LEVIMAI LARÜBVÜ 4 - SHEEYU BAIBEL (BSI)

Sümoa Mahmo Soukhai touyu vei Posheela

^1-2 Mapao nou Moses hi haibüa Israel mai hrülai hi paopeio tea kharochi peie, süolouzü mai talinoua Mapao nou chikha peikhai touyutao hai sümoa soumah louzü haibüa soulo tea paopeie.

³ Napao Peichana nou mah souwua veahoyu hai maikhe mai hi velouzü, puhnou chaa hayu chode ali poloua puhnou soumah khaitouyu vei posheela soua Mapao hi peilai.

⁴ Puhnou chode nasü Mapao nou buyu Sahpao hi taloure bomü hisü pokou loua chode pei hi puh bah deiloua sühinou chode nasü dathawulai.

⁵ Süthaisü Napao Peichana nou souzhe daotuli hai poloua Sahpao kikha taloulai.

⁶ Puhnou puh bahtoutu hai souzhe hisü thaithou süloua sheeyu haosah hisü bakha anai hai kavu peilai.

⁷ Süthaisü puhnou souzhe daotuli hai poloua poukai nüvei meideiyu posheelabu kainghou hisü napeilai. Süthai lia buyu souzhetao hai puhnou Sahpao hi taloure bomü hinou buyu meidei-a posheelabu phi hisü lazü peilai.

⁸ Puhnou chode vei southeatao, lesou hi taoyu southa veishi,

⁹ chithou ahai ae sühinou taoyu theatao, alia sousü veikayutao hai poloulai.

¹⁰ Napao nou southa haitao hai chavei lathao loure donou posheela peiyu phaki posheelabu hinou meidei peiyu bütoua meidei-a posheela peilai.

¹¹ Ana puhnou souheetao, souke veishi, pei, phitao, ae lesoutao hai poloua

¹² puletao nou buyu fühao vakou hi, naanou soua vounai lakhaiyu sheeyu buh hisü popaloua sühinou meideilai.

¹³ Hakinou Israel maisou nou sümoa Mapao nou souso tea chikha peikhai touyu mah souwu louzü,

¹⁴ ae puletao nou soumah khaitouyu hai süloure toulouzü, maisou nou mah vei posheela hai chode ali nou pove peilai. Puletao nou chode sünasü Mapao nou buyu Sahpao hisü pove peilai;

¹⁵ ae süthai-apei maitao nou chode pei sü bah deiloulai ae buh sühinou dathalai.

¹⁶ Napao Peichana nou souzhe hai daotu poloua Sahpao hisü talou loulai,

¹⁷ ae puhnou puh bahtoutu hai zhe hi thaithou süloua sheeyu haosah va hisü bakha anai hai kavu peilai.

¹⁸ Süthaisü puhnou souzhe daotuli hai poloua poukai nüvei meideiyu posheelabu kainghou hisü napeilai, ae lia buyu souzhetao hai puhnou Sahpao hi taloure bomü hinou buyu posheelabu phi hisü lazü peilai.

¹⁹ Süthaisü puhnou southa veishi hai poloua posheelabu hinou mei deiwulai.

²⁰ Puhnou chode haina sü lah puhvei mah donou datha-a posheela peiyu zhai büa soupeilai. Haibüa napao nou puletao vei mah khaipeire donou posheela soupeilai, ae puletao vei mah khesü khaipeilai.

²¹ Süthaisü puhnou chode nasü puletao vei fühao hinou vakou popaloua lah puhvei mahmo donou meidei peiyu büa mei deiwulai. Haibüa maisou vei mahmo khailoure donou posheela hai soulai.

²² Hakinou nuh teidei khoyu mai ali nou sümoa Mapao nou souso touyu mah souwu louzü,

²³ ae puhnou souyu hai mahwure tea puhnou süloure touyu thaio, chaa hayu nghitu ali hai mah vei posheela soua pove sheela peilai.

²⁴ Puhnou nghitu pei sü bah deiloulai, ae süna hai kikhaorü dathaloua poa meideiyu posheelabu reilova hinou datha loulai. Haibüa mah khailoure donou posheela hai peilai

²⁵ Napao nou souzhe daotuli hai poloua puh bahtoutu sü souzhe hi thaithou süloua poukai nüvei meideiyu posheelabu kainghou hisü napeilai, ae lia buyu souzhetao hai posheelabu phi hi lazü peilai.

²⁶ Süthaisü napao nanou southa veishi hai poloua posheelabu hinou chavei lathao-a hrüloure donou posheela peiyu büa meidei-a posheela peilai. Haibüa napao nou nuh teidei khoyu mainou mah vei posheela peiyu nasü puletao vei mah khailu peire donou posheela peilai.

²⁷ Mai talinou sümoua Mapao nou souso tea peikhai touyu chikha pfütho-a mah soulouzü,

²⁸ ae puhnou souyu hai mah-e tea puhnou süloure touyu thai, puhnou puhvei mah donou posheela hai chaa hayu nghitu kü ali hai pove peilai.

²⁹ Puhnou süna pei hi bah deiloua kikhaorü meidei-a posheelayu vei posheelabu reilova nou datha loulai.

³⁰ Napao nou souzhe poloua sühinou puh bah süloua poukai nüvei meideiyu posheelabu vasü na peilai, ae lia buyu zhetao hai posheelabu phi hi lazü peilai.

³¹ Süthaisü puhnou chavei lathao-a hrüloure vei posheela peiyu büa southa teitei hai poloua posheelabu hinou meidei peilai, ae haisü Mapao nou jüpa-e. Haibüa nou napao nou maikhe maivei mahmo donou posheela hai posheela peilai, ae puhnou maikhe maivei mah sü khaipeilai.

³² Hakinou maikhe mainou zhaotu nou mah vei posheela soua pove peilouzü, süsü chaa hayu kü noulai.

³³ Puh bah hai süna pei hi deiloulai, ae süna hai kikhaorü meidei-a posheelabu reilova nou datha loulai.

³⁴ Napao nou souzhe hinou puh bah süloua poukai nüvei meidei-a posheela peiyu buh vasü na peilai, ae zhe lia buyutao hai posheelabu phi hi lazü peilai.

³⁵ Süthaisü puhnou southa teitei hai chavei lathao-a buloure donou posheela peiyu vei zhaotu büa Mapao hi thoudzü vei posheela peiyu posheelabu hinou meidei peilai. Hai zhaibüa napao nou maikhe maivei mah khaipeire donou posheela hai posheela peilai, ae maikhe maivei mah sü khaipeilai.