JONAH 4 - SHEEYU BAIBEL (BSI)

Jonah vei Rarouyu alia Ramai vei Zhuveayu

¹ Ana süvanou Jonah hai vamo shore alia rarou shore.

² Südonou puhnou Mapao hisü veachi paoe, “Oh A Mapaowo, Enou ne hi haibüa bailai tiyu sü E nuh hi bukinou paomowu? Süvanou E Tarshish hi tutsü tamowu; Ne hai zhuvea süyu, lekha hahamoyu, leshi akhai hayu, alia ashi souyuma khaipeiyu Ramaie touyu Enou süwe.

³ Oh Mapao, südonou chuo leshia nou avei hrümai hai popeio, daiolouzü Eye donou hriyu jünou thaiyu punou vei baire.”

⁴ Mapao nou paoe, “Nenou rarou züdouyu daie bue?”

⁵ Süthaisü Jonah nou tachopa nuhdu vei teinghi palovatha butare, alia sühinou puhnou teikhü ali souloua bue. Puhnou sühinou nuhdu nasü daie palaisa teanou zhua bue.

⁶ Ramai Mapao nou poube ali panou paopaloua Jonah nou vamoa buyu nasü puh le souva peire donou pa teihao soua bupeie.

⁷ Ana thainesho shona sü, Ramai nou khahrei ali seive süübe sünasü touthawure.

⁸ Teinghi payu thai, Ramai nou teinghi palova nou soushoyu teikhai seive peie, alia teinai souleyu donou Jonah sü thainonore, südonou puhnou paoe, “Eye donou hriyu jüo thaiyu nou veipure.”

⁹ Ana Ramai nou Jonah hi paoe, “Süübe haina thaiyu vanou ne rarou züyu daie bue?” Jonah nou paoe, “Enou rarou züyu bue, thaiyu koute rarou züyu bue.”

¹⁰ Mapao nou puh hi paoe, “Süübe hainawo zhou khei paopa loua thainesho thaita-a baie; süna donou nenou halia soumoe, alia süübe süna nenou souvi khemoe, ana süübe süna thaiyu donou nenou levea-e.

¹¹ Dushoa buyu Nineveh nuhdu na donou E zhuvea moa bailaiwu? Nuhdu sühie mai 120,000 jünou poue alia kikhaorü chosha louhosoua buyu hai E pa-ngaimoa bailaiwu?”