LOUTAO 101 - SHEEYU BAIBEL (BSI)

Veo Maivei Chaachou

¹ Avei lou hai maicheyu ae kaozüyu hinoue, ae Enou lou sünasü ne hi souwe, Oh Mapaowo.

² Enou mah khaimoyu ludu hinou talai; ne duki ahi velaige? Enou avei hrümamai hai sheesha tea nou aki hinou bulai,

³ ae hashi nasü hatara lisoua aetoukhai laimoe. Ramai hinou tavai tayu mai ali vei vah haso khesü Enou ngaora-e, Enou puletaoye sü koa hataralia souzho laimoe.

⁴ Enou tsüle sheemoyu sü soulai moe, ae vah ashi khesü Enou soukhailai moe.

⁵ Kheikhei soua kinapa maiye paoshiyu maiye sü Enou hulaiwulai; khaophu souyu mai ae khaityayu maiye koa Enou heamea poa nou bukhailai moe.

⁶ Chilee checheyu maiye sü Enou zhuvea peilai, ae puletao hai Eye koa abuh hinou bulai; tsüle sheesha tea nou buyu maiye sü panou avei kuvah soua bulai.

⁷ Dayu maiye sü panou avei buh hi bulai moe, veikhokho soua laiyu maiye sü panou anghoujü hi bulai moe.

⁸ Teithetsü Enou avei teidei hisü mai ashi maiye souha peilai, Enou Mapao vei nuhdu hinou mai ashi maiye sü hulai-a bailai.