JOHAN 9 - SHEEYU BAIBEL (BSI)

Nghicha-a Nakouyu Mai aliye Jisu nou Souvei peiyu

¹ Jisu nou sükua ta-a buyu hinou nakou rainou nghichayu mailiye ngaoloure.

² Alia puh rozümai taonou puh hi noue, “Rabbi, mai haina nghicha-a nakouyu hai thaoh mah-e, mai haina mah ho, puh pfüpuo mah-e?”

³ Jisu nou chila peie, “Haisü mai hainanou moa puh pfüpuo nou mahyu donou moe, ana Ramai vei khupa vah hai puh vanou pongaore donou baie.

⁴ Teinghi bubukinou Eye seive peiyu puh vei vah taosü Eletao nou souvuzülai. Maita linoua vah soulou hore kheisü laire.

⁵ Enou deiphao bubusa, Enou deiphao vei ava nasüe.”

⁶ Puhnou haibüa paoyu thaisü, deiphihi taidzü sükhai loua taidzünou konai hüloure ea konai sünanou mai süna nghithouhi napeire,

⁷ alia puh hi paoe, “Takhaio, alia Siloam dzükhao hinou ne pah phülou khaio.” (Siloam touyu hai seitayu toue.) Südonou puhnou taholoua puh pah phüloure, alia nghithou ngaoloua khaivere.

⁸ Südonou kinapa maitao ea puhye raichoki tosüa ngaoyu maitao nou paoe, “Deiphinou bua tosüyu nasü mai haina mowu?”

⁹ Kamai nou paoe, “Puh sü hainae;” kukhe maitao nou paoe, “Puh moe, ana puh hai mai süna zhu raibaie.” Südonou mai sünanou paoe, “Mai sünasü E-e.”

¹⁰ Puletao nou puh hi noue, “Sükulouzü ne nghithou hai kakua hepaloue?”

¹¹ Puhnou chila peie, “Jisu tea kuyu mai sünanou konai hüloua Anghithou hi napeie, alia haibüa, ‘Siloam hi taho nepah phüloukhaio’ tea paopeie; südonou Enou taho Apah phüloue ea Anghithou sü ngaoloure.”

¹² Puletao nou puh hi noue, “Puh kahi bue?” Puhnou chila peie, “E sümoe.”

Phariseemai taonou Nghithou Veilouyu vanou Chinouyu

¹³ Puletao nou raichoki nghichayu mai sünaye Phariseemai taohi save.

¹⁴ Jisu nou konai hüloua mai süna nghithou souvei peiyu teithe sünasü Soteithe hinoue.

¹⁵ Phariseemai taonou puh nghithou hai kakua ngaoloue tea puh hi noupue. Alia puhnou puletao hi paoe, “Puhnou Anghithou hi konainou napeie, alia Enou Apah phülouyu kisü ngaoloure.”

¹⁶ Phariseemai kamainou paoe, “Mai haina hai Ramai hinou vemoe, daiolouzü puhnou Soteithe reimoe.” Ana kukhemai taonou paoe, “Kakua mahmai alinou sübüyu shee taosü soulou sülai?” Alia sühisü puletao hrohinou me kuku tare.

¹⁷ Südonou puletao nou nghichayu mai sünahi noupue, “Puhnou ne nghithou souvei peiyu donou nenou puh vanou daitoua paowe?” Mai sünanou paoe, “Puh hai rachi paolamai alie.”

¹⁸ Ana Jihudimai taonou nghichayu hinou ngaolouyu mai süna pfüpuoye kuloumo sasü puh hai nghichae ea chuo ngaoloure touyusü alia louche moe,

¹⁹ alia puletao nou putamai hi noue, “Netamainou nghicha-a nakoue touyu nahpoutu nasü hainawu? Sütoulouzü puhnou chuo kakua ngaoloue?”

²⁰ Puh pfüpuo nou chila peie, “Haisü Eh nahpoutue, alia puh hai nghicha-a nakoue touyu sü Ehnou süe.

²¹ Ana chuo puhnou kakua ngaolousa, moa thaohnou puh nghi souvei peisa touyu Ehnou sümoe. Puh hai tsüre, alia lah puh vanou paolou süe, puh hinou noukhaio.”

²² Puh pfüpuo nou Jihudimai taoye piyu donou sünahai paoe, daiolouzü maita linou Jisu ye Khrista-e tea louche louzü, puhye sü rathobuh hinou hutalai tea Jihudimai taonou kukou chere.

²³ Südonou puh pfüpuo nou “Puh hai tsüre, puh hinou nouloukhaio,” tea paoe.

²⁴ Südonou puletao nou nghicha-a nakouyu mai sünaye kuda khailoua puh hi paoe, “Ramaiye likhei shokhaio; mai hainasü mahmaibai touyu Ehnou süe.”

²⁵ Puhnou chila peie, “Puh hai mahmaie, mahmai moe touyu E sümoe; ali louzü Enou süwe, süolouzü E nghicha-a buyu sü chuo E ngaoloure.”

²⁶ Puletao nou puh hi noue, “Puhnou nehi dai soupeie? Puhnou kabüa nenghi chayu souveipeie?”

²⁷ Puhnou puletao hi chila peie, “Enou neletao hi paochewure, alia neletao nou keipei bae. Neletao daidonou sünasü keipu nüwe? Neletaoa puh rozümai souyu züpawu?”

²⁸ Puletao nou puhye nghei-a paoe, “Nenou puh rozümaie, ana Ehwo Moses rozümaie.

²⁹ Ramai nou Moses hi paopeie touyu hai Ehnou süe, ana mai haina vanou louzü, puh hai kahinou vesa touyu Ehnou sümoe!”

³⁰ Mai sünanou chila peie, “Neletao nou puh hai daikinou vesa touyu sümoyu hai khupa shoyu alie, ana puhnou Anghi chayu souvei peie!

³¹ Ramai nou mahmai pai keipei moe, ana maita linou Ramaiye thoa puh leli soulouzü, Ramai nou puh paisü keipeiwe touyu Ehnou süwe.

³² Deiphao soushu rainou maita linoua nghicha-a nakouyu mai tali nghithou souhepa peire touyu choukhai mohie.

³³ Mai haina hai Ramai hinou vemo louzü, puhnou halia soulou hoe.”

³⁴ Puletao nou puh hi chila peie, “Ne sü mahnou züa nakou khaitoue, alia nenou Eletaoye doupei laiwu?” Alia puletao nou puhye hulaire.

³⁵ Puletao nou puhye hulaire touyu sü Jisu nou chouloure, alia puhye ve ngaolouyu kisü puhnou puh hi paoe, “Ne Mai Nahpoutuye louchewu?”

³⁶ Puhnou chila peie, “Dou-apeio, Enou puhye louche loure donou puh sü thaoh-e!”

³⁷ Jisu nou puh hi paoe, “Nenou puhye ngaoloure, alia chu neye chipha-a buyu nasü puh-e.”

³⁸ Puhnou paoe, “Mapao, E louche,” alia sühinou puhnou kou puhye khurü loure.

³⁹ Jisu nou paoe, “Ngaomoyu maitaoye panou ngaoloure donou, alia ngao-a buyu maitaoye panou nghicha tare donou, Enou deiphao hi chikure donou ve.”

⁴⁰ Buh sühinou puhye koa buyu Phariseemai kamainou süsü chouloua puh hi paoe, “Eletao-a nghi chawu?”

⁴¹ Jisu nou puletao hi paoe, “Neletao hai nghichayu kowo, neletao mah sü bupaimoe; ana chuo, ‘Eletaowo ngaowe,’ tea neletao nou paoyu donou neletao mah sü bubaie.”