JOSHUA 17 - SHEEYU BAIBEL (BSI)

Teinghi Loulova buyu Manasseh Khü

¹ Süthaisü Manasseh mai khüye dei dadepeie, daiolouzü puh hai Josef nah narai nae. Gilead, puh hai Mikir vei puo-e, alia Manasseh vei nahpoutu narai nae, alia reih souveishoe, südonou puhye Gilead alia Bashan teidei hai peie.

² Manasseh mai kukhetao ye puhmai kihikhamai thaifüa Abiezer, Helek, Asriel, Shechem, Hepher, alia Shemida haitao hai peie; mai haitao hai Manasseh vei nahpoutu Josef hilo nou veyu tyaosholea-e.

³ Manasseh nahpoutu Makir, Mikir nahpoutu Gilead, Gilead nahpoutu Hepher, Hepher nahpoutu Zelophenad, puh hai nahpoutu hae, ana nahnaotu taosü Mahlah, Noha, Haglah, Milkah, alia Tirzah haitaoe.

⁴ Puletao nou napao Eleazar, Nun nahpoutu Joshua alia süthai-apei maitao hi ve paoe, “Mapao nou Moses hi kharochi peikhai touyu thaifüa Etao-a nahpoutu maiye kaalo peiyu büa peio.” Mapao nou paohpeikhai touyu thaifüa puhnou puletaoye sü puomaitao vei kaalo sü depeie.

⁵ Südonou Jordan rei dapolova buyu Gilead alia Bashan hai Manasseh mainou za kirou ngaoloue.

⁶ Daiolouzü Manasseh nah naotutao nou nahpoutu mainou ngaozüyu kaa thaifüa koa ngaoloue. Gilead teidei hai Manasseh maitao hi depeiwure.

⁷ Manasseh mai deirai hai Asher hinou Shekem teinghi palo buyu Mikhmethath hi koute-e; süthai khelokouh Entappuah mainou buyu hi kouhte-e.

⁸ Tappuah hai Manasseh mai vei teidei-e, ana Manasseh maivei deiraih hinou buyu Tappuah nuhdu nahai Ephraim mai vei-e.

⁹ Süthai puh mai vei deirai hai Kanah dzükü hilo koue. Nuh süna hinou poa reitou hi kouhte-e, nuh sütao hi buyu tao hai Ephraim mai vei nuh-e. Manasseh mai vei deirai hai reilova reitou nahi khete-e alia Zhaidu nahinou kouh akhai soue.

¹⁰ Teidei khelouva hai Ephraim maivei alia reilova buyu taohai Manasseh mai vei-e, puh hai vei deirai kohi Zaidu nanou bue; reilova khe Ashur hie, alia teinghi palo hai Isaakar hi koute-e.

¹¹ Assakar alia Asher teidei hinou buyu Bethshan, Iblean alia süpehao hinou buyu nuhtao, Dor alia süpehao hinou buyu nuhtao, Endor, Taanak, Megiddo (asü nahai Naphath) alia sütao hi buyu nuhtao hai Manasseh mainou poloue.

¹² Ana Manasseh mainou nuhdu sütao hi hrüa buyu maitao yesü hulailou moe, südonou Kanaan mainou teidei sühinou hrüa bubaie.

¹³ Israel mainou khouchi palouyu thai-a, puletao nou Kanaan mai ye hulai moe, ana puletao ye sa-a qila souwe.

Ephraim alia Teinghi Loulova buyu Manasseh Mainou Teidei Khopuyu

¹⁴ Josef mai khü nou Joshua hi paoe, “Ramai nou hapeiyu thaifüa Etao hai mai alao bure, ana ne daisounou Etaoye dei zha ali peibaiwe?”

¹⁵ Joshua nou puhmaitao hi chila peie, “Neletao hai mai pouyu donou Ephraim deichi hi bulou jüe toulouzü, tapa Perizz alia Rephaim maivei vaohraotao sousheeloua bulouo.”

¹⁶ Josef maitao nou paoe, “Deichi hi buyu nuh taohai etao donou chilehie, ana deikho hinou buyu Bethsham alia sühi buyu nuhtao alia Jezreel deikho hinou hrüa buyu Kanaan maiwo hu nou soukhai touyu rheiluki-a bue.”

¹⁷ Süthaisü Joshua nou Josef, Ephraim alia Manasseh mai hi paoe, “Neletaowo mai taoli bue, alia khoukoa veishoe; südonou neletao hai za alikhei ngaobai laimoe,

¹⁸ ana deichi hi buyu nuhtao hai nele vei zha soulai, sühi buyu nuhtao hai vaohrao baiyuma, neletao nou süsü sousheeloua deirai akhai hi koute polo, alia Kanaan mainou rheiluki hai hunou soua pfüyuma, mokhaia khoushoa reih souvei-a bukhaiyuma, neletao nou puletaoye sü hulailou süe.”