LEVIMAI LARÜBVÜ 11 - SHEEYU BAIBEL (BSI)

Toulou Veiyu Soukhaonatao

¹ Mapao nou Moses ae Aaron hi chikha haitao hai

² Israel maiye panou soupfüre donou peie. Deiphao nou hrüyu hrikhaona haitao hai toulou vei-e:

³ Phimou ahai pfüa nou to layu khaonatao hai neletao nou toua bailai,

^4-6 ana neletao nou racho, zhaonghi moa lazhao hai toulou shi-e. Soukhaona haitao hai to lawe, ana phimou ahai pfümoe, südonou haitao hai shee moyu khaona baie.

⁷ Vosou hai toulai moe, daiolouzü haina hai phimou ahai bue, ana to la-a moe, südonou neletaoye donou haisü shee moe.

⁸ Neletao nou soukhaona haitao hai toulai moe, ae haitao vei thaiphao hai neletao nou dei-a deilai moe, daiolouzü neletaoye donou haitaosü shee moe.

⁹ Dzü hinou buyu kha taralia shouh-mi pfüyu ae khakao pfüyu veishi hai neletao nou toua bailai,

¹⁰ ana dzü hinou hrüa shouh-mi pfümoyu ae khakao pfümoyu teitei hai neletao nou toulou shi-e.

¹¹ Hrikhaona sütao hai neletaoye donou shee moe. Neletao nou sütao hai toulai moe, moyuma sütao thaiphao hai dei-a deiso.

¹² Dzü hinou buyu hrikhaona taralia shouh-mi pfümoyu ae khakao pfümoyutao hai neletao nou toulai moe.

^13-19 Tei hinou zhaoyu raohou haitao hai neletao nou toulai moe: leche, lekhana, tuturu, rashopeiki, voka, shehoudu (ostrik), dzüraohou, storks, heron, pelicans, kormorants, houphisoh moa bailou.

²⁰ Shouh pfüyu khaongao, phibao adai pfüa tayu teitei hai shee moe,

²¹ ana shouh pfüa phibao adai nou dei hinou chopoa tayu khaongaotao louzü toua bailai.

²² Neletao nou khazü, hairakiki, ae khaikhai tyahai toua bailai.

²³ Ana shouh pfüyu khaongao kukhetao, dei hinou routayu khaongaotao louzü shee moe.

^24-28 Mai taralia soukhaona haitao vei thaiphao deiyu mai hai koukhe koute sheelai moe: phimou ahai pfüa to lamoyu soukhao veishi, ae phibao adai pfüa phitsü bahtsü pfüyu khaona teitei hai shee moe. Mai talinoua haibüyu soukhaona vei thaiphao pota louzü, puletao vei sabanü hai dzü shaolai, ae puletao hai koukhe koute sheelai moe.

^29-30 Deiphi hinou zhapoa tayu khaona haitao hai shee moe: zhaotsütsü, zhao, zhaokhi, krikrikhao/keilipao.

³¹ Mai talinoua khaona haitao hai deilouzü moyuma khaona haitao vei thaiphao hai deilouzü puhsü koukhe koute sheelai moe.

³² Ae khaona haitao vei thaiphao sünou hana tarali hia dekou loure toulouzü na sütao hai sheemoa bailai. Süsü süü nou soukhai touyu na, sabanü, souhee, soukousah, paikhao ae natarali hia dekou loure toulouzü na sünasü dzü hi pothoulo, na sünasü koukhe koute shee laimoe.

³³ Hakinou thaiphao nasü nailee hi deloure toulouzü, lee hi buyu na veishi hai sheemoa bailai, südonou nailee nasü daphe laiwo.

³⁴ Touso tarali hia nailee sühinou dzü hai poa lathoure toulouzü touso sütao hai shee moa bailai, ae ke louveiyu dzü sütao-a sheelai moe.

³⁵ Hana tarali hia pao-a buyu khaona haitao vei thaiphao nou dekou loure toulouzü sütao hai shee moa bailai; süsü hakho touyu thao moa meibvü nasü shee moa bailai, südonou sünasü daphe sasaloua poa shilaiwo,

³⁶ ana dzünghou moa dzübvü louzü shee-a bailai, anou na kukhe louzü thaiphao nou deiyu veishi hai shee moa bailai.

³⁷ Hakinou thaiphao na hai poa vuthoure thoutai hi delouyuma thoutai louzü shee-a bailai.

³⁸ Ana thoutai hai dzüpfü khaitoua buyu hinou deloure toulouzü thoutai sütao hai shee moa bailai.

³⁹ Toulou veiyu soukhaona tarali hai thaire toulouzü, ae süna thaiphao hai mai tarali nou deilouzü puh hai koukhe koute sheelai moe.

⁴⁰ Ae mai tarali nou sou süna hai tou loure toulouzü, puh sü puhvei sabanü hai dzü shaolai, ana koukhe koute hai sheelai moe; mai taralinoua thaiphao hai polouzü, puhvei sabanü hai dzü shaowulai, ae koukhe koute hai sheelai moe.

⁴¹ Dei hinou ngaotayu khaona taitya teitei nou shee moe, sütao hai toulai moe.

⁴² Pou nou routayu, phibao adai pfüyu, moa phibao alao pfüa tayu khaonatao hai toulai moe, süsü shee moe.

⁴³ Haibüa shee moyu taraliye panou neletaoye shee moyu sü souso.

⁴⁴ E hai neletao vei Ramai Mapao-e, südonou neletao hai shee-a bulo, daiolouzü E hai shee-e.

⁴⁵ Neletao vei Ramai soure donou neletaoye Ejipt teidei hinou sapa peiyu Mapao nasü E-e. Neletao hai shee-a bulo, daiolouzü E hai shee-e.

⁴⁶ Haitao hai hrikhaona ae raohou, ae dzü hinou hrüyu khaona alia dei hinou lüa tayu khaonatao donou chikha soupeikhai touyutao-e.

⁴⁷ Neletaoye panou sheeyu ae shee moyu, toulou veiyu ae toulou shiyu hrikhaona taoye panou süku loure donou peikhai toue.