LOUTAO 104 - SHEEYU BAIBEL (BSI)

Soupeiyu Mapao ye Paoshoyu

¹ Oh Arako, Mapao ye paosholo! Oh Mapaowo, avei Ramai, ne hai daizhou koute due! Ne maizü khouko ae aduso sünou banou poa nou bue;

² ae ava sünou züpoa nou bue. Nenou raki sü sahpao haoyu büa haokhai peie,

³ ae nevei ki hai dzü pei hinou soukhaitoue. Teihao nou nevei rheiluki soua pfütawe, ae teikhai vei shouh nou pfüa zhaotawe.

⁴ Nenou teikhai sü nevei kopomai souwe, ae teipeivavayu nasü nevei kilai souwe.

⁵ Nenou teideiphao hai nasü panou lümore donou soutaosoua beikhei sü soutou toukhai peiwure.

⁶ Nenou zaidu nasü deiphao hi sabanü banouyu büa khaipeie, ae dzü khesü panou deichi hopeie.

⁷ Nenou dzütaoye züpeiyu phaki, puletao hai tuta-a baiwe; shusoua nenou kharochi peiyu pai sü choulou khaie, puletao hai tuta-a baiwe.

⁸ Puletao nou deichi phao hisü küpawe ae deikho hisü küvewe, sübüa puletao hai puletao nou bure buh hisü küve tawe.

⁹ Nenou teideiphao sü dzü panou hopulou more donou puletaoye sü panou hai hi koute bua bailai touyu vei raih sü thoupeie.

¹⁰ Nenou deikho hi panou küre donou dzüla sü soupeie, ae deichi kohi panou küre donou rei khesü soupeie.

¹¹ Sütao nou rekhaona khesü dzü peie, ae rei-a rekou nou buyu rheisüh khesü panou reikha louwe.

¹² Süpehao hinou buyu süübetao hinou raohou khenou phe souloua lou soua bue.

¹³ Ratei hinou nenou teirü sü deiphaova rükou peie, ae deiphao sü nevei shiha khenou kou phoupeie.

¹⁴ Nenou kikhaorü taoye panou toure donou poudai khesü paopa peie, ae maikhe maiye donou tea shinamara khesü soupeie,

¹⁵ maikhe maiye souva peire donou darkhadzü soupeie, maikhe maiye lesousa peire donou oliv theadzü sü soupeie ae puletaoye pfüchi peire donou raokhao sü soupeie.

¹⁶ Mapao nou shokhai touyu süübetao, Lebanon hi sedar süübetao hai dzü veishoa nou ngaoloue.

¹⁷ Sütao hinou raohou khenou phe soua bue; ae dzü raohoutao-a sütao hinou phe souwe.

¹⁸ Renghitu khenou deichi kuyu kinou buwe, ae chuhlya qulu kinou rekhaona taonou tutsüa bue.

¹⁹ Khouh teile süloure donou nenou khouh sü soupeie, ae teinghei sü panou lah loutare teile süa soupeie.

²⁰ Nenou khei teimai teizhi nasü rekhaona metaoye panou ngaohao-a to phoutoure donou soupeie.

²¹ Ramai nou souda peikhai touyu touso khesü khaosouveo khenou rapoa phoutouwe.

²² Tei thepakhaie, puletao hai lah buyu phe hisü dakhailou dazü ta-a baiwe.

²³ Süthaisü deiphao mainou lahlah nou soupfüre vah khesü teizhi loumo koute soupfüwe.

²⁴ Mapao, nenou soupeikhai touyu na khesü daizhou koute pousa! Ne hai daizhou koute tsüdo vei-a nou haitao veishi sü soupeisa! Deiphao hai nevei bashana khenou phoutao-a bure.

²⁵ Nenou kasho-a ae duso shoa nou zaidu sü soupeie, sühisü phouhao louho hrikhaona khesü tai-du sümoa nou bue.

²⁶ Sühinou dzüluki khesü tawe, ae Leviathan khaona-a koa nou bue.

²⁷ Haitao hrülai hai puletao nou touso-a hria buloure donou ne hinou vuzhia nou bue.

²⁸ Nenou puletaoye sü touso sü peie, ae puletao nou tousoloua rukha loue.

²⁹ Nenou thaowua tayu nasü puletao nou ngaopi-e, nevei ssü nasü puletao hinou pota peiyu phaki, puletao hai thai-a baiwe, ae nai data-a baiwe.

³⁰ Ana nenou puletao hi ssü houthou peikhaie, puletao sü soulou baie. Sübüa deiphao hisü hrü ashu nasü peie.

³¹ Mapao vei kathe sü panou teisa nou buyu sü soulo! Puhnou soupeikhai touyu bashatao donou puhye sü panou lesa-a bulo!

³² Puhnou deiphao zhu peiyu phaki, deiphao hai lüngua baiwe, puhnou deichi khesü deipei khaie, sütao hai meikhao pa-a baiwe.

³³ Enou hrüa bubusa sü Mapao ye lou sousholai, ahi hrirai buki sasü Ramai ye lou nou sousholai.

³⁴ Enou lou souyu nasü puhye panou jüpayu sü soupeio, daiolouzü Enou sava-a buyu haisü puh hinou ve baie.

³⁵ Mahmo souyu maiye sü deiphao hinou souha laiwo; mai ashi maiye sü panou bupu khaiso. Arako, Mapao ye paosholo! Mapao ye paosholo!