LOUTAO 111 - SHEEYU BAIBEL (BSI)

Mapao ye Paosholo

¹ Mapao ye paosholo! Puhvei maitao nou tave jüa buyu hrohinou avei tsüle veishi nou peia Enou puh kalo sü paopeilai.

² Mapao nou soupfüyu vah haso khesü daizhou koute khupasa! Sütao jüpa-a buyu maitao nou sütao hai daivanoue touyu sülou nüwe.

³ Puhnou soupfüyu vah haso teitei hai ngaoposhu tsükhou louveiyu khaikho baie; puhvei acheche nasü akhai ha-e.

⁴ Mapao nou Eletaoye panou puhvei khupayu vah haso khesü licho louwe; ae puh hai maiye leshi zhuvea peisüh sho-e.

⁵ Puhye tsükhoua buyu maiye sü panou khüzüa bumoe, puhnou vo soukhai touyu nasü puhnou ngaikhai timoe.

⁶ Puhnou puhvei khouko nasü puhvei maitao hi vakou maivei teidei khesü puletao hi peia soungao peie.

⁷ Puhnou soupfüyu vah teitei hai louche louveie ae kaozü hinou soua baie; puhvei kharochi pfüphou hai veikhai-a baie.

⁸ Sütao veishi hai teisa donou peikhai toue, sütao hai louche louveiyu hinou ae acheche hinou peikhai toue.

⁹ Puhnou puhvei maitaoye sü panou lahdo soupeie, ae puletaoye koa teisa donou vo soukhai peie. Sheeyu ae khouko buyu nasü puh baie.

¹⁰ Tsüdo veia hrülai toulouzü Mapao ye tsükhoulo, puhvei kharochi züa buyu mai hrülai hisü puhnou tsüveiyu nasü peiwe. Puhye teisa nou paosholo.