LEVIMAI LARÜBVÜ 3 - SHEEYU BAIBEL (BSI)

Chavei Lathao-a Buloure vei Posheela

¹ Mai talinou chavei lathao-a buloure donou Ramai hi puhvei kikhaorü nou posheela hai peilai toulouzü, chaa hayu chode moa chokü nou peilai.

² Puhnou posheela peire khaorü na pei hisü puh bah hai deiloulai, sübüa sünasü Mapao nou buyu Sahpao hi taloure bomü hinou datha loulai. Aaron vei tyaosholea hinou veyu napao maitao nou souzhe sü poloua posheelabu kainghou teitei hisü lazü peilai,

³ ae thoudzü vei posheela soua Mapao hi sou haitao hai peilai: lesou hi buyu southeatao,

⁴ chithou alia sühi taoyu southeatao, ae sousü veiyu teitei hai peilai.

⁵ Napao nou sou haitao ae meidei-a posheelayu natao noupu koa posheelabu hinou meidei peilai. Haibüa thoudzü vei posheela hai meidei-a posheela peiyu sü Mapao nou jüpa-e.

⁶ Hakinou mai talinou chavei lathao loure donou puhnou Mapao hi zhaotu moa nghitu nou posheela peilai toulouzü, süsü pou/de moyuma kü-a bailai, ana chaa hayu tyanou peilai.

⁷ Hakinou puhnou zhaotu nou posheela peilai toulouzü,

⁸ puhnou süna pei sü puh bah nou deiloulai, ae posheelayu zhaotu nasü Sahpao kijü hinou datha loulai. Napao maitao nou souzhe sü poloua posheelabu kainghou veishi hisü lazü peilai,

⁹ ae sou haitao Mapao hi thoudzü vei posheela soua peilai: southeatao, phaotsürao hinou taoyu southa veishi, lesoutao hinou buyu southa teitei,

¹⁰ chithou ae sühinou taoyu southeatao, alia sousü veikayutao hai peilai.

¹¹ Sa-a nou naanou soupeiyu napao nanou sou sütao teitei hai thoudzü vei posheela soua Mapao hi posheelabu hinou meidei peilai.

¹² Hakinou mai alinou nghitu nou posheela peilai toulouzü,

¹³ puhnou süna pei hisü puh bah deiloulai, ae sünasü Sahpao kijü hinou datha loulai. Napao maitao nou souzhe sü poloua posheelabu kainghou adai hisü lazü peilai,

¹⁴ ae sou haitao hai thoudzü vei posheela soua Mapao hi peilai: lesou hi taoyu southeatao,

¹⁵ chithou ae sü hinou taoyu southeatao, alia veikayu sousütao hai peilai.

¹⁶ Napao nanou sou haitao hai Mapao hi thoudzü vei posheela soua posheelabu hinou meidei-a posheela peilai. Southea teitei hai Mapao vei-e.

¹⁷ Israel mai talinou southa moa souzhe hai toulai moe, chikha haina hai buh tali hinou hrüa buyuma Israel mainou talai.