JOSHUA 21 - SHEEYU BAIBEL (BSI)

Levi Maiye peiyu Nuhdutao

¹ Levi khütao hinou tsüsoua buyu taonou Napao Eleazar, Nun nahpoutu Joshua alia Israel mai khü hinou tsüsoua buyu tao hi ve-e,

² alia puletao nou Kanaan teidei Shiloh hinou haibüa paoe, “Mapao nou Moses hi kharochi peiyuo Etao ye panou hrüre donou nuhdu taoli peilai, alia Etao kikhaorü ye panou bure heiphaoa peilai teanou paowe.”

³ Mapao nou paohkhai touyu thaifüa Israel mainou Levi maikhü yesü puletao vei za hinou nuhdu noupu heiphao haitao peie:

⁴ Levi maikhü hinou arai nasoua rako zhuyu hisü Kohath kihikhamai nou paloue. Südonou Aaron napao vei tyaonahtao nou ngaolouyu zha haitaoe: Judah, Simeon alia Benjamin khütao hinou nuh kiasü hai peie.

⁵ Süthai Kohath kihikhamai kukhe taoye rako zhuyu hisü nuh kirou hai Ephraim, Dan, alia Manasseh khü dali hinou peie.

⁶ Gershon mainou Issakar, Asher, Naphtali alia Bashan hi buyu (teinghi palo) Manasseh mai hinou nuh kiasü ngaoloue.

⁷ Merai mainou puhmai kihikha mai thaifüa nou Reuben, Gad alia Zebulun khütao hinou nuh kiahai ngaoloue.

⁸ Mapao nou Moses hi kharochi peikhai touyu thaifüa, Israel mainou rako zhuloua nuhdu haitao hai heiphao noupu loua nou Levi mai yesü peie.

⁹ Judah alia Simeon maivei teidei hinou zhih peikhai touyu nuh haitao hai peie:

¹⁰ Nuh sütao hai Levi khü hinou Aaron vei tyaonah Kohath kihikhamai taonou rako zhuyu hinou paloue.

¹¹ Puletao ye peiyu nuh taohai Kiriath-arba (Arba touyu nahai Anak puo-e), süsü Hebron hi bue, alia süpehao hinou buyu nuh tao noupu deichi va buyu nuhtaoa peie.

¹² Ana nuhdu sütao hi buyu ludoutao alia nuh sütao hai Jephunneh nahpoutu Keleb ye puhvei kaalo soua peie.

¹³ Napao Aaron tyaonah taoye Hebron (maiye southayu mai nou tuchüyu nuh) loua nou nuh haitao hai peie: Libnah,

¹⁴ Jattir, Eshtemoa,

¹⁵ Holon, Debir,

¹⁶ Ain, Juttah, alia Beth-shemesh - nuh haitao akü hai heiphao noupu loua nou Judah alia Simeon maivei teidei hinou peie.

¹⁷ Süthaisü Benjamin maivei teidei hinou puletao ye Gibeon, Geba,

¹⁸ Anathoth alia Almon - nuh haitao adai hai heiphao noupu loua nou peie.

¹⁹ Napao Aaron tyaonah taoye nuhdu alia heiphao noupu loua nou nuh kiasü peie.

²⁰ Levi maitya Kohath kihikhamai kukhe taoye Ephraim maivei nuhdu tao hinou peie.

²¹ Puletao ye peiyu nuhdu tao hai, maiye soumah-a southayu mainou tuve bailoure nuhdu Shechem noupu Ephraim deichi hi heiphao tao,

²² Kibzaim alia Bethhoron nuh haitao adai hai peie.

²³ Alia Dan mai teidei hinou Elteke, Gibbethon,

²⁴ Aijalon, alia Gath-rommon nuh adai hai heiphao noupu loua nou peie.

²⁵ Süthaisü teinghi loulova buyu Manasseh mai teidei hinou Taanak alia Gathrimmon touyu nuh ahai peie.

²⁶ Kohath kihikha maiye peiyu nuhdu taohai nuh kirou-e, süsü heiphao noupu loue.

²⁷ Levi maikhü hinou Gershon kihikha maiye teinghi palova buyu Manasseh mainou Bashan hinou buyu Golan (sühai soumahyu mainou tuve baiyu nuhdue) alia Beeshterah touyu nuhdu ahai heiphao noupu loua nou peie.

²⁸ Süthaisü Issakar mainou Kishion, Debarath,

²⁹ Jarmuth, alia Engannim nuhdu haitao adai heiphao noupu loua peie.

³⁰ Asher maikhü hinou Mishal, Abdon,

³¹ Helkath alia Rehob nuhdu adai haitao peie, süsü kikhaorü ye pa bulou veiyu heiphao noupu loue.

³² Napthtali mainou Galilee teidei hinou buyu Kadesh (sühai soumahyu mainou tuve tuchüyu nuh-e), Hammoth-dor alia Kartan, nuh haitao asü hai heiphao noupu loua nou peie.

³³ Gershon mainou ngaolouyu nuhdu taohai heiphao nou koa loua nuh kiasüe.

³⁴ Süthai Levi maitya kukhetaoye - Merari kihikha maiye Zebulun mainou Jokneam, Kartah,

³⁵ Dimnah alia Nahalal - nuh haitao adai hai peie;

³⁶ Reuben mainou Bezer, Jahz,

³⁷ Kedemoth alia Mephaath - nuh haitao adai hai peie.

³⁸ Alia Gad maivei teidei hinou Gilead hi buyu Ramoth nuhdu (maiye southayu mainou ve baiyu nuh), Mahanaim,

³⁹ Heshbon alia Jazer - nuh haitao adai hai heiphao noupu peie.

⁴⁰ Levi khü hinou peiche loumoa buyu Merari kihikhamai taoye depeiyu nuh teitei hai kiahaie.

⁴¹ Levi khü nou Israel mai hinou ngaolouyu nuh teitei hai raidaichae, süsü heiphao noupu koa loukhai touwe.

⁴² Nuhdu sütao teitei hinou veishoa heiphao hai bukhai touwe.

Israel Mainou Polouyu Teideitao

⁴³ Süthaisü Mapao nou Israel mai hi teidei hai peilai tea nou puhle puopao hi chaa soukhai touyu thaifüa puletao hisü teidei hai peie, alia puletao nou teidei sütao hai talou poloue alia sühinou fükha loua hrüe.

⁴⁴ Mapao nou puhle puopao hi chaa soukhai touyu thaifüa puhnou puletao hisü kaonayu alia asoyu nasü peie; puletao ye ngaobayu mai linoua puhle jünou veiloumoe, daiolouzü Mapao nou puletaoye ngaobayu mai hrülai hinou veilouyu hai peie.

⁴⁵ Mapao nou Israel mai hi paohpei khaitouyu teitei hai ali-a veikhai toumoa soukhai tou peie; paohkhai touyu teitei sü vechekhai toure.