LOUTAO 107 - SHEEYU BAIBEL (BSI)

LARÜBVÜ ANGOUNA ( Lou 107—150 ) Ramai vei Aveih naye Paoshoyu

¹ “Mapao ye kalo paokhaio, daiolouzü puh hai veisho-e puhvei leshi zhuvea hai akhai hae!”

² Mapao nou khailupa peiyu maitaoye sü panou haibüa paosholo. Puhnou neletaoye sü ngaobayu maitao bah hinou vupapei khaitoue,

³ ae neletaoye sü vakou maivei teidei, teinghei palo ae teinghei loulova nou, alia reilo ae khelo vanou sapoa dakhai vepei khaitoue.

⁴ Kamai sü nuhdu hi vere ludu ngaoloumoa radeiki hinou sühao poa laire.

⁵ Puletao hai houzü shoa nou bure, ae areih aliro hazei toure.

⁶ Süthaisü puletao nou veahoa buyu hinou Mapao ye sü kue, ae puhnou puletaoye veahoa buyu hinou khailupa peie.

⁷ Puhnou puletaoye ludu zütou touyu hinou puletao nou hrüre nuhdu hisü süthaisa-a velou peie.

⁸ Mapao nou puletaoye leshi peiyu donou puletao hai puh kalo paozüe, daiolouzü puhnou puletaoye donou khupayu vah haso alao soupeie.

⁹ Puhnou dzü rei-a laiyu maiye sü rukha soupeie, ae houzüa laiyu maiye sü touso veihlinou soupou phoupeie.

¹⁰ Kamaia levea nou azhi hinou hukhamai soua veasho-a nou bue,

¹¹ daiolouzü puletao nou Khoukhoulai Ramai vei chikha khesü zübare ae puhnou paodou peiyu khesü laiwu laire.

¹² Puletao hai vah khoushoa soupfüyu donou shaloure, puletao hai kaodu talaire, ae mai linoua puletaoye sü soukha peilai moe.

¹³ Süthaisü puletao nou veaho shoa buyu hinou Mapao ye sü kue, ae puhnou puletaoye sü veahoa buyu hinou khailupa peie.

¹⁴ Puhnou puletaoye sü veaho-a azhi buh hinou popa peie, ae puletaoye phupfüa buyu hurai khesü puhnou soudelai peie.

¹⁵ Mapao nou puletaoye zhuvea leshi peiyu donou puletao hai puh kalo paozüe, daiolouzü puhnou puletaoye donou khupayu vah haso alao soumoa soupeie.

¹⁶ Puhnou baosahu nou soukhai touyu kikhubomü khesü dakho peie, ae hu nou khakhai touyu bokha khesü dahra peie.

¹⁷ Kamai sü voyu donou puletao vei mahmo vanou sounou soua bue, ae puletao nou vah ashi souyu donou veaho-a nou bue.

¹⁸ Puletao hai touso ali-a jüpayu sü hare, ae thaire teile sü nghitei-a nou bure.

¹⁹ Süthaisü puletao nou veahoa buyu hinou Mapao ye sü kue, ae puhnou puletaoye sü veahoa buyu hinou khailupa peie.

²⁰ Puhnou puhvei chipao nou seive puletaoye sü souvei peie, ae khü hi loutare hinou puletaoye khailupa peie.

²¹ Mapao nou puletaoye leshi peiyu donou puletao hai puh kalo paozüe, daiolouzü puhnou puletaoye donou khupayu vah haso alao soupeie.

²² Puletao hai posheela peiyu noupu koa puh kalo paozüe, ae asayu lou nou koa puhvei vah haso khesü paopeio.

²³ Kamai-o zaidu phao vanou dzüluki pfüa huha soua hrüwe.

²⁴ Puletao nou zaidu hi khupayu vah haso khesü Mapao nou soulousüe touyu ngao-e.

²⁵ Puhnou kharochi peikhaie, zaidu hi dzü hai chishoyu teikhai nou hükhü paloua baiwe.

²⁶ Dzüluki khesü tei hi hüpoa kukhe ae zai thouyu hi hüpoa loupeie. Haibüa kaozhou shishoa buyu phaki maikhe mai hai khuveiyu hazei baiwe;

²⁷ puletao hai zhaoh sozhiyu mai ali büa chaorara-a baiwe, ae puletao hi soulou süyu dokai veishi hazei toua baie.

²⁸ Sübüa puletao nou veahoa tsü ha-a buyu phaki, puletao nou Mapao ye kue, ae puhnou puletaoye sü kaozhou shi-a veahoa buyu hinou khailupa peie.

²⁹ Puhnou teikhai teirü ashi nasü soukaona peie, ae zaidu hi dzü khüpayu sü nasei tare.

³⁰ Zaidu hi dzü hai kaonaphi tayu phaki puletao hai lesa shore, ae puhnou puletao nou venüyu buh hisü savete peie.

³¹ Mapao nou puletaoye zhuvea leshi peiyu donou puletao hai puh kalo sü paozüe, daiolouzü puhnou puletaoye donou khupayu vah alao soupeie.

³² Maisou vejüa buyu buh hinou puletao hai puhvei aduso nasü shapao peizüe, ae süthai–apei maitao nou vejüa buyu buh hinou puhye kalo paopei züe.

³³ Mapao nou reidzü khesü deithe soupeie, ae dzüla khesü southekei khaipeie.

³⁴ Puhnou thoudzü veishoa buyu teidei khesü tai buyu teidei hi souda thoupeie, daiolouzü teidei sühi hrüa buyu maitao hai maishiyu donou.

³⁵ Puhnou radeiki khesü dzübvü hi soudapa peie, ae deithe khesü panou dzünghou dzüla payu buh soupeie.

³⁶ Puhnou houzüa laiyu maitaoye panou buh sühinou hrüyu soupeie, ae puletao nou nuhdu khesü soushu loue.

³⁷ Puletao nou shinamara khesü daothou peie ae darkha kipei khesü souloua veishoa nou chachiyu sü souloue.

³⁸ Puhnou puhvei maitaoye hapeie, ae puletao hai tou-dzü alao ngaoloue; puhnou puletao vei kikhaorü khesü panou shita hatayu sü soupei moe.

³⁹ Ramai vei maitaoye zhaipou shiyu mainou haoungu soupeiyu phaki ae soutai sounou peiyu phaki,

⁴⁰ Puhnou puletaoye sü souvea souchoro peie, ae puletaoye sü panou ludu phouha-a radeiki hinou sühao poa ta-e.

⁴¹ Ana puhnou touha laiyu maiye puletao nou veahoa buyu hinou vupa peie, ae puletao vei kihikha maiye sü panou zhaokhome büa tyaka peiyu sü soupeie.

⁴² Acheche maitao nou haisü ngaoloua lesa-e, ana mai ashi maiye sü panou zei tea bue.

⁴³ Tsüveiyu maiye sü panou hai khesü tsücholo; puletaoye panou Mapao vei tobai soumoa leshi peiyu nasü sülo.