LOUTAO 112 - SHEEYU BAIBEL (BSI)

Mai aveih Mainou Savayu

¹ Mapao ye paosholo! Mapao ye tsükhouyu maitao ae puhvei kharochi hai jüpa sho-a nou züyu maitao hai savayu maitao-e!

² Mai aveih maivei nahmaitao nou teidei hisü aduso mai soua nou hrülai; puletao vei tou-dzü taonou shiha ngao-a nou sava-a hrülai.

³ Puletao vei kihikha maitao hai toungia nou hrülai, ae puletao hai teisa nou vasa-a nou bulai.

⁴ Mai aveih maitao donou zhiyu buh hia ava sünou vapeiwe, daiolouzü Mapao hai zhuvea leshi peiyu ae acheche nasüe.

⁵ Savayu maitao hai lela veisho-a nou maiye pou-pao peiyu ae tsüle sheesha tea nou huha souyu maitaoe.

⁶ Mai aveih maiye sü panou kaodu takhailai moe, puhye sü teisa nou licho peilai.

⁷ Puhnou ko ashi khesü chouyuma ngaopilai moe; puhvei lü hai khousho-a nou bue, ae puhnou Mapao ye louche-a bua bailai.

⁸ Puh hai levea laimoe moa ngaopi laimoe; puhye ngaobayu maitao hai hakata-a bailai touyu sü puhnou lütei tea nou bua baiwe.

⁹ Puhnou touha-a laiyu maiye lela veisho-a nou pei zhi-a baiwe, ae puhvei zhuvea nasü hakhai moe, puh hai duso palai ae mainou puhye sü tsükhou peilai.

¹⁰ Mai ashi mainou hai khesü ngaoloua lekha-e; puletao hai lekha shopoa nou hakata-a baiwe; puletao nou jüpa-a vurei-a buyu khesü hata baiwe.