KOPAODOUWO 6 - SHEEYU BAIBEL (BSI)

¹ Enou teinghi kheh hinou ashili ngaoe, alia sünanou mai pei hinou süsho-a bue.

² Mai ali hisü Ramai nou kini, paopu souyu, alia tsükhouyu hai pei-a pa puhvei jühpa alia chemoyu ha-a bue, ana Ramai nou puhye sütao poa sava loure khouko peimoe, sütea shikhomo mai linou sütao sü poa sava-a bue; haihai-a hamako ali baie; süsü choro souyu sounou alie.

³ Mai alinou nahmai kaihli nalouyuma, po alao hrüyuma, süthemoa puhvei po taovei teithe alaoyuma, ana puhnou hrüvei havei taosü poa sava moyukou-o, alia poa daovure buh hayukou-o, Enou paoe, teile chemoa nayu nahmai ali nou puh jünou veipue.

⁴ Daiolouzü sünasü hako hinou vewe alia teizhi hi loutare ae teizhi nou puh zhih sü holoure;

⁵ sübai moa sünanou teinghi-a ngaokhai toumoe, moa hataralia sükhai timoe; ana puhnou ngaolou hoyu soyu nasü ngaoloure.

⁶ Puhnou po thethe hrüyuma - haveilia poa sava loumoyu thaio, puhai mai ahai khinou buh ali hi vekhi bailai movu?

⁷ Mai alinou terouyu hai puhvei müye donoue, ana puhvei müzo hai rukhalou moe.

⁸ Daiolouzü tsüvei nanou voyupu jünou daie veipuyu bue? Alia touha mai linou mai nghoujünou kabüa talai tiyu zhai süyu vanou daie viyu bue?

⁹ Nghingao nanou ho-hai jüpayu jünou veipu hie; haihai-a hamako baie alia teikhaiye thaihuyu ali baie.

¹⁰ Hatara lia vepa-a bunasü rai-a zhih sapeiwure, alia puh jünou khouyu mailiye puhnou shaova louhoe tiyua rai-a süa bue.

¹¹ Chipao paopu khaie, komoyu hai-a pua baie, alia mai nanou veipuyu sü daie bue?

¹² Daiolouzü maili donou puhvei khungu büa ta-a buyu hamako vei hrü teile jütea buyu hi puhye donou daie veiyu bue tiyu thaonou süwe? Daiolouzü puh thailo, teinghi kheh hi daie bulai tiyu thaonou paolousüe?