JOSHUA 9 - SHEEYU BAIBEL (BSI)

Joshua ye Gibeon Mainou Da-a nou Lalouyu

¹ Jordan vei teinghi loulo nou buyu vemai hrülai, deichi alia deikho hinou buyu mai-a, alia Zaidu pehinou poa kouh Lebanon vei pahilo buyu Hit mai, Amor mai, Kanaan mai, Perizz mai, Hiv mai alia Jebus mai teitei nou haihai süloukhaie,

² Puletao mai hrülai nou louhrüloa Israel mai ye reih soure donou le ali souloua ve jüloure.

³ Ana Gibeaon mai nou Joshua nou kabüa Jeriko alia Ai mai ye souhawure touyu süloukhaie,

⁴ Puletao nou da-a nou shodo souloure: puletao nou taho touso souda loure, alia rheisüh phao hisü lükhabvü kulinou khailoue, alia puletao zhaoh bvü sü shisasayu linou rüloue,

⁵ alia puletao phikha sü kuyu linou kholoua pasasayu sah bahnü noulouwe; alia puletao nou toure raokhao sü chirürüyu noupoloua nou tare.

⁶ Tave Joshua alia Israel mainou fühao soua buyu Gilgal hisü vere, alia puletao nou haibüa ve paore, “Etao hai doushoa buyu nuh hinou vewe, südonou etao koa vo soulaikhe.”

⁷ Ana Israel mainou Hiv mai hi paoe, “Neletao hai Ehye koa ngheia bubai mowu, etao nou nele ye koa kabüa nou vo soukhailai?”

⁸ Puletao nou Joshua hi paoe, “Etao hai nevei kilai baie.” Alia Joshua nou puletao hi paoe, “Neletao thaoge alia daiki lonou vewe?”

⁹ Puletao nou chila peie, “Nevei kilaiwo bu doushoyu nuh hinou ve-e, daisounou touyu nele Ramai Mapao zhih hai duwe; Puhnou Ejipt hi kabüa nou vah souwe touyu teitei hai etao nou choue,

¹⁰ alia puhnou kabüa Jordan dapolo buyu Amor mai veo ahai hi souyu, Heshbon mai veo Sihon alia Ashtaroth hinou hrüa buyu Og mai veo Bashan hi souyu vah teitei-a Eh nou süre.

¹¹ Südonou nuh hi tsümai alia teidei hinou hrüa buyu mai teitei nou etao ye taho haibüa paopeiwo teanou seivewe, ‘Neletao nou veidu hi toure donou touso poloua taho neletao ye daowo, alia haibüa neletao hi paokhaio, Etao hai nele vei kilai baie; südonou etao ye koa vo soupeio,’ teanou.

¹² Haihi Etao raokhao bue; Etao nou ludu ta-a buki toure donou kihio lüa nou pfütae, ana chuo zhukhaio, Etao raokhao hai thekeire alia kirü tare.

¹³ Zhaohbvü hai-a araikio shihtoua zhaoh lathou loua pfütae, ana chuo etao nou doushoa ludu tayu donou, hai-a pasa tare; alia etao vei sahbanü alia phikha-a pasasa tare.”

¹⁴ Sükua paopei khaie, Israel mainou Mapao vei vu noukhai toumoa nou puletao ye koa touso tou zholoure.

¹⁵ Süthaisü Joshua nou puletao ye reih soulai moe teanou koa kaonayu Vo sü souwure; alia süthai-apei maitao ye koa nou chaachou souwure.

¹⁶ Vo souyu teithe asü thaisü, puletao hai puhmai vei kinapa baie alia koa nou süpe hinou hrüzhoa buyu mai baie touyu süloure.

¹⁷ Israel mainou tapoa kou teithe asü zhousü puletao vei nuh hisü koure. Puhmai vei nuhdutao hai daidaie toulouzü - Gibeaon, Chephirah, Beeroth alia Kirithjearim haitaoe.

¹⁸ Ana Israel mainou puletao ye reih soumoe, daiolouzü Ramai Mapao zhih hinou puletao ye koa chaachou souwure. Südonou Israel mai hrülai nou süthai-apei maitao pei hisü raore.

¹⁹ Ana süthai-apei maitao nou chila peie, “Etao nou Israel maivei Ramai Mapao zhih hinou Vo souwure, südonou chuo etao nou puletao ye dailou shie.

²⁰ Chuo etao nou daisoulai toulouzü, puletao ye pa hriyu tyare; molouzü Ramai vei lekha-rarou sü etao pei hi ve-a bailai.

²¹ Südonou puletao ye pa hrio, ana puletao ye pa daisoulai touyuo etaoye donou süraolai alia panou dzü pfülai,” teanou Israel maisou hi paopeie.

²² Joshua nou Gibeon mai ye kujüloua nou nou-e, “Neletao Eye koa ngheitei-a bulukhu, daie donou Eh hi da-a nou doushoa bue teanou paowe?

²³ Neletao nou haibüa dayu donou, Ramai nou nele yesü chaawure. Neletao hria bukisa neletao nou maivei qila soulaire. Neletao chuo etao vei Ramai ki soure donou süü daolai alia dzü pfülai.”

²⁴ Puletao nou Joshua hi chila peie, “Etao nou daivanou haibüa soue toulouzü, nele Ramai Mapao nou puhvei kilai Moses hi teidei haitao peilai tea paopeiwure alia teidei hai hinou hrüa buyu mai teitei ye southakhai touwulai touyu Enou süloue, südonou neletao ye ngaopiyu donou haibüa souwure.

²⁵ Chuo etao hai nele bah hi loure; neletao nou daie souzüe touyu choloua soulouwo.”

²⁶ Joshua nou daisouwe toulouzü; puletao ye mai aliro southa moa nou vupeie.

²⁷ Ana süzhou teithe hinou Joshua nou puletao mai hrülai yesü panou Israel maivei Rathoki soure donou qila soutare, puletao ye sa-a süü daore alia dzü pfütare. Puletao nou chukoutea vah süna hai soua bue.