JONAH 3 - SHEEYU BAIBEL (BSI)

Jonah nou Ledalouyu

¹ Süthaisü Mapao nou Jonah hisü vu ahai nasoua haibüa paoe,

² “Kushulo, alia Nineveh nuhdu hisü taho Enou ne hi paopei khaitouyu chipao nasü paopeio.”

³ Süthai Jonah hai Mapao nou paoyu thaifüa Nineveh hisü tare. Nineveh nuh hai dushoe, südonou nuh tachoyu hai teithe asü louwe.

⁴ Jonah nou nuhdu nahisü tashu tare, puhnou teitheli tayuthai, haibüa paoe, “Teithe raidai thaisü, Ramai nou Nineveh nuh hai souha laire!”

⁵ Nineveh hi hrüa buyu mainou Ramai ye louche loure, südonou puletao mai taidu teitei nou, alia soukousah banou khai touloua, lühlai teanou chi souloue.

⁶ Nineveh hi veo nou ko sühai süloukhaie, puh-a vebu thaowua alia sabanü laowua soukousah thouloure alia vounai hisü kouh butare.

⁷ Alia puhnou Nineveh teidei teitei hisü ko haibüa seitare, “Kharochi hai veo alia puh khenou vah souyu mai hinou vewe; ‘Mai lia panou ha toulai moe, mokhai-a kikhaorüa panou ha lia toulai moe, moa dzüa panou ke laimoe.

⁸ Mai alia kikhaorü hrülai nou soukousah banouloua Ramai hinou eihtea veachi paolai alia mai hrülai nou vah ashi ae zhaipou shiyu nasü thouwulai.

⁹ Sükulouzü, Ramai vei lekha-rarou nasü thouwua etao ye souhawure hinou khaipei shulai.’ ”

¹⁰ Puletao nou vah ashi nasü thaowua leda loure touyu Ramai nou ngaoloukhaie, puletao ye souhalaiyu hinou Ramai-a leda tare alia puletao ye souha mode.