LEVIMAI LARÜBVÜ 23 - SHEEYU BAIBEL (BSI)

Naanou vei Khonüh

^1-2 Mapao nou Moses hi Israel maitao nou tave jüloua rathoyu phaki, naanou sü haibüa soulo tea nou peie.

³ Neletao nou teithe arou hai lah neletao vei vah khesü soupfülo, ana teithe anai zhou, Soteithe nasü licholo. Soteithe zhou hai Mapao vei-e, neletao nou buh tarali hi buyuma süzhou hai reilo.

⁴ Mapao nou dopa peiyu khonüh, shee-a meimere khesü paopei khaitouyu teile hinou paosüpa peio.

Tachopa Nüh ae Kheih Thoumoyu Raokhao Nüh

⁵ Khouh ngaorai khoukha kiadai zhou koukhe hinou Tachopa Nüh hai Mapao ye tsükhouyu hinou nüpoa talai.

⁶ Teithe kiangou zhou sü Kheih Thoumoyu Raokhao Nüh nütalai, ae teithe anai koute hai neletao nou khei thoua soukhai touyu raokhao ali-a toulai moe.

⁷ Teithe raikai zhou sü neletao nou lah vei vah soumoa tave jüloua ratholai.

⁸ Teithe anai koute hai neletao nou Mapao hi thoudzü vei posheela hai posheela peilai. Teithe anai zhou sü neletao nou lahvei vah soumoa tave jüloua ratholai.

^9-10 Mapao nou neletao hi peikhai touyu teidei hisü neletao nou velou loure toulouzü, ae neletao nou chachi talouzü, chachilou raikayu koupo nasü napao mai hi pfüve peilai.

¹¹ Neletaoye popei loure donou napao nou hai nasü Mapao hi matsü shoyu vei posheela soua posheela peilai. Puhnou hai nasü Soteithe thainesho nou poa sheela peilai.

¹² Neletao nou thou koupo nasü pove sheela peiyu phaki, chaa hayu zhaotsü ali koa meidei-a posheela peiyu sü soulo.

¹³ Süna koa nou southou sühcho ahai hai oliv theadzü thouhrüloua thoudzü vei posheela hai sheela peio. Posheela peiyu hai nasü Mapao nou jüpa-e. Na sütao koa nou rashidzü sühchovou ali-a posheela peio.

¹⁴ Neletao nou Ramai hi posheela peimo koute hai thouthou sü toukhai toulai moe. Zhai hai nasü vere khaphao veishi hi, buh taraki nou buyuma teisa vei chikha ali soua talai.

Chachi louyu vei Nüh

¹⁵ Neletao nou Mapao hi chachilou raikaiyu vei thou koupo pfüve peiyu vei Soteithe zhou nou poa hapta anai vei teithetao hai cholo.

¹⁶ Soteithe anai thaisü, teithe raingou hai phoulo, ae süzhou Mapao hi thouthou hai pove posheela peio.

¹⁷ Kihikha mai hrülai nou raokhao pho ahai ahai poloua Mapao hi pove sheela peilai. Raokhao süsü pho ali hinou kheih thouloua sou sühcho ahai nou souloua chachi louyu vei ngaolou raikaiyu vei posheela soua Mapao hi pove sheela peilai.

¹⁸ Maisou nou raokhao nou koa po ali payu zhaotu anai, chode ali, ae zhaotsü ahai, sütao hai chaa hayu kikhaorü nou pove peilai. Puletao nou sütao hai Mapao hi meidei-a posheela peilai, sünaye koa thoudzü vei posheela ae rashidzü vei posheela hai-a poa sheela peilai. Haibüa nou sheela peiyu vei kainüvei hai Mapao nou jüpa-e.

¹⁹ Süpei hinou nghitsü ali hai mah vei posheela ae po ali payu zhaotsü ahai hai chavei lathao-a hrüloure vei posheela peilai.

²⁰ Napao nou raokhao ae zhaotu ahai hai Mapao hi napao maitao vei zha soua posheela peilai. Posheela peiyu haitao hai shee-e.

²¹ Süzhou teithe hai neletao mai ali-a vah soulai moe, ana tave jüloua ratholai. Neletao vei tyaosholea maitao nou haisü vere teile veishi hia buh tarali hinou hrüa buyuma soupfülai.

²² Neletao nou dou vayu phaki, kainghou kainou hinou buyu routhou khesü valouso, moyuma vachelou moa buyu khesü dakhaikou valouso; sütao hai touhayu mai ae vakou maiye donou shokhai daipeio. Mapao hai neletao vei Ramai-e.

Po Ashu vei Khonüh

^23-24 Khouh arai navei teithe raikai zhou hai neletaoye donou veishoyu teithe ali soua reilo, ae shabe nghoupei louzü tave jüloua ratholo.

²⁵ Süzhou hai neletao nou Mapao hi thoudzü vei posheela hai posheela peio ae vah souso.

Khailupa peiyu vei Teithe

^26-27 Khouh anai navei khoukha kirou zhou hai maikhe maivei mahmo soushee loure donou naanou soua reilai. Süzhou teithe neletao nou halia toulai moe; neletao nou tave jüloua ratholai, ae thoudzü vei posheela sü Mapao hi pove peilai.

²⁸ Süzhou teithe neletao nou vah lia soulai moe, daiolouzü süzhou teithe hai neletao vei mahmo soushee peire donou naanou soulai.

²⁹ Mai taralia süzhou teithe hatouyu maiye sü Ramai vei mai soua popei pulai moe,

³⁰ ae süzhou teithe vah souyu maiye sü Mapao nou southa-a bailai.

³¹ Chikha hai nasü buh tarali hinou hrüa buyuma vere khaphao veishi hinou soupfülai.

³² Khouh sünavei khoukha akü zhou koukhe nou poa khoukha kirou vei koukhe koute hai neletao nou veishoyu teithe ali soua reilai, ae halia toukhai toulai moe.

Sahpao Haoyu vei Nüh

^33-34 Sahpao haoyu vei Nüh hai khouh anai vei khoukha kiangou hinou nüh nütalai, ae teithe anai koute nüh nülai.

³⁵ Teithe arai zhou hai neletao nou vah soumoa tave jüloua ratholai.

³⁶ Teithe anai koute hai neletao nou teithechü sü thoudzü vei posheela sü Mapao hi pove peilai. Teithe acha zhou hai neletao nou tave jüloua ratholai, ae thoudzü vei posheela hai pove peilai. Süzhou teithe hai rathoyu teithe soulai, vah soulai moe.

³⁷ Khonüh haitao hai neletao nou Mapao ye tsükhoua ratho zholai, ae touso vei posheela, meidei-a posheela, thoudzü vei posheela, ae rashidzü vei posheela khesü pove peilai, alia teithe teithe thaifüa souzüyu khesü soupeilai.

³⁸ Soteithe jünou la-a nou khonüh haitao ae khonüh haitao hi posheela khesü teisa nou posheela peiretao, neletao nou chaachou soua posheela peiyutao, ae lah nou jüpa-a posheela peiyutao jünou thoupu khaitoue.

³⁹ Neletao nou chachi louyu thai, khonüh hai nasü teithe anai koute nülai, süsü khouh anai navei khoukha kiangou zhou nou nüh nütalai. Teithe arai na hai veishoyu teithe ali soua reilai.

⁴⁰ Süzhou teithe neletao vei rashibe hinou rashithou veikayu daotu polo, hasüünghou ae süünghou pfüyu süübo poloua neletao vei Ramai Mapao ye tsükhouyu hinou khonüh nasü nütalai.

⁴¹ Khonüh hai nasü teithe anai koute nülai. Chikha hai nasü neletao vei tyaosholea maitao nou vere teile veishi hia soulai.

⁴² Israel mai hrülai nou teithe anai hai sahpao haoloua bulai,

⁴³ sübüa neletao vei tyaosholea maitao-a Ramai nou neletaoye Ejipt teidei hinou sapoa tayu teile hi sahpao hinou hrüe touyu nasü panou süloulai. Puh hai neletao vei Ramai Mapao-e.

⁴⁴ Hai zhaibüa Moses nou Israel mai hi Mapao ye tsükhouyu hinou khonüh haitao sü nüh nülai tea paopeie.