KOPAODOUWO 11 - SHEEYU BAIBEL (BSI)

Tsüveiyu Mainou Souyu Vah

¹ Nevei raokhao sü dzühi laithouwuo, daiolouzü nenou teithe taoli thai ngaoda khailou bailai.

² Nevei kini buyu taohai zha anai moa acha soua dade khailo, daiolouzü deiphao haihi dai shili palaisa tiyu nenou sümoe.

³ Teihao nou chaotei loua deiphao va teirü koupeiwe; süübe linou kheko moa reikou kaolou yuma, süübe sünanou kaolouyu buh hisü bubailai.

⁴ Teikhai zhai zhu-a bunasü thoutai vuhthou khailou laimoe; alia teihao vanou tsücho-a bunasü chachi laimoe.

⁵ Nenou kabüa nahbvü hinou nahtu ali hai ssühea loue tiyu sümoyu büa, hali hala soupeio Ramai vei vah sü nenou sümoe.

⁶ Shona nou thoutai vuhlo, alia koukhe-a ne bah thaowuso; daiolouzü nenou sümoe kananou veilaisa tiyu, haina ho tenasa, moa ahai kheinou raibüa veilaisa.

⁷ Ava sü jühmouwe, alia teinghiye zhuyu hai nghithou donou vashoyu lie.

⁸ Mai linou po alao hrülouzü, puhye panou sütao teitei hinou savalo; ana puhye pa teizhiyu teithe hai-a alao bue tiyu tsücholo. Velaiyu teitei hai hamako baie.

⁹ Oh nahlepunare, ne nahle-a bukinou lesalo, alia nevei nahleyu teithetao vanou neye sü panou ne le sousavalo; nenou jüpayu ludu alia nghithou nou ngaoveiyu hisü takhaio. Ana haisü sülouo, akhai hisü hai teitei vanou neye Ramai nou chikulai.

¹⁰ Nele hinou jüphiyu hai souhawuo, alia ne pfüphao hinou souhyu nasü polaiwuo; daiolouzü khelouyu ae nahleyu-a hamako baie.