LOUTAO 113 - SHEEYU BAIBEL (BSI)

Mapao vei Aveih naye Paoshoyu

¹ Mapao ye paosholo! Mapao vei kilai maitaore, puhvei zhih sü paosho khaio.

² Puhvei zhih sü paoshokhaio, chunou poa teisa nou paosholo.

³ Teinghei palova nou poa teinghei loulo koute Mapao vei zhih sü paosholo!

⁴ Mapao nou tyahrü veishi pei hinou khasa-a nou bue; puhvei khouko ava hai raki jünou kua nou bue.

⁵ Etao Ramai Mapao ye raiyu mai ali-a ha-e. Puh hai kukulai hinou bue,

⁶ ana puhnou nakou raki ae deiphao sü zhupeiwe.

⁷ Puhnou touhayu maiye sü deiphi hinou pokupa peie, puhnou veahoa laiyu maiye sü puletao nou veahoyu hinou popa peie,

⁸ ae puletaoye sü panou vemai nahtaoye koa bupeie, puhvei maitao pei hi veo nahmaitaoye sa-a panou bue.

⁹ Puletao nou nahapfü soua buyu maiye sü tsükhou peie, puhnou puletaoye sü tounah peia panou asayu sü ngaoloue. Mapao ye paosholo!