LEVIMAI LARÜBVÜ 5 - SHEEYU BAIBEL (BSI)

Mah Souyu donou Posheela soure Zhaitao

¹ Mah souyu donou posheela molouzü shiyu sü haitao-e: Chikuyu buh hi mai taliye puhnou ngaoyu moa süyu nasü tave paopeio tea kuyu phaki, puhnou checheyu nasü tave paopei more toulouzü, puh hisü mah bure.

² Mai talinou sümoa naanou hinou sheemoyu na ali hai deilouzü, süsü thaiyu soukhaona dei louzü, puh sü sheemore ae puhnou süna hai sülouyu phaki, puh sü mahwure.

³ Mai talinou Emai va hinou sheemoyu hataralia deilouzü, ae puhnou süsü kaomore tea sülouyu phaki, puh sü mah bure.

⁴ Mai talinou hatarali donou chaachou hai thasho-a nou souwua puh lah süsü kaomore tea sülouyu phaki, puh hi mah bure.

⁵ Mai talinou haibüa mahmo soulouzü, puh sü mah lapalai,

⁶ ae puhnou soumah khaitouyu donou Mapao hi zhaotu moa nghitu kü ali hai pove posheela peilai. Napao nou sünasü puhvei mah donou posheela peilai.

⁷ Mai talinoua zhaotu moa nghitu hai peilou hore toulouzü, puhnou khao ahai moa rahou ahai sü puhvei mah donou Mapao hi pove sheela peilai, süsü ali hai puhvei mah donou posheelalai, ae ali nanou meidei-a posheela soulai.

⁸ Puhnou süsü napao hi pove peilai, ae napao nou arai nasü puhvei mah donou posheela peilai. Puhnou raohou nasü ngu rashawulai, ana pei hai paidepa laimoe,

⁹ ae zhe sü poloua posheelabu hisü kavu peilai, ae lia buyu zhe kukhetao hai posheelabu phi hi zhaokhai peilai. Mah vei posheela sü haibüa soulai.

¹⁰ Süthaisü napao nanou raohou ahai nasü meidei-a posheela peiyu zhai hinou posheela peilai. Haibüa napao nou puhvei mah donou posheela peiyu nasü soupeilai, ae puhvei mah sü khaipeilai.

¹¹ Mai talinou khao ahai moa rahou ahai peilou hore toulouzü, puhnou sou sühcho ali hai puhvei mah donou posheela peilai. Puhnou hai hisü theadzü moa poukai nüvei hai thouhrü laimoe, daiolouzü haisü mah vei posheela peiyu nasü baie.

¹² Puhnou hai nasü napao hi pove peilai, ae napao nou hai nasü Mapao hi posheela peiwure touyu shee soua sou hai bahzü ali poloulai, ae süna hai thoudzü vei posheela soua posheelabu hinou meidei peilai. Haibüa mah vei posheela hai posheela peilai.

¹³ Napao nou haibüa mai livei mah donou posheela hai posheela peilai, ae puhnou puhvei mah sü khaipeilai. Shokhai toua buyu soutao hai thoudzü vei posheela peiyu zhai büa napao veire.

Paozho Khaipeiyu Posheela

¹⁴ Mapao nou Moses hi zhai haitao hai soulo tea peie.

¹⁵ Mai talinou shee-a nou Mapao ye peire nasü sümoa mah souwu louzü, puhnou soumah khaitouyu vei posheela soua Mapao hi chaa hayu zhaotu moa nghitu pou/de ali hai pove peilai. Sünasü muma hai maisou nou ta-a buyu zhai hinou phoupeilai.

¹⁶ Puhnou peire nasü teile macha hinou khapeilou moyu donou sünasü zha kaih hinou zha kai hai thoupuloua nou khapeilai. Puhnou hai nasü napao hi pove peilai, ae napao nou puhvei mah donou zhaotu moa nghitu nasü poa sheela peilai, ae puhvei mah sü khaipeilai.

¹⁷ Mai talinou sümoa Mapao nou souso tea peikhai touyu chikha hai souwu louzü, puh sü mahwure ae puh pei hisü tudeelai.

¹⁸ Puhnou soumahyu vei posheela hai chaa hayu zhaotu moa nghitu pou/de ali hai napao hi pove peilai. Süna vei muma hai maisou nou ta-a buyu zhuloua peilai. Napao nou sünasü puhvei mah donou posheela peilai, ae puh mah sü khaipeilai.

¹⁹ Haisü sümoa puhnou Mapao hi soumah khaitouyu vei posheela nasüe.