LOUTAO 106 - SHEEYU BAIBEL (BSI)

Puhvei Maitao hi Mapao vei Aveih

¹ Mapao ye paosholo! Mapao hi kalo paokhaio, daiolouzü puh hai veishoe, puhvei leshi hai akhai ha-e.

² Puhnou soupeikhai touyu vah haso khesü thaonou paovete lousüe? Thaonou puhye lichekhou teanou paosho peilou süge?

³ Puhvei chikha khesü züa laiyu maitao ae teisa nou kaozü nasü soua buyu maitao hai savayu maitaore.

⁴ Oh Mapaowo, nenou nevei maitaoye soukha peiyu phaki E-a licho peio; nenou nevei maitaoye khailupa peiyu phaki E-a panou sühisü loulo.

⁵ Nenou dopaluyu nevei maitao nou duso payu nasü E-a panou ngaolo, nevei tyahrü maitao nou sava-a buyu hisü ae puletao nou sava-a kathe soua buyu hisü E-a panou loulo.

⁶ Etao puopaoh maitao büa Etao nou mahmo khesü soupfüwure, Eletao nou vah ashi sü soure ae mai shi-a soure.

⁷ Etao vei puopaoh maitao nou Ejipt hi buyu phaki, nenou khupayu vah haso soupei khaitouyu khesü licho peimoe; nenou puletao hi tobai soumoa zhuvea leshi peiyu nasü puletao nou ngaiwure; ae puletao nou Khoukhoulai hi Abuo ye sü Zai Ho hinou khaitya pare.

⁸ Ana puhnou paohkhai touyu thaifüa puhvei dushoyu khouko nasü soungaore donou puletaoye sü khailupa peie.

⁹ Puhnou Zai Ho nasü kharochi peie, ae sünasü panou the tare; puhnou puhvei maitaoye sübüa dei the hinou süthaisa-a tachopa peie.

¹⁰ Puletaoye ngaora-a buyu maitao hinou puhnou puletaoye sü khailupa peie, puhnou puletaoye sü ngaobayu maitao bah hinou vupa peie.

¹¹ Ana puletaoye ngaobayu maitao sü pa dzü nou maothare, puletao mai ali koute-a turei palou moe.

¹² Süthaisü puhnou paohpei khaitouyu nasü puhvei maitao nou louche loure, ae puletao nou puhye lou soushoe.

¹³ Ana puletao hai puhnou soupeikhai touyu vah haso khesü thaso-a nou ngaiwure, ae puhnou paodou peiyu khesü khomoa lahdodo soutare.

¹⁴ Puletao hai radeiki hinou pfüphao jüpa nasü sounüa Ramai hai kabü laisa tea puhye zhai zhue.

¹⁵ Südonou puhnou puletao nou jüpa-a khoyu nasü peie, ana puhnou puletao hi sounou ashi-a koa nou seive peie.

¹⁶ Maikhe mainou radeiki hinou ta-a buyu teile hinou sheeyu Mapao vei kilai Moses ae Aaron ye sü ngaorai pare.

¹⁷ Süthaisü dei nou kopaloua Dathan ye zhaoloure, ae Abiram alia puhvei kihikha maiye paoloure;

¹⁸ mei nou kou puletao thaifüyu maiye taoloure ae mai ashi maitaoye sü deithare.

¹⁹ Puletao nou Sinai deichi hinou chode ali zhai hai sana nou souloua sünaye sü thotare;

²⁰ puletao nou Ramai vei khouko ava nasü pounghou touyu chode zhairai ali nou poa lealoure.

²¹ Ejipt hinou khupayu vah haso duduli soupeipu, puletaoye khailupa-apeio Ramai ye sü puletao nou ngaire.

²² Puhnou daizhou koute khupayu vah tyatyali soupeie! Zai Ho hinou daizhou koute khupayu vah haso khesü puhnou soupeie!

²³ Ramai nou puhvei maitaoye souha laire tea buyu phaki, puhnou dopa louyu puhvei kilai, Moses nou Ramai nghoujü hinou laloure, ae puhvei lekha rarou nou puletaoye souhalai tea buyu nasü ngichao loure.

²⁴ Süthaisü Ramai nou paohpei khaitouyu nasü puletao nou louche moa puletao hai sava shoa nou buloure teidei nasü malaiwure.

²⁵ Puletao hai puletao vei sahpao hinou nolealea bue, ae Mapao nou paoyu chi sü kei bare.

²⁶ Südonou puhnou puletaoye sü panou radeiki hinou thaita khai-a bailai tea chaachou soure,

²⁷ ae puletao vei tyaosholea maitaoye sü panou porarou ta-a vakou maivei teidei hinou pa thaita bailai tea puhnou lelawure.

²⁸ Süthaisü Peor tea kuyu teidei hinou, Ramai vei maitao hai Baal rahye tho tare, ae hrirai hayu rahtaoye posheelayu sou khesü toutare.

²⁹ Puletao nou soupfüyu vahtao donou Mapao vei lekha sü daipawure, südonou puhnou puletao hisü sounou ashi sü seive thoupeie.

³⁰ Ana Phinehas nou lashuloua kaomoyu maitaoye sü tudee peie, ae rahta nasü chaore.

³¹ Hai khesü puhvei leli ae jüpayu nasüe tea nou vere teile teitei hia licholai.

³² Meribah touyu dzüla buh hinou maikhe mainou Mapao vei lekha sü soupa peie, ae puletao donou Moses hai veahoyu sü ngaoe.

³³ Puletao nou puhye sü souchoro peiyu donou puhnou tsücho loumoa chi ashi taoli hai pao hahare.

³⁴ Puletao hai Mapao nou kharochi peiyu nasü zümoa cheche moyu rahye thoyu maikhe maiye sü southa more,

³⁵ ana puletaoye koa shanghi souzho loure, ae puletao nou tayu zhai nasü fütare.

³⁶ Ramai vei maitao hai bashara taoye tho tare, ae süna vanou puletao hai kaodu tare.

³⁷ Kanaan teidei hinou puletao hai puletao vei nah naotu poutu khesü basharaye poa sheela peire.

³⁸ Puletao nou mahmo ali-a hayu nahmaitaoye southayu donou teidei nasü souzhai khaire.

³⁹ Puletao nou soupfüyu vahtao donou puletao hai sheemore, ae Ramai hinou chilee chechemo tare.

⁴⁰ Südonou Mapao hai puhvei maitao hi lekha loure, ae puletaoye sü puhnou ngaora loure.

⁴¹ Puhnou puletaoye sü Ramai sümoyu tyahrü maitao bah hi thaothou peiwure, ae puletaoye sü puletao ngaobayu maitao nou khasa-a hrüe.

⁴² Ngaobayu maitaoye panou puletaoye souvea souchoro peie, ae puletao khe hinou pa veasho-a nou hrüe.

⁴³ Mapao nou puletaoye sü vutaoli hai khailupa peie, ana puletao hai puhye khaityayu nasü doloua baire, ae mahmo khesü soutapu-a baire.

⁴⁴ Ana puletao nou krayu pai sü Mapao nou keinou peie, ae puletao nou veahoyu nasü puhnou süpeie.

⁴⁵ Puhnou puletaoye donou vo soukhai touyu nasü licho peie, ae puhvei zhuvea leshi hinou puhnou puletao hi lekha nasü khaita peie.

⁴⁶ Puhnou puletaoye souvea souchoro peiyu maitaoye panou puletaoye sü zhuvea leshi peie.

⁴⁷ Oh Mapaowo, Etao Ramai, Etaoye khailupa peio, ae Etaoye tyahrütao hinou sa-a dakhai ve peio; sükulouzü Etao nou ne kalo sü paolai ae nevei sheeyu zhih sü paosholai.

⁴⁸ Israel maivei Ramai Mapao ye sü paosholo; puhye chua ae teisa nou paosholo! Mai hrülaiye sü “Amen!” tea panou paolo! Mapao ye paosholo!