JOSHUA 4 - SHEEYU BAIBEL (BSI)

Licholoure donou Gilgal hinou Chuh Shukhaiyu

¹ Israel tyahrütao nou Jordan rei tacho palouyu thai, Mapao nou Joshua hi paoe,

² “Mai kiahai sü khü chehinou mai alili dopalo,

³ alia puletao hi kharochi peio, ‘Jordan rei touchü hinou chuh kiahai polo, süsü napao maitao phinou heayu fütao hinou polo, alia po-a takou neletao nou zhoukhei chaolaiyu buh hisü khailo.’ ”

⁴ Süthaisü Joshua nou Israel mai khü chehinou dopa khaitouyu mai kiahai taosü kulou-e.

⁵ Joshua nou puletao hi paoe, “Neletao vei Ramai Mapao Sübvü nghoujü nou tapoa Jordan rei touchü hi koulo, alia sühinou chuh chekhi Israel mai khü kiahai donou phao hinou polou-o.

⁶ Thainekou nele nahmai nou ‘Chuh haitao daivanou hai hi shukhaitou-e,’ teanou nemai hi nouyu phaki, sütao hai neletaoye donou shee ali soure donoue,

⁷ süphaki, Mapao vei Vo Sübvü poa Jordan rei kacho kouyu phaki reidzü hai kümoa baire teanou neletao nahmai hi paolai. Vo Sübvü süna poa kouyu phaki, Jordan rei sü dadewu baire. Südonou chuh haitao nou Israel maiye pa teisa licho loure donou shee ali souwulai.”

⁸ Joshua nou paoyu thaifüa Israel maitao nou soue. Israel mai khü zhoubüa puletao nou chuh kiahai sü Jordan rei hinou polou-e, alia Mapao nou Joshua hi paoyu thaifüa puletao nou chuh sütao hai pfüakou puhmaitao nou chaoyu buh hisü khailou-e.

⁹ Joshua nou chuh kiahai taosü polou-a Jordan rei touchü hi, napao maitao nou Vo Sübvü poa layu fütao hinou shuwure. Sühai chukoute sühinou bue.

¹⁰ Moses hi Mapao nou kharochi peikhai touyu taohai Joshua nou maisou hi phouche loumo koute, Vo Sübvü poa buyu napao maitao nou Jordan rei touchü hinou la-a bupeie. Süphaki Israel mainou thasho-a rei sü kacho kouloue.

¹¹ Puletao nou rei tacho chelouyu thai, Mapao vei Vo Sübvü poyu napao maitao nou maisou nghoujü nou rei sü kacho koue.

¹² Moses nou kharochi peikhai touyu thaifüa Reuben mai, Gad mai alia Manasseh mai khü dali taonou reih basei polou-a Israel maisou jünou raia Jordan rei kacho kouloue.

¹³ Mai thehraidai phali reih basei polou-a reih soure donou Mapao nghoujü nou Jeriko deikho hisü takou loure.

¹⁴ Süzhou teithe Mapao nou Israel maisou nghoujü nou Joshua ye sü poku shopeie, puletao nou Moses ye tsükhou peiyu büa Joshua hria buki sasü khuhraoa tsükhou peie.

¹⁵ Mapao nou Joshua hi paoe,

¹⁶ “Vo Sübvü poa nou buyu napao maitaoye Jordan rei hinou tapalo,” tea nou paopeio.

¹⁷ Sübüa Joshua nou napao maitao hisü “Jordan rei hinou tapalo” teanou paopeie.

¹⁸ Süthaisü Mapao vei Vo Sübvü poa laiyu napao maitao nou Jordan rei touchü hinou tapa loure, alia puletao nou tapoa deithe hi paloure toukhai-e, Jordan reidzü sü raiki küyu büa kütare alia kükou reipe teitei sü phouloure.

¹⁹ Israel mainou Jordan rei kacho palouyu hai khoukha raina teithe kirou zhou-e, puletao nou tapoa kou teinghi palo Jeriko vei deirai hinou buyu Gilgal hinou fühao sou-a buloue.

²⁰ Puletao nou Jordan rei hinou chuh kiahai poa kouyu hai Joshua nou Gilgal hinou shuloue.

²¹ Alia puhnou Israel mai hi paoe, “Haithai neletao nahmai nou nele hi ‘Chuh haitao daidonou haihi khaiwe’ teanou neletao hi nouyu phaki,

²² neletao nou nele nahmai hi haibüa paolai, ‘Israel mainou Jordan reidzü thea nou tacho paloue.’

²³ Daiolouzü nele Ramai Mapao nou Hoyu Zai nahai Etaoye donou southe peiyu büa Jordan reidzüa Israel maiye panou kacho pache loumo koute southe peie.

²⁴ Sühai deiphao mai hrülaiye panou Mapao vei khouko hai daizhou due touyu süloure donoue, alia neletaoye pa teisa nou Mapao ye pia hrüloure donoue.”