LEVIMAI LARÜBVÜ 12 - SHEEYU BAIBEL (BSI)

Naotumai Alinou Nah Nayu phaki Sousheere Zhaitao

^1-2 Mapao nou Moses hi Israel maiye panou soupfüre donou zhai haitao hai peie. Süolouzü naotumai ali nou nahpoutu ali nalouyu thai, naotumai ali nou khouh-khouh hi zhe tayu zhai büa puh sü teithe anai koute hai naanou hinou shee moe.

³ Teithe acha zhou hai nahpoutu nasü saloua hee bidewulai.

⁴ Süthaisü honapai nou zhe takhai touyu donou teithe shiasü koute hai sousheeyu vei teithe soua reilai; honapai nou teithe haitao chemo koute sheeyu nalia deilai moe, moa sheeyu Sahpao hisü velai moe.

⁵ Naotumai ali nou nah naotumai ali nalouzü, honapai hai khouh-khouh hi zhe tayu zhai büa honapai hai naanou hinou teithe kiadai hai sheelai moe. Süthaisü honapai nou zhe takhai touyu donou sousheeyu teile hai teithe rairouarou loulai.

⁶ Honapai nou naanou hinou sousheeyu teile chere toulouzü, nahpoutu moa naotu baiyuma honapai nou Mapao nou buyu Sahpao bomü hisü meidei-a posheela peire donou po ali payu zhaotu ali ae mah vei posheela peire donou khao moyuma rahou ali hai napao hi pove peilai.

⁷ Napao nou puhvei posheela nasü Mapao hi posheela peilai, ae honapai vei sheemoyu khesü naanou soua soushee peilai, süthaisü honapai hai shee-a bailai. Hai zhai büa naotumai ali nou nah nayu thai sousheelai.

⁸ Hakinou naotupai nou zhaotu hai peilou hore toulouzü, khao ahai moa rahou ahai hai meidei-a posheelare donou ae mah vei posheela peire donou napao hi pove peia bailai. Süthaisü napao nou puhvei sheemoyu nasü soushee peire donou naanou soupeilai ae honapai hai naanou hinou shee-a bailai.