoyu ngaolou khaie, ale sü rarouyu nou phoutao-a bua baiwe.

⁵⁴ Jüshoyu avei deiphao hrütou hinou Enou nevei chikha khesü lou hi dathou peie.

⁵⁵ Mapao, Enou neye khei teile hi licho-a bue, ae nevei chikha nasü tsücho-a nou buwe.

⁵⁶ Nevei chikhatao züa buyu donou E savayu sü ngaowe.

Mapao vei Chikha Licho-a buyu

⁵⁷ Oh Mapaowo, Enou jüpayu hai neye likhei baie, Enou nevei chikha khesü zülai tea paochewure.

⁵⁸ Nenou apaokhai touyu thaifüa Eye zhuvea peio tea avei tsüle veishi nou peia ne hinou khowe.

⁵⁹ Enou nevei jüpa hinou hrüwe, ae nenou paodou peiyu khesü Enou fülai tea paochewure.

⁶⁰ Enou puhvei chikha khesü züa soupfüre donou ponakhai toumoa thaso-a nou soupeie.

⁶¹ Mai ashi maitao nou Eye shorü southou peie, ana Enou nevei chikha khesü ngaikhai timoe.

⁶² Nenou acheche hinou soupfü peikhai touyu vah haso khesü Enou khei toutsü hinou kushuloua neye paoshowe.

⁶³ Nevei kuvah soua buyu maitao ae nevei chikha züa buyu mai hrülai hai avei samai-e.

⁶⁴ Mapao, deiphao hi hai nevei tobai soumoa leshi peiyu nasü nou phoutao-a bure, nevei chikha khesü Eye doupeio.

Mapao vei Chikha hai Muh Teisho-e

⁶⁵ Oh Mapaowo, nenou apaokhai touyu thaifüa ne kilai Eye veishoa nou zhuvea leshi peie.

⁶⁶ Eye ratsü ae tsüdo aveih nasü peio, daiolouzü Enou nevei chikhesü louchewe.

⁶⁷ Nenou Eye tudee peimo jü hai, Enou kaomoyu hilonou ta-a nou bue, ana chuo Enou ne chi sü züloure.

⁶⁸ Ne hai daizhou koute vei-e ae zhuvea sühshoe? Nevei chikha khesü Eye paodou peio.

⁶⁹ Khaophu souyu maitao nou Eye dahrührüa paopeie, ana avei tsüle teitei nou peia Enou nevei paodou peiyu khesü züloue.

⁷⁰ Mai haitao hai sükulou süyu sü ha-e, ana Ewo louzü nevei chikha hinou vasayu sü ngaoloue.

⁷¹ Eye tudee peiyu hai Eye donou vei-a baie, daiolouzü sütao hinou Eye panou nevei chikha khesü douloue.

⁷² Deiphao hi buyu thoudzü teitei jünou nenou Eye peikhai touyu chikhatao nou muteipu hie.

Mapao vei Chikhatao hai Kaozüe

⁷³ Nenou Eye soupeie, ae Eye panou kaozhou vei-a hrüloue; ahi tsüdo aveih nasü peio, sükulouzü Enou nevei chikha khesü douloulai.

⁷⁴ Neye tsükhoua buyu maitao nou Eye ngaolouyu phaki puletao hai asalai, daiolouzü Enou nevei paopeikhai touyu khesü louchewe.

⁷⁵ Mapao, nenou chiku peiyu hai chechewe touyu Enou süwe, ae nehai chilee checheyu donou Eye tudee peia baie.

⁷⁶ Nenou paokhai touyu thaifüa nevei kilai Eye nevei tobai soumoa leshi peiyu nasü nou sousava peio.

⁷⁷ Eye zhuvea leshi peio, sükua Eye panou hrüa bulo; daiolouzü Enou nevei chikha hinou vasa-a buwe.

⁷⁸ Khaophu souyu maitao panou hrao ngaotheo, daiolouzü puletao nou dakhokhoa nou Eye mah paoka peiwe; Ewo louzü nenou paodou peikhai touyu khesü licho-a nou bua bailai.

⁷⁹ Neye tsükhoua buyu maitao ae nevei chikhatao züa buyu maitaoye sü panou ahi velo.

⁸⁰ Eye panou nevei chikha khesü soutaosoua zütou toulo, sübüa Eye panou hraongu nasü ngaoso.

Khailupa Peio tea Veachi Paoyu

⁸¹ Oh Mapaowo, Ewo nevei khailupa peiyu nasü vukho-a buyu donou veaho chekhore; Enou nevei chipao khesü louche-a vuzhia bue.

⁸² Nenou apaokhai peiyu khesü vuzhia buyu donou anghithou hai veare; Enou chi noue, “Ne dukinou Eye sousava peilai?”

⁸³ Daiolouzü komoa nou laikhai touyu lekhabvü ali büa Ewo bua baire; ana Enou nevei chikha khesü ngaikhai toumoe.

⁸⁴ Eye panou teile kasho kho-a nou bukoulai hige? Eye souvea-a laiyu maitaoye nenou daisouyu teile hinou tudee peilai?

⁸⁵ Khaophu souyu maitao, nevei chikha zümoa buyu maitao nou Eye panou deloure donou deibvü rao-a bure.

⁸⁶ Nevei chikha teitei sü veichekho toua baie; maikhe mainou da-a nou Eye souvea-a bure, Eye soukha peio.

⁸⁷ Puletao nou Eye sü southa nore, ana Enou nevei chikha khesü ngaophou moyu sü soumoe.

⁸⁸ Nevei tobai soumoa leshiyu nou avei hrirai sü khailupa peio, sükulouzü Enou nevei chikha khesü züa bulai.

Mapao vei Chikha Lüloucheyu

⁸⁹ Oh Mapaowo, nevei chipao hai teisa nou akhai ha-a bukou telai, haina sü raki vanou teisa sü bulai.

⁹⁰ Nevei chilee checheyu nasü vere khaphao veishi hia bukou telai, nenou deiphao sü soupeie, ae hainasü sübüa bukoulai.

⁹¹ Nenou kharochi peikhai touyu thaifüa na veishi hai zhou teithe hi koute sübüa buwe, daiolouzü sütao teitei hai nevei kilai baie.

⁹² Nevei chikha sünou Eye sousava peimoyu thaio, E sounou soua veahoa buyu hinou thaita laire.

⁹³ Nenou paodou peiyu khesü Enou ngaophou moyu sü soukhai toumoe, daiolouzü sütao vanou E hria bubaie.

⁹⁴ E hai nevei baie— Eye khailupa peio! Enou nevei chikha khesü züre donou te-a nou bue.

⁹⁵ Mai ashi maitao nou Eye southare donou da-a nou bue, ana Enou nevei chikha khesü licho-a bulai.

⁹⁶ Na veishi hai akhai bue touyu sü Enou süloure; ana nevei chikhatao hai lichekho toua bubaie.

Mapao vei Chikha Leshiyu

⁹⁷ Nevei chikha hai Enou daizhou koute leshi-e! Enou sütao hai teile busasü licho-a bue.

⁹⁸ Nevei chikha hai ahinou teisa bua baiwe, ae süna nou Eye ngaobayu maitao jünou avei tsü sü souveipu peie.

⁹⁹ Eye dou-apei mai hrülai jünou E-a tsüdo veipue, daiolouzü Enou nevei paodou peiyu khesü licho-a nou bua baiwe.

¹⁰⁰ Tsümai jünou Enou ratsü sü süpu hie, daiolouzü Enou nevei chikha khesü züwe.

¹⁰¹ Veimoyu zhaidou veishi sü Enou thaokhaiwure, daiolouzü Enou nevei chipao khesü züyu hai jüpa-e.

¹⁰² Enou nevei paodou–apei khesü ngaophou moyu sü soumoe, daiolouzü ne hai Eye dou-apeio nasüe.

¹⁰³ Nevei chipao khesü daizhou koute jühsa, sütao hai laivoudzü jünou jühpu hie.

¹⁰⁴ Nevei chikhatao hinou E ratsü sü ngaoloue, südonou hrümamai ashi nasü Enou ngaora-e.

Mapao vei Chikha hi Ava

¹⁰⁵ Mapao chipao hai avei meivabvüe ae aludu hi ava nasüe.

¹⁰⁶ Nevei checheyu kharochi khesü Enou zülai tea chaachou souchewure.

¹⁰⁷ Oh Mapaowo, E hai haohao soumoa veaho shore, nenou apaokhai touyu thaifüa Eye panou hria bulo.

¹⁰⁸ Oh Mapaowo, Enou kalo pao-a veachi paoyu sü popeio, ae nevei chikha khesü Eye paodou peio.

¹⁰⁹ Kaozhou ashi daore khesü Enou ngaopi moe; Enou nevei chikha khesü ngaikhai timoe.

¹¹⁰ Mai ashi mainou Eye shorü southou peie, ana Enou nevei chikha khesü zübayu sü soumoe.

¹¹¹ Nevei chikhatao hai teisa nou avei kaalo soure nasüe, sütao vanou E lesa-a bue.

¹¹² E thaitamo koute nevei chikha khesü zülai tea lela chewure.

Mapao vei Chikha hinou Kaozhou Aveih

¹¹³ Tsüle ahaisü souyu maiye Enou ngaora-e, ana Ewo louzü nevei chikha nasü leshi-e.

¹¹⁴ Ne hai Eye vupa-apeio nasüe; avei areih hai nevei apaokhai touyu hisü bue.

¹¹⁵ Mahmo souyu maitao, ahinou tavai talo. Ewo louzü Ramai vei chikha khesü züa bu bailai.

¹¹⁶ Nenou paokhai touyu thaifüa Eye pfüchi sü peio, sükulouzü E hria bulai, avei areih khesü panou vete moyu sü soupeiso!

¹¹⁷ Eye panou kaozhou vei-a hrüloure donou Eye moupeio, ae Enou nevei chikha khesü teisa nou lenoua soupü peilai.

¹¹⁸ Nevei chikhatao zü moyu mai hrülaiye sü nenou malai khaiwure, puletao vei tsüdo ashi khesü hamako baie.

¹¹⁹ Mai ashi mai hrülaiye sü nenou nghoushi laikhai touyu büa powe, südonou Enou nevei doupei khesü jüpa-e.

¹²⁰ Enou neye sü ngaopi-e; nenou chikude peiyu khesü Enou ngaopie.

Mapao vei Chikha Züyu

¹²¹ Enou kaozüyu ae veiyu nasü souwe; Eye ngaobayu mai bah hi thoupeiso!

¹²² Nevei kilai Eye soukha peilai tea paohpeio, zhaipou shiyu maiye panou Eye souvea peiso!

¹²³ Nevei khailupa peiyu nasü vuzhia buyu donou Ewo veare, ae nevei checheyu hinou apaokhai peiyu khesü dukinou vepalaisa tea kholou hosoua bure.

¹²⁴ Nevei tobai soumoa leshiyu hinou Eye zhupeio, ae nevei chikhatao sü Eye doupeio.

¹²⁵ E hai nevei kilai baie, Eye tsüveiyu nasü peio, sükulouzü nevei dou-apei khesü Enou süloulai.

¹²⁶ Mapao, vah soure teile sü chude, daiolouzü maikhe mainou nevei chikha khesü zübare.

¹²⁷ Enou nevei chikha hai sana jünou leshipu hie, veikayu sana jünou jüpapu hie.

¹²⁸ Südonou nevei dou-apei teitei sü Enou thaifüwe, kaomoyu vah veishi sü Enou ngaorae.

Mapao vei Chikha Jüpashoa Zhiyu

¹²⁹ Nevei dou-apeitao hai daizhou koute khupasa; Enou sütao hai avei tsüle veishi nou peia züwe.

¹³⁰ Nevei chipaotao hai soutaosoua hupakhaie ava nasü peiwe, ae tsüvei moa buyu maiye tsüsüyu peie.

¹³¹ Nevei chikha khesü Enou jüpa shopoa nou amü hepaloua ssü paodou doupoa bue.

¹³² Nenou neye leshi-a buyu mai hi soupeiyu büa ahi dakhai vepeio ae Eye zhuvea peio.

¹³³ Nenou apaokhai touyu thaifüa Eye panou kaodu taso, ashi naye panou ajünou veilouyu sü soupeiso.

¹³⁴ Eye souvea buyu maitao hinou Eye khailupa peio, sükulouzü Enou nevei chikhatao sü züa buloulai.

¹³⁵ Nenou Eye kozho-a bupeiyu nasü nou Eye ha peio, ae nevei chikha nasü Eye doupeio.

¹³⁶ Maikhe mainou nevei chikha khesü sümoyu donou reidzü küyu büa anghidzü sü kükoua bure.

Mapao vei Chikha hi Kaozüyu

¹³⁷ Oh Mapaowo, checheyu nasü ne-e, ae nevei chikhatao hai kao-e.

¹³⁸ Nenou chikha peikhai touyu teitei hai veikhai toubaie ae zükhai toua baie.

¹³⁹ Eye ngaobayu maitao nou nevei chikha khesü ngaophou moyu donou, mei tao-a buyu büa Ewo lekha sho-a bubaire.

¹⁴⁰ Nenou apaokhai touyu khesü vete vuzüa baiwe! Enou sütao hai leshi-e!

¹⁴¹ Ewo mainou komoyu ae zhojüyu mai ali baie, ana Enou nevei chikha khesü ngaophou moyu soumoe.

¹⁴² Nevei acheche nasü akhai bulai moe, ae nevei chikha khesü teisa nou cheche-a bulai.

¹⁴³ Ewo veahoyu ae leveayu nou phoukha nou bua baie, ana nevei chikhatao nou Eye savayu nasü pove peie.

¹⁴⁴ Nenou paodou peiyu khesü teisa nou vei-a baiwe, Eye tsüveiyu nasü peio, sükulouzü E hria buloulai.

Vupa peio tea Veachi Paoyu

¹⁴⁵ Avei tsüle teitei nou peia Enou neye kuwe; Eye chila peio, Mapao, ae Enou nevei chikha khesü zülai.

¹⁴⁶ Enou neye kua nou bue; Eye khailupa peio, ae Enou nevei chikha khesü züa bulai.

¹⁴⁷ Shona teinghei pamo jünou Enou nevei soukha peiyu nasü kho-e; nenou apaokhai touyu khesü Enou vureih-a nou bue.

¹⁴⁸ Nenou paodou peiyu khesü Enou khei mathe zhaihea nou licho-a bue.

¹⁴⁹ Oh Mapaowo, nevei tobai soumoa leshiyu nanou avei paila sü kei peio; nevei zhuveayu nasü Eye ngaopeio, ae avei hrütou hai kiko peio.

¹⁵⁰ Zhaipou shishoa Eye souveayu maitao nou ahi nghitei poa koure, puletao hai nevei chikha khesü zü moe.

¹⁵¹ Ana nenou Eye nghitei tea bue, Oh Mapaowo, ae nevei chikha khesü teisa nou cheche-a bulai.

¹⁵² Nenou paodou peiyu khesü Enou raichoki nou süloure; teisa panou bure donou nenou sütao hai soukhai peiwure.

Soukha Khoyu

¹⁵³ Enou sounou soua buyu sü zhupeio, ae Eye khailupa peio, daiolouzü Enou nevei chikha khesü ngaophou moyu soumoe.

¹⁵⁴ Avei zü nasü vu peio, ae Eye panou lahdo soulo, nenou apaokhai touyu thaifüa Eye khailupa peio.

¹⁵⁵ Mai ashi maitao hai khailu louyu sü ngaolai moe, daiolouzü puletao nou nevei chikha khesü zü moe.

¹⁵⁶ Ana Mapao, nevei leshi zhuveayu hai dusho-e; nevei zhuvea peiyu nasü Eye ngaopeio ae Eye khailupa peio!

¹⁵⁷ Eye ngaobayu mai ae souvea peiyu mai hai alaosou nou bue, ana Enou nevei chikha khesü zü moyu sü soumoe.

¹⁵⁸ Enou shodo ashi souyu maitaoye ngaolouyu phaki, ale hai rarouyu nou phoutao-a baiwe, daiolouzü puletao nou nevei chikha khesü züpei moe.

¹⁵⁹ Mapao, Enou nevei paodou-apei khesü daizhou koute leshiwe touyu sü zhukhaio. Nevei leshiyu hai dakhai toumoe, südonou Eye khailupa peio.

¹⁶⁰ Nevei chikha hai checheyu nasüe, ae nenou cheche hinou chikude peiyu teitei sü teisa nou bu bailai.

Mapao vei Chikha hi Hrümai Peithouyu

¹⁶¹ Khouko buyu maitao nou zü ali-a ha-a nou Eye souvea peie, ana Enou nevei chikha sü tsükhou peie.

¹⁶² Mai alinou nangi alao ngaolouyu phaki lesa shoyu büa Ewo nevei apaokhai touyutao hinou sava shoa nou bue.

¹⁶³ Enou dayu hai ngaora-e ae jüpa moe, ana nevei chikha hai Enou leshi-e.

¹⁶⁴ Nenou checheyu hinou chiku peiyu donou Enou teithe ali hinou bakha anai hai neye paoshowe.

¹⁶⁵ Nevei chikha leshiyu mai hai kaonayu sü bue; hatara linoua puletaoye sü soushi louhoe.

¹⁶⁶ Mapaowo, Enou nevei khailupa peiyu nasü vureih-a nou bue, ae nenou chikha peikhai touyu nasü Enou soupfüwe.

¹⁶⁷ Nevei chipao khesü Enou züwe; Enou sütao hai avei tsüle teitei nou peia leshi-e.

¹⁶⁸ Enou nevei chikhatao ae paodou peiyu khesü züwe, Enou soupfüyu veishi sü nenou ngaowe.

Soukha Khoyu Veachi

¹⁶⁹ Oh Mapaowo, Enou kra-a soukha khoyu nasü panou ne hi khetelo! Nenou apaokhai touyu thaifüa Eye tsüvei nasü peio.

¹⁷⁰ Enou veachi paoyu sü kei peio, ae nenou apaokhai touyu thaifüa Eye khailu peio!

¹⁷¹ Nenou Eye nevei chikha khesü doupeiyu donou Enou neye teisa nou paosholai.

¹⁷² Nevei kharochitao hai checheyu thaifüa Enou nevei chikha nasü lou nou sousholai.

¹⁷³ Enou nevei chikha khesü züa buyu donou Eye soukha peire donou teisa nou souda-a bupeio.

¹⁷⁴ Oh Mapaowo, nevei khailupa peiyu nasü Enou kholou hosoua nou bure! Nevei chikhatao hinou E savayu sü ngaoloue.

¹⁷⁵ Eye ahri nasü peio, sükoulouzü Enou neye paosholai, nevei paodou peiyu nasü nou Eye soukha peio.

¹⁷⁶ Ewo hakhai touyu zhaotu ali büa moa laire; südonou nevei kilai Eye tave zhupeio, daiolouzü Enou nevei chikha khesü ngaophou moyu sü soumoe.