KOPAODOUWO 1 - SHEEYU BAIBEL (BSI)

Emai Hrü hai Hamako baie

¹ Kopaodouwo, David nahpoutu, Jerusalem hi veo vei chipao sü haitaoe.

² Hamako vei hamako tea Kodouwo nou paoe. Hamako vei hamako! Hali hala hai hamako baie.

³ Maili nou teinghi khenou vah terou-a souyu hai dai patouyu bue?

⁴ Khaphao ali tawe, alia khaphao ali vewe, ana deiphao louzü teisa nou bubaie.

⁵ Teinghi pawe alia teinghi louwe, alia puhnou payu buh hi thashoa tabaiwe.

⁶ Teikhai nou kheko hükouwe, alia reikou haopoa khewe; haokhai khai-a teikhai nou tawe, alia puh vei bolu hisü dakhai louta baiwe.

⁷ Reitou teitei nou zaidu hi külouwe, ana zaidu sü phoutu moe; reitou nou küyu buh hisü, puhtao nou küpu dakhaiwe.

⁸ Hali hala hai veayu nou phouwe; mai ali nou süsü paohao louhoe; nghithou nou ngaoyu taonou khawumoe, nyou-a chouyu taonou phouwu moe.

⁹ Daoh nou daibüa bue sünasü haithai-a sübüa bua bailai, alia haithai soulaina-a daie souwure sünasü baie, teinghi kheh hinou halia ashu hae.

¹⁰ “Zhukhaio haihai ashu-e” tea paolou veiyu na aliro buhae? Sünasü maiphaophao jünou bure, Etao hrüvemo jünou rai-a bure.

¹¹ Daorai maitaoye lichoyu hae, na-a vere maitao-a puletao jünou na-a nou vere maitao nou lichoyu hai bulai moe.

Kopaodouwo nou Puh Hrü hinou Vedaoyu

¹² Kopaodouwo, E hai Jerusalem hinou Israel mai pei hi veo soure.

¹³ Alia raki kheh hinou souyu vahtao hai tsü-avei nou poa phoupa loure donou atsüle hai-a peie; maiye pa zohashoa buyu hai, puhtaoye Ramai nou peiyu lesa moyu vah li-e.

¹⁴ Teinghi khehnou souyu vah lilihai Enou ngaowure; alia zhukhaio, hai teitei hai hamako baie, ae teikhaiye huhyu ali baie.

¹⁵ Khiyu nasü souzü louhoe, alia hayu nasü cholou shie.

¹⁶ E lah ahi paoe, “E hai tsüvei shore, ajünou rai-a Jerusalem hi buyu mai hrülai jünou la-a tsüveipuhie; alia tsüveihyu ae tsüsüyu hai daie touyu Enou süloue.”

¹⁷ Alia voyu ae vavayu süloure donou atsü peie. Enou süloue süolouzü, hai hai-a teikhaiye ngouyu baie.

¹⁸ Daiolouzü, tsüvei alao buyu hisü rarou hai-a alao bue, alia tsüsü pupayu puh hisü leveayu hai-a pupa baiwe.