JOSHUA 18 - SHEEYU BAIBEL (BSI)

Khü Kukhetao hi Zhipeiyu Teideitao

¹ Israel mainou teidei polouyu thai, puletao hrülai nou Shiloh hinou ve jüloue, alia sühinou sahpao haolouwe.

² Ana Israel mai hrohinou teidei zhipei moyu khü anai buhie.

³ Südonou Joshua nou Israel maisou hi paoe, “Neletao puopao vei Ramai Mapao nou nele hi peikhai touyu teidei taohai talou polou moa teile kasoa bulai hie?

⁴ Khü chehinou mai asüsü dopalo, puhtao ye pa taho teidei zhuloua kabüa bue touyu rüloure donou Enou puletao yesü seitalai. Süthai rüloua ahi khaiveo.

⁵ Puletao nou deisü za anai soua dadeloulai; Judah mainou puletao vei teidei khelounou bulai, alia Josef mai taonou reilo bulai.

⁶ Neletao nou teidei sü za anai soua dadelo alia sütao hai kabüa bue touyu hai ahi poveo; alia Enou Mapao Ramai nghoujünouneletao yesü rako zhua zhipeilai.

⁷ Levi maitao louzü neletao ye koa lou za ngaozo laimoe, daiolouzü Mapao hi poa sheelayu natao nou puletao vei kaalo soua bailai; alia Gad mai, Reuben mai alia Manasseh mai khü dahli taohai puletao vei kaalosü Jordan teinghi palova nou ngaoloure, sühai Mapao vei kilai Moses nou puletao yesü peiwure.”

⁸ Süthaisü puletao hai tashu loua nou tare; alia Joshua nou tahou teidei zhure maitao hisü haibüa paoe, “Teidei sü taho zhulou-a haibüa nou bue touyu hai rükhai touloua, alia ahipoa khaiveo; Enou sütao hai Mapao nghoujü nou neletao ye rako zhua zhipeilai.”

⁹ Süthaisü puletao nou taho teidei hai kabüa nou bue touyu sühao zhuloue alia teidei taohai za anai soua dadelouyu hai larü hi rüthouloua puletao nou Joshua nou buyu Shiloh fühao hisü poa dakhaive-e.

¹⁰ Süthai Joshua nou Shiloh hinou puletao ye teidei taohai Mapao nghoujü nou rako zhua zhipeie.

Benjamin mai vei teidei tao

¹¹ Benjamin khü ye donou rako zhua dei zhipayu phaki, puletao vei dei hai Judah alia Josef mai kohi loure.

¹² Reihlova puletao vei deiraih hai Jordan rei hinou haotae, sühinou Jeriko deishao lahkhelou-a teinghi loulo va nuhtao hi koue, alia Bethaven vaohrao hinou kou akhai soue.

¹³ Sühinou deiraih hai Luz (süolai Bethel) hilo shoukouhloua Beth-horon deichi khelo kouh Ataroth-addar hi koute-e.

¹⁴ Süthai deiraih hai dakhai shako teinghi loulova buyu deichi hi kouhloua khelokouh Beth-horon pahi buyu Judah mai vei teidei Kiriath-baal (mokhai-a Kiriath-jearim) touyu hilo kouhwe. Teinghi loulova deiraih sü haitaoe.

¹⁵ Khelo vei deiraih hai Kiriath-jearim deikai hinou poshia Ephron deiraih hilo kou Nephtoah dzüla hi koue.

¹⁶ Süthaisü khelo kouh Hinnom zhingaoyu deichi hinou, sühai Rephaim deikho khai hie, alia sühinou Hinnom deikho hi kouhloute-e. Süthai Jebus maivei deichi shao hinou poa kouh Enrogel mai dei shao hi louwe.

¹⁷ Sühinou khipoa Enshemesh hilo reipoakhe-e, alia sühinou kouh Adummin pahilo buyu Geliloth hilo tae, süthai Reuben nahpoutu Bohan chuh hi kouh-we.

¹⁸ Taihinou reilokhe Betharebah hi paloua Arabah hivai shouloue.

¹⁹ Süthai puhmai vei deiraih hai reilova tachopoa khe Bethoglah deishao hilo khe-e, alia reiko deiraih hai Thai-Zai pehi khe khaisoue, khelo va hai Jordan rei hinou akhai-e: haihai khelo vei deiraih-e.

²⁰ Teinghi palova hai Jordan rei hinou deiraih souwe. Haitao hai Benjamin khü vei kihikhamai thaifüa peiyu deiraih taoye.

²¹ Benjamin vei sholea thaifüa peikhai touyu nuhdu sü haitao-e: Jeriko, Beth-hoglah, Emek Keziz,

²² Beth-arabah, Zema-raim, Bethel,

²³ Avvim, Parah, Ophrah,

²⁴ Chepharammoni, Ophni, alia Geba - sütao hai nuh kiahai-e.

²⁵ Gibean, Ramah, Beeroth,

²⁶ Mizpeh, Che-phirah, Mozah,

²⁷ Rekem, Irpeel, Taralah,

²⁸ Zela, Haeleph, Jebus (sühai, Jerusalem ye), Gibeah, alia Kiriath-jearim - nuh sütao hai kiadai. Haitao hai Benjamin khüye kaalo peiyu teidei tao-e.