JOSHUA 23 - SHEEYU BAIBEL (BSI)

Joshua vei Akhai Chipao

¹ Mapao nou Israel maiye panou ngaobamai hinou veiloua asoyu thai; Joshua hai tsüloure alia puhvei mapo-a taoli pare.

² Südonou Joshua nou Israel mai hrülaiye sü; tsümai, alia peikho mai, chiku-apeimai alia vah adu-pfüyu maitao hisü paoe, “E hai chuo tsüloure, alia avei mapo haia taoli pare;

³ Alia Ramai Mapao nou neletao ye donou kabüa tyahrü kukhe maitao hi souyu vahtao hai neletao nou ngaore; nele Ramai Mapao nou neletao ye donou reih züpeia baie.

⁴ Enou neletao ye tyahrü kukhe maivei teidei shoyu noupu Enou reih veiloua polouyu teidei, süolouzü Jordan rei hinou teinghi loulova buyu Zaidu nahi koute neletao ye peiwure.

⁵ Neletao Ramai Mapao nou neletao nghoujü nou puletao yesü hulai peilai, alia Mapao nou paokhai touyu thaifüa neletao nou talou puletao vei teidei sü poloulai.

⁶ Südonou Moses nou chikha tao larübvü hi rüthou khaitouyu pfüphou nou soutaosoua zülo, sühinou nalo mokhai-a zholo reitawu sou-o.

⁷ Neletao hrohinou shokhai touyu tyahrü kukhe taoye koalou hrüzhoso, mokhai-a puletao Rah zhih-a kuso, moa puletao hi chaachoua souso, mokhai puletao vei vah souso ae puletaoye khurüso.

⁸ Ana neletao nou zhou koute puh hi buyu büa nou, Ramai Mapao ye tyatei-a bulo.

⁹ Daiolouzü Mapao nou neletao nghoujü nou dushoyu alia khoushoyu tyahrü taoye hulaipeie; alia neletao nghoujü nou mai linoua zhoukoute veilou mohie.

¹⁰ Neletao mai ali nou mai thethe yesü hulai louwe, süsü Ramai Mapao nou neletao hi paokhai touyu thaifüa puhnou neletao ye donou reih soupeia baie.

¹¹ Südonou neletao soutao soua hrülo, alia Ramai Mapao ye leshilo.

¹² Daiolouzü neletao nou thaikhai tawulouzü, alia neletao hrohinou shokhai touyu tyahrü taoye koa vah souzholouzü, alia puletao ye koa nghisha souzholouzü, neletao nou puhmai naotukhe-e naloua alia puletao ye pa neletao nah naotumaie nalouzü,

¹³ soutao soua haihai sülo, Ramai Mapao nou neletao ye donou tyahrü kukhe taoye hulai peilai moe, ana puletao ye panou nele hisü reih souvewulai, alia puletao hai neletao ye donou rüh alia sho thoukhai touyu bülai alia soushoyu süda ali souwulai, ae nele nghithou hi shu louyu büa Ramai Mapao nou neletao ye veishoa peikhai touyu teidei hinou panou ha-a kata khaitou bailai.

¹⁴ “Chuo E deiphao thaowua talai teile sü vere, alia neletao mai hrülai nou süwe, daiolouzü neletao Ramai Mapao nou paokhai touyu taohai teitei nou neletao hi soupeie, souche moyu ali-a hare.

¹⁵ Ana neletao nou vah ashi soulouzü, Mapao nou neletao hi vah aveih teitei souche peiyu büa, neletao yesü Puhnou peikhai touyu teidei hinou sou hakhai touwu bailai.

¹⁶ Neletao nou Ramai Mapao ye koa Vo soukhai touyu zümoa rah kukheye thotalouzü, Mapao vei lekha-rarou nasü neletao pei hi velai, alia neletao ye peikhai touyu teidei nahinou thashoa neletao nou ha-a kata bailai.”