LEVIMAI LARÜBVÜ 2 - SHEEYU BAIBEL (BSI)

Thoudzü vei Posheela Peiyu

¹ Mai talinou thou nou poa Mapao ye posheela peilai toulouzü, puhnou süna hai deithou sou daloulai. Sou hisü oliv theadzü ae poukai nüvei nou thouhrü loua

² Aaron vei tyaosholea hinou hrüveyu napao maitao hi pove peilai. Napao nanou sou bazüphou ali poloulai ae theadzü alia poukai nüveitao sü poloua Mapao hi posheela peiwure touyu shee soua sütao hai posheelabu hinou meidei peilai. Haibüa meidei-a posheela peiyu hai Mapao nou jüpa-e.

³ Süthaisü posheela peikhai touyu thoutao hai napao veire, haitao hai Mapao ye posheela peikhai touyu hinou lia buyu thoutao-e, südonou hai sü sheesha toure.

⁴ Neletao nou mei hinou raokhao khaoloua pove posheela peilai toulouzü, süna hai kheih thoumoyu sou veishoyu tyanou theadzü thouhrüloua nou khaolai, moyuma raokhao khaokhai touyu phao hisü oliv theadzü nou napeilai.

⁵ Neletao nou thoudzü vei posheela peiyu hai raokhao lee hinou khaoyu tyanou posheela peilai toulouzü, süna hai kheih thoumoa theadzü nou thouhrüloua peilai.

⁶ Süna hai soudesasa loua theadzü lathoulo, sübüa posheela peio.

⁷ Neletao nou thoudzü vei posheela peiyu na hai raokhao khoyu tyanou peilai toulouzü, sou veikayu tyanou theadzü thouloua soulo.

⁸ Neletao nou Mapao ye posheela peiyu hai nasü napao mai hi pove peilai, ae napao maitao nou hai nasü posheelabu hi pokou peilai.

⁹ Napao nanou raokhao daotu poloua Mapao hi posheela peiwure touyu shee soua puhnou sütao hai posheelabu hinou meidei peilai. Haibüa meidei peiyu kai nüvei nahai Mapao nou jüpa-e.

¹⁰ Shokhai toua buyu posheela natao hai napao vei zha-e, daiolouzü haitao hai Mapao hi posheela peiyu hinou popa khaitouyu donou sheere.

¹¹ Neletao nou Mapao hi thoudzü vei pove sheela peiyu hisü kheih thoulai moe; neletao nou kheih moyuma laivoudzü koa nou Mapao ye thoudzü vei posheela hai peilai moe.

¹² Neletao nou potei hi chachi lourai kayu thou hai Mapao ye pove posheela peilai, ana sütao hai posheelabu hinou mei deilai moe.

¹³ Neletao nou thou pove sheela peiyu teitei hisü tai thoulo, daiolouzü tai hai nanou neletao nou koa Ramai hi vo soukhai touyu vei shee nasü panou soulai. (Neletao nou thoudzü vei posheela peiyu teitei hisü tai thoulo.)

¹⁴ Neletao nou potei hi chachilou raikayu thou hai Mapao hi posheela peiyu phaki, thou sü saloua nou pove peio.

¹⁵ Sühisü oliv theadzü thouhrülo ae poukai nüvei hai thoulo.

¹⁶ Napao nou thou sakhai touyu nasü daotu poloua theadzü ae poukai nüvei noupu ngaimore donou meidei-a posheela peilai, haisü Mapao hi meidei-a thoudzü vei posheela peiyu nasüe.