LOUTAO 109 - SHEEYU BAIBEL (BSI)

Mai alinou Veahoyu donou Ramai hi Paoyu

¹ Oh Ramai, Enou neye paosholai; ne ngasou zei tea bupeiso!

² Mai ashi mai ae dayu maitao nou Eye sü duloure. Puletao nou Eye sü dahrührüa nou paopeire,

³ ae puletao hai kaokhai moa Eye paoshi peie, ae zülia ha-a nou Eye sü dure.

⁴ Enou puletaoye leshi peiyu thaosü puletao nou Eye mah paodu peie, ana Enou puletaoye donou veachi paopeie.

⁵ Enou vah aveih soupeikhai touyu nasü puletao nou Eye vah ashi sünou paoh khapeie, ae Enou leshi peiyu thaosü puletao nou Eye ngaora peie.

⁶ Puh pei hi chikure donou chiku peiyu mai ashi aliye dothou peio, ae puhye sü panou puhye ngaobayu mai aliye panou mah paodu peio.

⁷ Puh pei hi chikuyu phaki puhvei mah khesü panou ngaolo; puhnou veachi paoyu hai-a panou kaomoe tea sülo.

⁸ Puhye sü panou hrü shoso; mai kukhe mai aliye panou puhvei vahbu nasü polo!

⁹ Puhvei nahmaitaoye sü panou rounahtou soutawo, ae puh chapfüye sü panou mimea maipfü southeo.

¹⁰ Puhvei nahmaitaoye sü panou ki ha-a nou tosüyu mai souta peio; puletaoye sü puletao nou buyu buh hinou hulai peio.

¹¹ Paozho pfüyu maitaoye panou puhvei buyu na veishi sü potakhai peio, ae shetumaiye panou puhnou soupfü khaitouyu khesü polouyu sü soupeio.

¹² Puhye sü panou mai taralinoua zhuvea peiso, moyuma puhnou thaodai khaitouyu rounahtou taoye sü panou mai linoua kiko peiyu sü soupeiso.

¹³ Puhvei tyaosholea hrülaiye sü panou mai ali-a hria bupeiso, ae puhvei zhih sü panou khaphao ahai chena hiolouzü lichopu khaiso.

¹⁴ Puhvei puopaoh maitao nou vah ashi soukhaitouyu khesü Mapao ye panou licho peiyu soulo, ae puh pfü nou mah soukhai touyu khesü panou khaipei khaitouso.

¹⁵ Mapao ye panou puletao vei mahmo khesü teisa nou licho peiyu sü soupeio, ana puletaoye sü panou teisa nou ngaiyu sü soupeio!

¹⁶ Mai sünanou leshi zhuveayu nasü licholou more, ana touhayu mai, veaho-a laiyu maitao ae le pepoa nou dopfüa laiyu maiye sü souvea souchoro peia nou southa peiwure.

¹⁷ Puhnou maiye chaa peiyu nasü jüpa-e, puhye panou chaa nasü ngaotheo! Puhnou maiye ha peiyu nasü ngaora-e, mai lia panou puhye sü shiha peiso!

¹⁸ Puhnou maiye chaayu hai sabanü banouyu büa teisa nou banoupoa lai-a baiwe; puhvei chaa nasü puh pfüphao hi dzü chayu büa chatheo, ae rao hi theadzü nakhai touyu büa nakhai peio.

¹⁹ Sütaoye sü panou puhye sah nou hopüa buyu büa ae khyakho nou khopüa buyu büa bupeio.

²⁰ Oh Mapaowo, Eye ngaobayu maitao ae Eye paoshi-a laiyu maitaoye sü sübüa soupeio!

²¹ Ana Oh Mapaowo, avei Mapao, nenou paohkhai touyu thaifüa Eye soukha peio, ae nevei tobai soumoa leshi peiyu nevei aveih sünanou Eye khailupa peio.

²² E hai touha-a nou veahoa laiyu mai ali baie; avei tsüle hi loute hai zhishih shoa nou khaipeiwure.

²³ Koukhe teihao büa Ewo thashoa nou hata laire, Eye khaonatou ali büa teikhai nou hüpoa tare.

²⁴ Ewo hatou moa khü pouleyu donou lülou hore; avei pfüphao hai kirürüa nou rao ae hee likhei bua baire.

²⁵ Eye mainou ngaolouyu phaki, puletao nou Eye sü konü peie, puletao nou pei züpoa nou Eye sü dua baire.

²⁶ Oh Mapaowo, avei Ramai, Eye soukha peio; nevei tobai soumoa leshi peiyu sü nanou Eye khailupa peio.

²⁷ Eye ngaobayu maitaoye panou nenou Eye sü khailupa peiwe touyu nasü pa sülou khaio.

²⁸ Puletaoye panou Eye sü chaa peio, daiolouzü nenou Eye shiha peia bailai. Eye souvea souchoro peiyu maiye panou hraongu ngaoyu soupeio, ae nevei kilai Eye panou asalo!

²⁹ Eye ngaobayu maitaoye panou hraongu sünou sahba soua balo, ae hao ngaoyu sünou puletao vei sabanü büa panou banoulo!

³⁰ Enou shura soua nou Mapao kalo sü paolai; maisou vejüa buyu hrohinou Enou puhye sü paosholai,

³¹ daiolouzü puhnou veahoa laiyu maiye sü vupeiwe ae puletaoye soushi souhalai tea buyu maitao bah hinou khailupa peie.