LOUTAO 105 - SHEEYU BAIBEL (BSI)

Ramai ae Puhvei Maitao

¹ Mapao ye kalo paopeio, ae puhvei aduso nasü shapao peio; tyahrü hrülai hi puhnou soupeikhai touyu vah haso khesü pokhaio.

² Mapao ye lou sousho khaio; puhnou khupayu vah soukhai touyu khesü paopeio.

³ Etao hai puhvei mai souyu donou lesalo; puhye thoyu mai hrülaiye sü panou asalo.

⁴ Soukha ngaoloure donou Mapao hi tavelo; ae puhye tobai soumoa tho-a bulo.

^5-6 Puhvei kilai Abraham vei tyaosholea maitao, puhnou dolouyu Jakob vei tyaosholea maitao: Ramai nou khupayu vah haso soupeikhai touyu khesü licholo, ae puhnou chidei peikhai touyu khesü licholo.

⁷ Mapao hai Etao vei Ramai; puhvei chikhatao hai deiphao teitei donoue.

⁸ Puhye koa vo soukhai touyu nasü puhnou teisa khaipeilai, ae puhnou paohkhai touyu nasü khaphao thethe koute hai khaipeilai.

⁹ Puhnou Abraham hi chaachou soukhai touyu ae Isaak hi ae-ao tea soukhai touyu nasü puhnou souvete peilai.

¹⁰ Puhnou Jakob hi vo soukhai touyu nasü teisa donou soupei khaitoue.

¹¹ Puhnou paoe, “Enou Kanaan maivei teidei sü neletao hi neletao vei kikaa panou soure donou peilai.”

¹² Ramai vei maitao hai daoti baie, ae Kanaan maivei teidei hinou shetumai soua bue.

¹³ Puletao hai teidei ali hinou teidei ali hi ae vedei ali hinou ali hi sühao poa nou ta-e.

¹⁴ Ana Ramai nou puletaoye sü panou mai linoua souvea souchoro peimoe, ae puletaoye vupa peire donou puhnou veo maitao hisü haibüa paopi peie.

¹⁵ “Enou dopa louyu avei kilai maitaoye deiso; avei rachipaola-apei maitao hi vah ashi souso.”

¹⁶ Mapao nou puletao vei teidei hisü tokaa seive peie, ae puletao vei touso khesü potakhai toupeie.

¹⁷ Ana puletao jünou rai-a puhnou mai ali hai vakou seita peie, puh hai Josef toue, ae puhye sü qila mai ali soua zholai peie.

¹⁸ Puh phi hai hurai nou khipfüe, ae puh te hi hu nou thou khapfüe;

¹⁹ puhnou paoyu chipao khesü vepamo koute, Mapao vei chipao nou puhye sü kabü laisa tea zhuwe.

²⁰ Süthaisü Ejipt hi veo nou puhye pophapeie, tyahrütao hi kho-apeio maitao nou puhye lahdo soupeie.

²¹ Puhnou puhye sü panou puh kihikha hi paopu nasü soupeie, ae puhvei na veishi pei hi panou khopu soupeie.

²² Veo vei khe hinou buyu peikho maitaoye paodou peire khouko sü puh hi bue.

²³ Süthaisü Jakob nou Ejipt hisü vere, ae sühinou puhnou füsho-a buloure.

²⁴ Mapao nou puhvei maitao hi tyoudzü alao soumoa hapeie, ae puletaoye sü panou ngaobayu maitao jünou khouko ngaopuloue.

²⁵ Puhnou Ejipt maiye panou puhvei maitaoye ngaorare donou soupeie, ae puhvei kilai maitaoye panou souvea souchoro peie.

²⁶ Süthaisü puhnou dopalouyu puhvei kilai Moses ae Aaron ye sü seive peie.

²⁷ Puhai nou Ejipt teidei hinou Ramai vei vah haso ae khupayu vah khesü soungao peie.

²⁸ Ramai nou teizhiyu sü teidei sühi seive peie, ana Ejipt mai hai puhvei kharochi khesü zübare.

²⁹ Puhnou puletao vei reidzü khesü zhe hi souda thoupeie, ae kha veishi sü southakhai peie.

³⁰ Puletao vei teidei veishi hi ae vebuh hi koute-a vao nou pa phoutao-a bupeie.

³¹ Ramai nou kharochi peia panou khaomai ae seihei nou teidei teitei hisü phoutsü peie.

³² Puhnou teirü seiveyu thaosü reithou ae teipeiyu sünou teidei hisü seive peie.

³³ Puhnou puletao vei darkhabe ae doushibe khesü soushi khaipeie, ae süübe veishi sü soucha khaipeie.

³⁴ Puhnou kharochi peikhaie, khazü khesü phouhao louho soua teidei veishi hisü ve phoutao loure,

³⁵ ae puletao nou teidei hi buyu pounghou ae shinamara veishi hai toukhai loure.

³⁶ Puhnou Ejipt teidei hi hrüa buyu nah narai mai hrülai hai southakhai toupeie.

³⁷ Süthaisü puhnou Israel maiye süthaisa-a tapa peie, puletao nou shahu ae sana khesü poa tare, alia puletao mai hrülai hai pfüphao veishoe ae khouchi khaitoue.

³⁸ Ejipt maitao hai puletaoye ngaopire ae puletao nou tapa peikhai puletao hai lesa shore.

³⁹ Ramai nou puletaoye sü teihao nou züpoa tapeie, ae khei teile hi mei nou vapeie.

⁴⁰ Puletao nou kho khaie, puhnou puletao hi raohou khesü seive peie, raki vanou puletaoye sü touso alao seikou peie.

⁴¹ Puhnou chuhdu ali hinou pa dzü küpa peie, sünasü radeiki hinou rei ali büa panou dzü küta-e.

⁴² Puhnou puhvei kilai Abraham hi chaachou soukhai touyu nasü licho peie.

⁴³ Südonou puhnou dopa louyu maitaoye sü puhnou süthaisa-a papeie, ae puletao hai sasho-a nou shusoua lou soue.

⁴⁴ Puhnou puletao hi mai kukhe maivei teidei sü peie ae puletao nou puletao vei kilu khesü poloue.

⁴⁵ Sübüa soupeiyu hai puhvei maitaoye panou puhvei chikhatao ae kharochi khesü züloure donoue. Mapao ye paosholo!