LOUTAO 103 - SHEEYU BAIBEL (BSI)

Ramai vei Lesha

¹ Mapao ye paosholo, arako! Avei hrümai hrülai, puhvei sheeyu zhih sü paosholo.

² Arako, Mapao ye paosholo, ae puh hai daizhou koute zhuvea süwe touyu nasü ngaiso.

³ Puhnou avei mah veishi khaipeie, ae avei sounou teitei sü souvei paie.

⁴ Puhnou Eye khüh hi loure hinou popa peie, ae puhvei leshi zhuvea sünou Eye ha peie.

⁵ Puhnou avei hrümamai hi haveihli soupeie, südonou E hai nahle-a nou lüche büa khouchi sho-a nou bue.

⁶ Mapao nou kaozü hinou chiku peiwe, ae veahoyu maivei zü nasü zhupeiwe.

⁷ Puhvei tsüchoda khesü puhnou Moses hi pongao peie, ae Israel maiye panou puhvei khupayu vah haso khesü ngaoloue.

⁸ Mapao hai zhuvea peisü sho-a ae leshi süe, rarou lekha haha moe ae tobai soumoa leshi peiyu sü bukoute peiwe.

⁹ Puhnou maiye zükoute-a bumoe, ae teisa nou rarou koute-a bumoe.

¹⁰ Etao nou ngaozü na thaifüa puhnou Etaoye tudee moe, moa Etao nou soumah pfümah khaitouyu thaifüa paoh khapei moe.

¹¹ Daiolouzü ratei hai deiphao jünou kua buyu bütoua puhye tsükhoua buyu maitao hisü puhvei lesha hai dushoa bue.

¹² Teinghei palova nou teinghei loulova koute hai doushoa buyu bütoua süzhou koute du-a nou Etao vei mahmo khesü puhnou polai peiwure.

¹³ Puonou nahye zhuvea leshiyu büa puhye tsükhoua buyu maiye sü Mapao nou zhuvea leshi peie.

¹⁴ Puhnou Etaoye dainou poa soukhai toue touyu sü süwe; Etao hai nai baie touyu sü puhnou licho peiwe.

¹⁵ Emai hrütou hai pounghou ali büa baie. Etao hai rekou nou paopayu poupah ali büa baie;

¹⁶ sünasü teikhai nou hüsho peikhaie, raita hata-a baiwe— mai linoua sünasü daikinou busa touyu sü sümoe.

¹⁷ Ana Mapao ye tsükhoua buyu maiye sü puhnou leshi peiyu hai akhai ha-e, ae puhnou chilee checheyu nahai puletao vei tyaosholea koute hi bupeie.

¹⁸ Puhnou vo soukhai touyu nasü züa buyu maitao, ae puhvei chikha khesü züa buyu maitao hi puhnou zhuvea leshi peiwe.

¹⁹ Mapao nou puhvei vebuh hai raki hi khaikhai toue, ae puhnou ha veishi pei hinou veo sü soua bue.

²⁰ Khouko pfüshoa buyu rakiva maitaore, Mapao ye paosholo, puhvei kharochi züa buyu maitao, Mapao ye paosholo!

²¹ Raki vanou khouko pfüa buyu hrülai, puhvei kilai maitao, ae puhvei leli soua laiyu maitao, Mapao ye paosholo!

²² Puhnou soupeiyu bashana hrülai, puhnou khasa-a buyu buh teitei, Mapao ye paosholo! Arako Mapao ye paosholo!