KOPAODOUWO 4 - SHEEYU BAIBEL (BSI)

¹ Süthai-a teinghi khehnou souveayu vahtao Enou ngao-e. Zhukhaio, vealai maitao vei nghidzü, alia puletao ye souva peire mai aliro hare! Puhtaoye souveayu maitao hilosü khouko bue, alia puletaoye souva peire mai ali-a hae.

² Enou tsüchoe, thaitayu thaimai nou hrihyu ahri maitao jünou rako veire;

³ Ana puhai haikhei jünou rako veipuyuo, hrüve moyu, alia teinghi khehnou ashi souyutao ngaomoyu na-e.

⁴ Süthai Enou ngaoe, süolouzü maili vei terouyu alia dokai teitei hai puh kinapa vei thainüyu vanou pawe. Haire-a hamakoe alia teikhaiye thaihuyu ali baie.

⁵ Avo mainou puh bah khailoua lahvei vasou touwe.

⁶ Nasha-a bahli ali buyu hainou teroua teikhai thaihu-a bah ahai buyu jünou veipu hie.

⁷ Süthai-a teinghi khehnou Enou hamako ngaoe:

⁸ Mai alisü puh nah-a moa thaihou-jürai-a hae, ana puhvei terouyu hai akhai hae, alia puh nghithou hai kini nou ngaoposhu khayu hae. “E hai thaoye donou terou soua lahye savayu ali-a peimoa buwe” teanou puletao lah noue. Hai-a hamako baie alia lesa moyu vah ali baie.

⁹ Ali jünou ahai-a veipu hie, daiolouzü puhmai vei terouyu vei buu aveih ali bue.

¹⁰ Daiolouzü mai alinou kaolouyuma, ali nanou puh khamai naye sü phaola peilai; ana lah likhu buyu nasü daizho vealaisa, puhnou kaolouyu ki mai ali-a puhye phaola peiloure mai bulai moe.

¹¹ Süthai-a, mai ahai koa zükhaie puh haisü lüh-a baiwe; ana lah likhu buyu nasü kabüa soulü loulai?

¹² Alia mai alinou lah likhu buyu na jünou ngalouyuma, mai ahai louzü puhye dulousüe. Raipo asü nou khyayu rai hai theashoa delumoe.

¹³ Touhayu tsü-avei nahlemai alinou voyu maichi polai moyu veo tsümai na jünou veipu hie.

¹⁴ Mai linou hukhaki hinou pa vebu hi bulou süe, puh hai touha sho-a veteidei hinou naveyuma.

¹⁵ Enou hrüyu, teinghi khehnou lüa laiyu veishi ngaokhaire alia nahlepu süna nou pa veobu hi thaore na-a ngaore.

¹⁶ Puhnou süthaiyu maitao hisü akhai hae; ana puh jünou na-a velaiyu maitao nou puh pei hi valai moe. Vuhzünou haina-a hamako baie alia teihkhaiye thaihuyu baie.