JOSHUA 11 - SHEEYU BAIBEL (BSI)

Joshua nou Jabin alia Puhvei Metao hinou Reih Veilouyu

¹ Hazor hi Jabin veo nou ko sütao süloukhaie, puhnou ko hai Madon hi veo Jobab, Shimron hi veo, alia Achshaph veo,

² alia reilo deichi hinou buyu vemaitao hi, alia Arabah vei khelonou buyu Khinneroth alia teinghi loulova nou buyu Naphothdor vemaitao hisü ko hai seitae.

³ Puhnou Jordan vei teinghi palo alia teinghi loulo noubuyu Kanaan mai, Amor mai, Hit mai, Perizz mai, alia deichi hilonou nuh buyu Jebus mai alia Mizpah vei Hermon deichi hilonou hrüyu Hiv mai teitei hisü ko hai paotapeie.

⁴ Puletao nou ko hai süloukhai, reih mai teitei yesü sa-a vere - puletao reihmai hai kazhowe toulouzü zai hi venai zhoue, alia puletao vei rhei ae rheilukia alao we.

⁵ Mave mai sütao nou puletao vei reihmai hrülai thouhrü loua Israel maiye reih soure donou Merom reitou hi ve fühao soua bure.

⁶ Mapao nou Joshua hi paoe, “Puletao ye ngaopiwuso, daiolouzü dosho chupha hi, Enou Israel mai ye donou puletao yesü southa khaitou peilai. Neletao nou daisoulai toulouzü puletao vei rhei phisa zhadea bailai alia puletao vei rheiluki mei deia bailai.”

⁷ Südonou Joshua nou puhvei reihmai teitei saloua puletao nou chokhai moa buhinou Merom reitou hisü reih huloure.

⁸ Mapao nou puletaoye sü Israel mai bah hi peiwure, alia Israel mainou puletao jünou reih veiloua puletao ye southa chemokoute hupoa Sidon, Misrephothmaim, alia Mizpath vei teinghi palo deikho hi koute hupoa kouwe.

⁹ Mapao nou Joshua hi paopeiyu thaifüa puhnou soue; puhnou homai vei rhei phisa sü zhadepeie, alia homai vei rheiluki sü meinou deipeie.

¹⁰ Joshua nou dakhai ve Hazor nuh hai poloue alia sühi veo ye khoche nou daothawure; daiolouzü sü teile hi Hazor vedei hai vedei kukhe jünou duka na soua bue.

¹¹ Puletao nou nuhdu sühi buyu mai teitei yesü khoche nou daotha khaiwua souha khai touwure; mai aliro panou hrimoa southa kaitouwure, alia Hazor nuhdu nasü meinou deiwure.

¹² Mapao kilai Moses nou puh hi kharochi peikhai touyu büa Joshua nuhdu sütao vei vemai teitei yesü khoche nou daotha khaiwure.

¹³ Ana Israel mainou deichi hinou buyu nuhdu kukheo louzü mei deimoe, puletao nou mei deiyuo Hazor likhe Joshua nou deia baie.

¹⁴ Muteiyu natao alia hrikhaonatao hai Israel mainou lahye donou nuhdu sütao hinou poloue, ana sühinou hriyu hrikhaona teitei nou southa khaitouwure.

¹⁵ Mapao nou puh kilai Moses hi kharochi peie, kharochi sütao hai Moses nou Joshua hi lüpeie, alia Joshua nou sütao hai züa vahsoue. Mapao nou Moses hi souo teanou kharochi peikhai touyu taohai puhnou soukhai touwe.

Joshua nou Teidei Polouyutao

¹⁶ Südonou Joshua nou sühi buyu teidei teitei nou pokhai toulouwe - deichi hinou buyu nuhtao, Negeb hi buyu nuh teitei, Goshen vei teidei teitei, deina hinou buyu Arabah alia Jordan vei deikho teitei nou polouwe.

¹⁷ Seir hilo reia buyu Halak deichi hinou poakou Hermon deichi phihi buyu Lebanon deikho Baalgad hi koute hai poloue. Puhnou sühi vemai hrülai yesü nüloua southa khaiwure.

¹⁸ Joshua nou vemai sütao ye pha soshoa reih souwe.

¹⁹ Gibeon hinou hrüyu Hiv mai likhe Israel maiye reih soumoyu baie. Teidei kukheo louzü reih hinou veiloua puletao nou pokhai toulouwe.

²⁰ Daiolouzü Mapao nou Israel maiye donou puletao lesü soukhou peiwua puletao nou Israel maiye reih souyu hinou panou souha khaiwure donou, alia puletao ye zhuvea peimore donou süsü Mapao nou Moses hi paopeiwure.

²¹ Sükua buyu teile hinou Joshua nou taho deichiva buyu Hebron nuh tao, Debir, Anab, alia Judah deichi vanou buyu nuh teitei, alia Israel maivei deichi vanou buyu Anakim mai hrülai yesü; Joshua nou souha khaiwure.

²² Israel mai teidei hinou Anakim mai hazhi toure; mai chitya hai Gaza, Gath alia Ashdod hinou buhie.

²³ Mapao nou Moses hi paopeiyu thaifüa Joshua nou teidei teitei hai poloure. Joshua nou teidei sütao hai Israel maikhü thaifüa zhipeie. Süthai hai puletao nou reih soumoa shore.