JOSHUA 20 - SHEEYU BAIBEL (BSI)

Tuchüloure Nuhdu tao

¹ Süthaisü Mapao Joshua hi paoe,

² Israel mai hi paopeio, “Tuchülou veiyu nuhdu taosü dopalo, süna vanou Enou neletao hisü Moses ye panou paopeiwure.

³ Nuh sütao hisü mai taralinoua soumah-a maiye southayu maiye panou khüphouyu mai bah hinou tuve tuchüloure donoue.

⁴ Puhnou nuhdu sütao ali hi tuveloua robomü hinou laloua nuh hi tsümai hi puhvei vah soumah khaitouyu nasü paongaolai, süthai nou puletao nou puh yesü nuh hi salouloua panou bailoure buh peiwulai, alia puhnou nuh sühi buyu mai ye koa hrüa bailai.

⁵ Khühphouyu mainou puhye southare donou phou veyuma puh yesü puletao bah hi thoupei laimoe, daiolouzü puhnou puh saye sü southa nüa southa moyu donou.

⁶ Puhnou chiku chelou chemo koute nuh sühinou bulai, alia sü teile hi napao soua buyuna thaimo koute nuh sühinou hrülai. Süthainou puhnou tuchüyu nuh hinou lah puhvei nuh hi dakhai veloua bailai.”

⁷ Südonou puletao nou Naphtali deichi hinou buyu Galilee vei Kedesh nuhdu, alia Ephraim deichi hinou buyu Shechem alia Judah deichi hinou buyu Kiriath-arba nuhdu (süolai, Hebron) taohai dopaloue.

⁸ Süthai-a Jordan vei teinghi palova Jeriko pehi buyu maiye donou Bezer nuh nasü Reuben khüye donou dopaloue, alia Gilead hi buyu Ramoth nuh nasü Gad mai khüye donou dopaloue, ae Bashan hi buyu Golan nuh nasü Manasseh maiye donou dopaloue.

⁹ Dokuh pakhai touyu nuh haitao hai Israel mai likhei baimoa nou tahrüh kukhe mai linoua soumah-a maiye southawu louzü nuh sütao hi tuve bailoua nou chiku chelou mokoute sühinou khüphouyu mainou khü phoulou more donou sühinou bailoulai, mai bah hinou tuchüloua bailai.