LEVIMAI LARÜBVÜ 8 - SHEEYU BAIBEL (BSI)

Aaron ae Puh Nahpoutu Maitaoye Theadzü Napeiyu

¹ Mapao nou Moses hi paoe,

² “Aaron ae puh nahpoutu maitaoye saloua Enou buyu Sahpao vei bomü hisü sakoulo, alia napao maivei sabanü, theadzü, mah vei posheela peiyu chode ali, zhaotu ahai, ae kheih thoumoa soukhai touyu raokhao sülai ali tea nou polo.

³ Süthaisü mai hrülaiye buh haihi kuve jülo.”

⁴ Mapao nou kharochi peikhai touyu büa Moses nou souloure, ae maisou nou vejüa buyu hinou,

⁵ Moses nou puletao hi paoe, “Chu Enou soure vah haina hai Mapao nou kharochi peikhai toue.”

⁶ Moses nou Aaron ae puh nahpoutu maitaoye nghoujülo sapo kouloua naanou soure vei dzükhülo tea paopeie.

⁷ Puhnou Aaron ye naazao hai noupeie, ae nave hai puhvei khya hisü khopeie. Puhnou puhye ephod hai thoupeie, ae zhai veisho-a soukhai touyu khyakho sünou puh khya hi khopa peie.

⁸ Puhnou khaokhayu na hai puh hi thoupeie, ae sühi Urim ae Thummim hai thoupeie.

⁹ Puhnou Aaron pei hisü peizüsah phupeie, ae süna vei pah hi hai sana nou souyu zhusana hai peithouyu vei shee soua thoupeie. Mapao nou puh hi kharochi peikhai touyu bütoua puhnou soupeie.

¹⁰ Süthaisü Moses nou nare theadzü sü poloua Mapao nou buyu Sahpao ae sühinou buyu na veishi hai noupeie, ae sütao hai soushee peie.

¹¹ Puhnou theadzü daotu poloua posheelabu sü bakha anai hai kavu peie ae sühi buyu natao, raikhao ae pokhaiyu buh khesü soushee loua Mapao vei bah hi thoupeie.

¹² Puhnou nayu theadzü sü poloua Aaron pei hi lazü peie, ae puhye soushee peia Mapao bah hi peithou peie.

¹³ Süthai hai Moses nou Aaron vei nahpoutu maitaoye sakou loua Mapao nou kharochi peikhai touyu thaifüa puletaoye naazao hai noupeie, nave hai khya hi khopeie, ae puletaoye peirü rüpeie.

¹⁴ Süthaisü Moses nou mah vei posheela peiyu chode nahai pokou loure, ae Aaron alia puhvei nahpoutu maitaoye panou cho pei hisü bah deiloure.

¹⁵ Moses nou chode nasü datha loure ae souzhe hai poloua posheelabu kainghou adai hisü lazü peiwure.

¹⁶ Moses nou lena hi buyu southea veishi, sousü veikayutao, chithou ahai ae sütao teitei poloua posheelabu hinou meidei peie.

¹⁷ Mapao nou Moses hi chikha peikhai touyu büa puhnou sou kukhetao hai, süsü souhee, souke, ae lesou teitei hai fühao hinou vakou popaloua mei deilaiwure.

¹⁸ Süthai hai Moses nou meidei-a posheelare donou zhaotu ali hai pokou loure, ae Aaron alia puh nahpoutu maitao nou süna pei hisü bah deiloure.

¹⁹ Moses nou zhaotu sü datha loure, ae souzhe hai poloua posheelabu vei kainghou adai hisü lazü peie.

^20-21 Puhnou zhaotu nasü daode sasa loure, lesoutao ae phi ahai hai dzüthea loure, alia pei, theatao, ae sou teitei hai Mapao nou puh hi chikha peiyu büa posheelabu hinou meidei peie. Meidei-a posheela peiyu haina hai thoudzü vei posheela peiyu nasüe, ae haibüa meidei peiyu hai Mapao nou jüpa-e.

²² Süthai hai Moses nou sheeyu vah donou pokupa peiyu posheela soure donou zhaotu kukhe nasü pokou loure, ae Aaron alia puhvei nahpoutu maitao nou zhaotu pei hisü bah deiloure,

²³ ae Moses nou zhaotu sü datha loua souzhe hai poloua Aaron vei noubei zhoulo pha hi, bahke zhoulo ae phike zhoulo hi napeie.

²⁴ Süthaisü puhnou Aaron vei nahpoutu maitao hai sakou loure, ae souzhe sü poloua puletao vei noubei pha zhoulo, puletao vei bahkü zhoulo, ae phikü zhoulo shaohpeie; ae lia buyu souzhetao hai posheelabu pehao teitei hi lazü peie.

²⁵ Puhnou southeatao, mi hi taoyu theatao, lesou hi buyu southea teitei, sousü veikayutao, chithou ae sühi taoyu theatao, ae phikao zhoulova hai poloure.

²⁶ Süthaisü Mapao hi peithou khaitouyu kheih thoumoa soukhai touyu raokhao sülai ali hinou raokhao ali, theadzü nou soukhai touyu raokhao ali, ae raokhaoki ali hai puhnou poloua southeatao ae phi zhoulo phao hisü khailoure.

²⁷ Puhnou haitao hai Aaron ae puh nahpoutu maitao bah hi thoupeie, ae puletao nou haina hai Mapao hi posheela peie.

²⁸ Süthaisü Moses nou sütao hai puletao bah hinou poloua meidei-a posheela peiyu noupu sütao hai posheelabu phao nou meidei-a posheela peiwure, haisü sheeyu vah soure donou pokupa peiyu posheela nasüe. Meidei-a posheela peiyu hai Mapao nou jüpa-e.

²⁹ Süthaisü Moses nou khaorao nasü poloua Mapao hi veisho-a sapeina soua posheela peie. Sheeyu vah soure donou pokupa peia posheela peiyu hi hainasü Moses vei zha-e. Mapao nou chikha peiyu teitei hai Moses nou souche peie.

³⁰ Moses nou nare theadzü daotu ae posheelabu hinou souzhe hai poloua Aaron ae puhvei nahpoutu maitaoye kavu peie, ae puletao vei sabanü hia kavu peie. Haibüa puhnou puletaoye alia puletao vei sabanü hai soushee loua Mapao hi peithou peie.

³¹ Moses nou Aaron alia puhvei nahpoutu maitao hi paoe, “Mapao nou kharochi peikhai touyu büa sou sü poloua Mapao nou buyu Sahpao vei bomü hinou kholo, ae sheeyu vah panou soure donou posheela peikhai touyu raokhao sülai hinou raokhao poloua toukhaio.

³² Sou ae raokhao lia buyu veishi sü mei deilai-o.

³³ Neletao nou teithe anai koute hai Sahpao vei bomü hinou tapalai moe, daiolouzü neletaoye panou sheeyu vah soure donou naanou soure hai teithe anai loulai.

³⁴ Etao nou zhou soua buyu vah haina hai, neletao vei mahmo soushee loure donou soulo tea Mapao nou chikha peikhai toue.

³⁵ Neletao hai Mapao nou chikha peikhai touyu thaifüa hea-khei anai hai Sahpao vei bomü hinou bulai. Neletao nou sübüa souloumo louzü, neletao hai thai-a bailai. Haibüa soulo tea Mapao nou ahi chikha peikhai toue.”

³⁶ Mapao nou Moses hi chikha peikhai touyu teitei hai Aaron ae puh nahpoutu maitao nou soukhai toupeie.