LEVIMAI LARÜBVÜ 24 - SHEEYU BAIBEL (BSI)

Meivabvü nasü Lütoua Polai

^1-2 Moses hi Mapao nou kharochi haitao hai Israel mai hi paopeio tea peie: Sahpao hi meivabvü nasü panou taokoute-a buloure donou oliv theadzü veikayu tyanou pove peio.

³ Mapao nou buyu Sahpao hi Vo Sübvü khaitouyu pah hinou haosah haokhai touyu nghoujü hi khaitouyu meivabvü nasü Aaron nou koukhetsü hai meitao koutelai, ae süsü panou thainesho shona koute tao-a bukou telai. Zhai hai nasü vere teile veishi hia soukou telai.

⁴ Aaron nou sana veitya nou soukhai touyu meivabvü khaibu hisü meivabvü khesü Mapao nou buyu Sahpao hinou kaozüsoua meitaoh-a panou buloure donou zhukou telai.

Ramai hi Posheela peire Raokhao

⁵ Neletao nou sou sühcho kiahai poloua raokhao kiahai sü soulo.

⁶ Raokhao sütao hai Mapao nou buyu Sahpao hi sana veitya nou soukhai touyu taibel hisü zha ahai soua zha ali hinou raokhao arou arou hai veakhailo.

⁷ Neletao nou zha alili hisü poukai nüvei thoukhailo, sübüa Mapao hi meidei-a posheela peiyu vei shee soua raokhaotao thaosü khailo.

⁸ Hai nasü Israel mainou vere teile teitei hinou chikha ali soua Soteithe tsüsü raokhao hai Mapao vei nghoujü hi posheela peilai.

⁹ Raokhao hai Aaron ae puhvei nahmaitao vei soulai, alia puletao nou hai sü sheeyu buh hinou toua bailai, daiolouzü hai nasü napao maitaoye donou sheesho-a nou Mapao hi meidei-a posheela peikhai touyu alie.

Kaozü hinou Tudee peiyu Nada Ali

^10-11 Mai ali hai puh puo nou Ejipt mai ae puh pfü nou Israel mai-e, ae Dan maivei khü hinou Dibri nah naotupai Shelomith nahpoutue. Puhnou fühao hinou Israel mai aliye züva loure, ae puhnou züva-a buyu teile hinou puhnou Ramai ye chaawure, südonou puletao nou puhye sü Moses hi nüpoa nou vere.

¹² Mapao nou puh hi daisoulai touyu hai paopeimo koute, puhye sü hukhaki hi bekhaiwure.

¹³ Mapao nou haibüa nou Moses hi paoe,

¹⁴ “Mai sünasü fühao vei vakou sapalo, ae puhnou Ramai ye chaayu hai chouyu mai hrülaiye panou puh pei hi bah deiloua puh hai mahwure touyu vei shaki sü soupeio, süthaisü puhye maisou nou chuh nou deithawuo.

^15-16 Süthaisü maitalia Ramai ye chaayu maiye sü haibüa southalai tea Israel mai hi paopeio. Israel mai talinoua moyuma vakou mainou Israel maiye koa buyu mai taralia Ramai ye chaayu moa paoshiyu maiye sü maisou nou puhye chuh nou deithalai.

¹⁷ “Mai taralia maiye southayu mai sü southalai,

¹⁸ ae mai taralia maivei kikhaorü southa louzü, puhnou süna thaosü zho peilai. Süsü daie paowe toulouzü, hrirai ali hai hrilai ali nou poa lealai.

¹⁹ “Hakinou mai ali nou mai aliye zhizhu pei louzü, puhnou soupei khaitouyu bütoua puh hia soupeilai.

²⁰ Hakinou puhnou maivei rao soucha louzü, puhvei rao-a souchawulai; puhnou mai nghithou ali hai soucha louzü, puhvei nghithou-a ali hai souchawulai; puhnou mai hu dacha louzü, puhvei hu-a dachawulai. Puhnou soupeiyu bütoua puh hia soupeilai.

²¹ Mai talinou maivei kikhaorü ali hai southa louzü, süna thaosü puhnou zholai, ana maiye southa louzü, puh-a southa bailai.

²² Chikha hai nasü Israel mai hrülai hi, ae vakou mainou Israel maiye koa hrüzho-a buyu mai hrülai hia talai, daiolouzü E hai neletao vei Ramai Mapao-e.”

²³ Moses nou haibüa Israel maitao hi paopeiyu thai, puletao nou mai honasü fühao vakou sapaloua puhye sü chuh nou deithawure. Haibüa Mapao nou Moses hi kharochi peikhai touyu thaifüa Israel mainou soupeie.