LOUTAO 108 - SHEEYU BAIBEL (BSI)

Ngaobamai Bah Hinou Vupa Peio tea Veachi Paoyu

¹ Oh Ramai, avei tsüle veishi nou peia neye louchewe! Enou lou soulai ae neye paosholai! Arako, tashulo!

² Poa lou souyu avei basei natao, tashulo! Enou teingheiye sü kaishu peilai.

³ Oh Mapaowo, Enou neye sü tyahrütao hinou kalo paopeilai, Enou maikhe mai hrohinou neye sü paosholai.

⁴ Daiolouzü nevei tobai soumoa leshiyu na hai raki hi khetere; nevei chilee checheyu nasü ratei hi khe daire.

⁵ Oh Ramai, nevei aduso nasü ratei hinou pongao peikhaio, nevei khouko ava nasü deiphao hi ngaopei khaio.

⁶ Nevei khouko sünou Etaoye khailupa peio, Enou veachi paoyu sü kei peio, sübüa nenou leshi-a buyu maitaoye sü panou turei palou.

⁷ Ramai nou puhvei sheeyu buh hinou haibüa paoe, “Veilouyu hisünou Enou Shekem nuhdu nasü delaiwulai, ae Sukkoth Deikho nasü Enou avei maitao hi zhipeilai.

⁸ Gilead hai avei baie, ae Manasseh haina-a avei baie, Ephraim hai avei peirüe ae Judah hai avei süüpo-e.

⁹ Moab hai Enou poa dzükhüyu reikhao nasüe, Edom hai avei baie touyu shee soungaore donou avei phi kha khailai, Philistin teidei hinou Enou veilou ngalouyu nasü shapaolai.”

¹⁰ Oh Ramai, thaonou Eye veisho-a soukhai touyu nuhdu hisü save peilai? Thaonou Eye Edom hi sapoa vepei laige?

¹¹ Nenou Etaoye sü malai chekhao rewu? Ne Etao vei soureih souyu maitaoye koa tapu peilai modou?

¹² Ngaobayu maitaoye duloure donou Etaoye soukha peio, daiolouzü deiphao maivei soukha-apei haiolouzü hamako baie.

¹³ Ramai nou Etaoye kozho peiyu thaio Etao nou kolou süe, puhnou Etaoye ngaoba-a buyu maitaoye sü soukanghei peilai.