LOUTAO 115 - SHEEYU BAIBEL (BSI)

Checheyu Ramai hai Ali Baie.

¹ Oh Mapaowo, nevei tobai soumoa leshi peiyu donou, ae nevei chilee checheyu donou nevei zhih aveih nasü paosholai, Etao hi paolai moe, neye likhei kathe aveih nasü pao-a bailai.

² Daisounou tyahrü kukhe maitaoye panou, “Neletao vei Ramai sü daiki nou bue?” tea noulai?

³ Etao Ramai hai raki vanou bue; puhnou jüpayu nasü souloua baiwe.

⁴ Puletao vei rahtao hai shahu ae sana nou souloua baie, ae deiphao mai bah nou souloua baie.

⁵ Puletao hai mü louzü bue, ana raolou hoe, nghithou pfüwe, ana ngaolou moe.

⁶ Puletao hai noubei bue, ana choulou moe, nghou bue, ana kaingi chamoe.

⁷ Puletao hai bah bue, ana deiyu sümoe, phi bue, ana talou chamoe, puletao hai kho ali-a soupa louhoe.

⁸ Puletaoye soupeiyu maitao ae puletaoye loucheyu maitaoye sü panou basharatao bütou peie.

⁹ Israel maitaore, Mapao ye louchelo. Puhnou neletaoye sü soukha peie ae neletaoye vupa peie.

¹⁰ Ramai vei napao maitaore, Mapao ye louchelo. Puhnou neletaoye soukha peie ae vupa peie.

¹¹ Puhye thoyu mai hrülai, Mapao ye louchelo. Puhnou neletaoye soukha peiwe ae neletaoye vupa peie.

¹² Mapao nou Etaoye licho peilai ae Etaoye shiha peilai, puhnou Israel maitaoye ae Ramai vei napao maitaoye ha peilai.

¹³ Puhnou puhye tsükhouyu mai hrülai, taidu souku moa nou ha peilai.

¹⁴ Mapao ye panou neye ae nevei nahmaitaoye tou-dzü alao peiyu sü soulou theo.

¹⁵ Raki ae deiphao soupeiyu Mapao ye sü panou neye shiha peiyu sü soulou theo.

¹⁶ Raki hai Mapao vei baie, ana puhnou deiphao hai mai hi peiwure.

¹⁷ Mapao ye sü thaitayu mainou ae zei tea buyu teidei hi hotayu maitao nou paosho peimoe.

¹⁸ Ana hria buyu Etao nou puh kalo sü paowe, chu-a ae teisa nou puh kalo sü paolai. Mapao ye paosholo!