KOPAODOUWO 8 - SHEEYU BAIBEL (BSI)

¹ Thaonou tsüveiyu mai liye raiwe? Alia thaonou haitao ko paola peilou süe? Maili vei tsüavei nanou puh pah hai souva peiwe, alia pah zhia buyu zhu hai-a hata baiwe.

Veo vei Chi Zülo

² Veo nou paoyu chi zülo, daiolouzü nenou Ramai nghoujü nou sheeyu chaachou souwure.

³ Puhnou jüpa moyu ali soulouzü, puh nghoujü hinou tavailo, ponasouo, daiolouzü puhwo puhnou jüpayu nasü soua bailai.

⁴ Daiolouzü veo vei chipao nou duka-e alia thaonou puh hi “Ne daie souwe?” tea paolou süge?

⁵ Kharochi züyu maili sü soushi peiyu ngaolai moe, alia tsüvei maili vei lenou teile ae ludu nasü süloulai.

⁶ Daiolouzü hali hala hai lahkuku vei teile ae ludu bue, maivei veahoyu hainou puh pei süshoa buyuma.

⁷ Daiolouzü puhnou daie palai tiyu sümoe, kabüa palai tiyu puh hi thaonou paopei lousüe?

⁸ Mai linoua teikhaiye khuloure khouko hae, moa athai teithe pei hi khouko hae. Sou-reih souyu hi maiye phapeiyu hae, sübüa ashi souyu maiye sü ashi nanou phapei laimoe.

Mai Ashimai ae Achechemai

⁹ Hai teitei hai Enou teinghi khenou atsüle pei-a zhukhai toure, maili nou tudee soua mai kukhe taoye souveayu hai.

¹⁰ Süthai Enou mai-ashi maiye daovuyu ngaoe; puhtao sü mashee buh hinou tapa taloua buwe, alia nuhdu hisü puhtao nou sübüyu vanou paoshoa buwe. Hai-a hamako baie.

¹¹ Vah ashi souyu nahai thashoa kaozü soupeimo vanou maikhe mai le hisü ashi soure donou souda chewua bure.

¹² Mah mai alinou vu kaili ashi soua puh hrü hai hrüshoa bue, ana Enou süwe Ramai ye piyu mai donou zouvei-a bailai, daiolouzü puhtao sü puh nghoujü hinou pi-a buwe.

¹³ Ana süsü mai ashi maiye donou veilai moe, puh hai khungu ali büa puh hrü hai sholouhoe, daivanou tilouzü puhsü Ramai nghoujü hinou piyu hae.

¹⁴ Deiphao haihi ta-a buyu zhai hai hako baie, daiolouzü acheche mai taoli hai ashimai nou vealaiyu nanou ngaolou baiwe, alia ashi soumai nou acheche mainou ngaolaiyu buu ngaoloua baiwe. Enou paoe, hai-a hako baie.

¹⁵ Südonou Enou savalo tea paowe, daiolouzü maiye donou teinghi khehnou tousoyu ae lah savaloure hai likhei baimoa veiyu na lia hae, daiolouzü teinghi khe hi hrüa buki, Ramai nou puhye peikhai tiyu vahtao hai teroua soulai.

¹⁶ Enou tsüavei süloure donou, ae deiphao hi mai livei nghithou nou hea-khei ziyu ngaolou hoa soupfüyu vahtao ngaoloure donou tsüchoe;

¹⁷ süthaia Enou Ramai vei vah teitei nou ngaoe, süolouzü teinghi khe hi souyu vahtao hai mainou sülouhoe. Tyali soua mainou terou souyuma, sühsü puhnou phoupalou laimoe, tsüvei maili nou süwe tea khayuma, puhnou sühsü phoupa louhoe.