LEVIMAI LARÜBVÜ 15 - SHEEYU BAIBEL (BSI)

Pfüphao hinou Sheemoyu Dzü Kütayu phaki Soupfüre Zhaitao

^1-2 Israel maiye panou soupfüre zhai haitao hai Mapao nou Moses ae Aaron hi peie. Mai talinou phaodzü koure toulouzü süsü shee more.

³ Phaodzü hai kükoua buki moa baiyuma süsü shee more.

⁴ Puhnou züyu züphao moa puhnou buyu buh veishi hai shee more.

⁵ Mai talinoua puhvei züphao deilouzü,

⁶ moa puhnou buyu buh tarali hia bulouzü mai sünanou puhvei sabanü hai dzü shaowulai ae dzü khüloulai, ae süzhou koukhe koute hai puh sü sheelai moe.

⁷ Pfüphao hinou hashi ta-a buyu maina vasou deiyu mai talia puhvei sabanü hai dzü shaolai ae pfüphao teitei nou dzü khüloulai, ae süzhou koukhe koute hai puhsü sheelai moe.

⁸ Hashi ta-a buyu maina nou sheeyu mai tarali va hi taidzü süshore toulouzü mai süna nou puhvei sabanü hai dzü shaolai ae dzü khülai, sübüa puhsü koukhe koute hai sheelai moe.

⁹ Hashi ta-a buyu mai nanou buyu buh veishi hai shee more.

¹⁰ Mai talinoua hashi ta-a buyu mai nanou buyu buh hi bulouzü puhsü koukhe koute hai shee more. Mai talinoua hashi ta-a buyu maina nou buh buyu nasü potare toulouzü puh hai puhvei sabanü dzüshaolai ae dzü khüloulai, ae koukhe koute hai puhsü shee more.

¹¹ Phaodzü ta-a buyu maina nou puh bah dzütei moa mai taliye deilouzü, puhnou puhvei sabanü sü dzüshaolai ae dzükhü loulai, ae koukhe koute hai puhsü sheelai moe.

¹² Hashi ta-a buyu mai nanou nailee taralia deilouzü nailee sünasü daphewulai, ae puhnou süü khaosao taralia deilouzü, sünasü dzü khüshee loulai.

¹³ Hashi ta-a buyu mai nanou veiloure touyu thai, teithe anai koute kho-a bulai, süthaisü puhnou puhvei sabanütao hai dzü shaolai ae dzünghou dzü nou dzükhü loulai, ae puhsü naanou hinou shee loulai.

¹⁴ Puhnou teithe acha zhou sü khao ahai moa rahou ahai sü poloua Mapao nou buyu Sahpao bomü hinou napao maiye pove peilai.

¹⁵ Napao nou ali hai mah vei posheela soua ae alina hai meidei-a posheela soua posheela peilai. Hai zhaibüa sousheeyu vei naanou sü soulai.

¹⁶ Mai ali nou phaodzü palouzü, puhsü pfüphao veishi nou dzü khülai, ae koukhe koute hai puhsü sheelai moe.

¹⁷ Sah moyuma souhee nou soukhai touyu na tarali hi phaodzü taore toulouzü, sünasü dzü shaolai, ae koukhe koute hai sheelai moe.

¹⁸ Maipfüpuo koa sabu sazü louzü, puhai mai ahai khinou pfüphao veishi hai dzü khülai, ae puhai sü koukhe koute hai sheelai moe.

¹⁹ Naotumai ali nou khouh-khouh vei zhe tayu phaki, honapai hai teithe anai koute sheelai moe. Mai taralia süteile hi honapaiye deilouzü, mai süna hai koukhe koute shee more.

²⁰ Honapai nou zhe ta-a buyu phaki hatarali hi chobu louzü moa deilouzü na sünasü shee more.

^21-23 Hakinou mai talinou honapai vei züphao moa honapai nou buyu buh taralia deilouzü, puhvei sabanütao hai dzüshao loulai ae dzü khüloulai, ae puh sü koukhe koute hai shee more.

²⁴ Honapai nou zhe ta-a buyu teile hinou mai talinoua sabu sazü louzü, puhsü honapai vei shee moyu laloure, südonou puhsü teithe anai koute hai shee more, ae puhnou züyu züphao hai-a shee more.

²⁵ Naotumai ali nou khouh-khouh hi zhe ta-a buyu teile jünou la-a talouzü, zhe tayu teile koute hai honapai sü shee more.

²⁶ Teile süphaki, honapai nou züyu züphao moa buyu buh veishi sü shee more.

²⁷ Mai talinoua shee moyu natao hai deilouzü, puhsü shee more ae puhvei sabanütao hai dzüshao loulai ae pfüphao hai dzükhü loulai; puhsü koukhe koute shee more.

²⁸ Honapai nou zhe tayu baire touyuma teithe anai koute hai kholai, süthainou honapai hai naanou hinou sheelai.

²⁹ Teithe acha zhousü honapai nou khao ahai moa rahou ahai poloua Mapao nou buyu Sahpao bomü hinou napao mai hi pove peilai.

³⁰ Napao nou rahou ali hai mah vei posheela soua ae raohou ali hai meidei-a posheela peilai. Hai zhaibüa honapaiye soushee peiyu vei naanou hai soulai.

³¹ Israel mainou buyu fühao toutsü hinou buyu Mapao vei Sahpao nasü puletao nou shee moa souzhai more donou Mapao nou Moses hi soutaosoua paopi peie. Hakinou puletao nou souzhai louzü puletao hai thai-a bailai.

³² Mai ali nou puhvei pfüphao hinou hashi ta-a bulouzü, moa phaodzü kou louzü,

³³ naotumai ali nou khouh-khouh vei zhe talouzü, moa shee moyu naotumai aliye sazü sabu louzü peikhai touyu zhai haitao thaifüa talai.