JOSHUA 2 - SHEEYU BAIBEL (BSI)

Joshua nou Jeriko hi Reihkeipomai ye Seitayu

¹ Süthaisü, Nun nahpoutu Joshua nou kheikhei sou-a reihkei pomai ahaiye sü haibüa pao-a nou Shittim hinou seita-e,

² “Taho matsü sou-a nou Jeriko teidei nasü zhukhaio.” Paoyu chipao thaifüa puhai nou tare, alia Rahab tea kua buyu khakha pfüpai ki hisü puhai nou ve loulouwe, alia sühinou ve chaolouwe.

³ Süthai Jeriko hi veo nou Rahab ki hi reihmaiye seive haibüa paore, “Nekihi velouyu shemai ye sü kijü sapakhaio, daiolouzü puhai nou Etao teidei hi ve reikei polai donou zhuvewe.”

⁴ Ana Rahab nou puh hai yesü pokuwure, alia honapai nou habüa reihmaitao hi chila peie, “Ovai shemai ahai ahi ve-e, ana puhai daikinou veyu Enou sülou moe,

⁵ Teizhi louyuki alia robomü khulaiki puhainou haihinou tapare, puhai kalo velai touyu E-a sümoe; thashoa puhaie thaihu takhaio, sütoulouzü neletao nou puhai yesü ngoulou sühie.”

⁶ Ana honapai nou puhai yesü khopei hi sapa louhbe khukhu sou-a khokhai touyu hrohinou pokupeie.

⁷ Süthaisü reihmai taonou honahai ye sü thaingou poa kou Jordan reidzü phinou kalou süyu koute puhai ye thaihue; homaitao nou puhai ye thaihu tayu thai, robomü sü khuwure.

⁸ Puhai zütamo jünou, honapai nou puhai nou buyu khohi sü palou-a

⁹ haibüa nou paoe, “Mapao nou nemaiye teidei hainasü peiwure touyu E-a süwe, alia Eh nuh maitao nou nele ye sü ngaopi sholoure, alia hai hi hrüa buyu Eh nuhmai hrülai nou neletao ye dure donou khuveiyu hai ali-a hazhire.

¹⁰ Daiolouzü neletao nou Ejipt teidei hinou tapayu phaki, Zai Ho dzü sü kabüa neletao Mapao nou neletao nghoujü nou southe peie touyu, alia neletao nou Jordan rei tachopa Sihon alia Og, Amor maivei veo ahai ye neletao nou kabüa shishoa souha peie alia puhai hi daie soupeie touyu Etao nou choue.

¹¹ Etao nou sühai choulou khaie, Etao khuh hatare, alia mai lihiro lüthou veiyu sü bumore, daiolouzü nele Ramai Mapao hai raki alia deiphao teitei hinou Mapao-e.

¹² Südonou chuo, Enou nehaiye zhaiveishoa zhupeiyu büa, nehaia apuo kihikha maiye zhupeilai touyu Mapao zhih hinou ahi chaachou soupeio, alia ahi veikhai laimoyu shee alia soupeio,

¹³ alia apuo, apfü, athaihou-jürai maitao, alia avei tyarai mai hrülai ye hria vupeio, alia athai hinou Etaoye vupa peio.”

¹⁴ Süthaisü puhai nou honapai hi paoe, “Ahai vei hrüsü nevei hrü lyabaie. Etao nou soukhai touyu vah haitao hai nenou mai hi paomo louzü, Mapao nou Ehye teidei haina peiyu phaki, etao-a neye sü mai veishoa nou alia cheche vuzünou neye vupeilai.”

¹⁵ Süthai honapai nou puhai ye sü vabomü hinou pa rainou taokouloue, daiolouzü hopai kihai nuhdu vei bouvo vanou kusho-a soukhaitou-e, alia sühinou hopai nou hrüe.

¹⁶ Süthaisü honapai nou puh hai hisü haibüa paoe, “Nehai deichi lova tapalo, tailo tamolouzü ne haiye thaihu tayu maiye ve daolou shulai; alia sühinou ne haiye thaihu tayu mai khaivemo koute teithe asü tutsülo; süthainou nehai vei ludusü ta-a baio.”

¹⁷ Puhai nou süthai honapai hi paoe, “Nenou ahai ye panou haibüa chaachou soukhai touyu nasü, Etao mah ali-a bulai moe.”

¹⁸ Etao nou teidei haina hi reih hulouyu phaki ahai ye panou taokou louyu rai nghororoyu haina nou nevei vabomü hi khikhailo, alia ne pfüpuo, ne proumaitao, alia nepuo kihikhamai hrülai yesü ki haina hi save khailo.

¹⁹ Ne kihikhamai tarali nou kihi bumoa vakou palouzü, puhye southayuma, puhvei zhe hai puhla pfüa bailai, süna vei zhe hai Etao pei hi koulai moe; sütoumoa nou neye koa buyu mai taraliye Etao bah khakhaiwu louzü, puh vei zhe nasü Eh pei hi ve bailai.

²⁰ Ana Etao koa chaachou soukhai touyu nasü nenou mai hi paowu louzü, chaachou soukhai touyu mah nasü Ehi ali-a pa velai moe.

²¹ Süthai honapai nou paoe, “Ne hainou paoyu nasü soulou theo.” Sükua nou hopainou puhaiye sü seitawure alia puhaia tara tare; alia hopainou nghororoyu sahnou puh ki vabomü hisü khikhaiwure.

²² Süthaisü hohai nou tapo-a deichi lova patare, alia sühinou puh haiye thaihu tayu mai khaive mokoute teithe asü bue. Puh haiye thaihu tayu mainou ludu sasü thaitsüpoa tare ana puh hai yesü ngaolou more.

²³ Puhai nou süthai deichi vanou takoulou-a Nun nahpoutu Joshua hisü vetare, alia puh hainou ve ko veishi puh hi paopeie.

²⁴ Puhai nou Joshua hi paoe, “Cheche vujünou Mapao nou teidei süna hai Etaoye peiwure, alia süthemoa sühi buyu mai hrülai hai lethai tare alia etaoye ngaopi shoa bubaire.”