KOLOSSEMAI 4 - SHEEYU BAIBEL (BSI)

¹ Paopumaitao, neletao vei Paopu ali rakihi bue touyu sü süpoa neletao vei qilataoye kaozüa ea veitoua zhupeio.

Doupeiyutao

² Veachipao hinou thaokhaimoa khoua bulo, alia Ramai hi kalo pao-a veachi paoyu hisü leikeilo.

³ Alia Ramai nou Eletao hi Khrista vei kheitsüna vanou puh chipao paodou loure teile kaozhou avei peiloure donou Ehye donou-a veachi paopeio. Daiolouzü süna donou Esü chu hukhahi buwe.

⁴ Südonou Enou paozüa buyu sübüa, chipao süsü sheetoua paoloure donou veachi paopeio.

⁵ Neletao hi buyu teile kaozhouvei teiteisü soutaosou seia lüloumomaitao hisü kaishoa zhai tangaopeio.

⁶ Neletao nou kazhaibüa maikhemai hrülaihi chila peizüe touyu süloure donou neletao chipaosü taikhü büa panou teisanou kaivei sholo.

Akhai Khurüyu Chidoh

⁷ Tukhika nou Avanou ko teiteisü neletao hi paopeilai; puh hai leshiyu thaihou jürai, checheyu kuvahmai ea Mapaowo vei kuvah hinou koa kilai souyu mai alie.

⁸ Süvanou Enou puhye Eletao hrülai hai kazhaibüa hrüsa touyu sü neletao hi paongao peiwu-a neletao lesü souva-sousa peiloure donou neletao hi seivewe.

⁹ Puhye koa neletao mehi buyu leshiyu ea checheyu thaihou jürai Onesimas-a laiwe. Buh haihi pa-a buyu teitei vanou puletao nou neletao hi paopeilai.

¹⁰ Eye koa hukha hinou buyu Aristarkha nou neletao hi khurüyu chidoh seiwe, alia sübüa Barnabas tao Mark nou-a seiwe. (Puh vanou raikinou neletao hi Enou paopeiwuyu büa— puh hai neletao hi velouzü puhye sü sasa-a shepeio.)

¹¹ Jastas tea kuyu Joshua nou-a khurüyu chidoh seiwe. Hee rodeyu maitao hronou mai asü haitao likheinou Eye koa Ramai Vedei donou vah soubaie, alia puletao nou Eye sü alaosou souva peiwe.

¹² Neletao me hinou ali soua buyu ea Khrista Jisu kilai ali soua buyu Epaphras hinou khurüyu chidoh seivewe. Puhnou neleye panou Ramai leli teitei hinou liche-a ea chekhoua laloure donou lenoushoa veachi pao-a teisanou neletaoye lichowe.

¹³ Daiolouzü puhnou neletaoye donou, alia Laodikia hi ea Hierapolis hi buyu maitao donou te-a vah souwe touyu sü Enou zhopaoh soupei lousüe.

¹⁴ Eletao nou leshiyu Pou-apeio Luk ea Demas nou neletao hi khurüyu chidoh seiwe.

¹⁵ Eletao vei khurüyu chidoh hai Laodikia hi buyu thaihou jüraitaohi, Nimpha ea puh kihinou vedzüa buyu lüloumaime hi peikhaio.

¹⁶ Neletao nou seiko haina phoucheyu thaisü, hainasü panou Laodikia hi buyu lüloumaimeye-a phou vuzükhaio; alia neletao-a Laodikia hi buyu thaihou jüraitao nou neletao hi seive peilaiyu seiko nasü phouwo.

¹⁷ Alia Arkippa hi, “Mapaowo kuvah donou nehi peikhai touyu vah nasü souvete loure zhutou loukhaio” tea paopeio.

¹⁸ Paul Ahinou khurüyu vei chidoh seivewe. Haisü lah Abah vuzünou rüwe. Eye phukhai touyu sü lichopeio! Ramai zhuveasü neletaoye koa buloutheo.