JOHAN 7 - SHEEYU BAIBEL (BSI)

Jisu ea Puh Thaihou-jüraitao

¹ Haithaisü Jisu nou Galilee hi tasühao tare; puh hai Judea hi tanükhai more, daiolouzü Jihudimai taonou puhye southeare donou phoua bue.

² Chuo Jihudimai Repaonüh nasü ngheire.

³ Südonou puh thaihou jürai maitao nou puh hi paoe, “Ne rozümai taonou nenou soua buyu vah taosü ngaoloure donou buh hainasü thaowu-a Judea hi tawo.

⁴ Daiolouzü maita linoua puh hai zhih talai toulouzü khei-a vah souwumoe. Nenou vah haitao soua bulouzü, nelah neye deiphao mai hi po ngaokhaio.”

⁵ Daiolouzü puh thaihou jüraimai koutea puhye louche moe.

⁶ Jisu nou puletao hi paoe, “Ateile louzü vetelou mohie, ana neletao teilewo louzü teisanou souda-a bue.

⁷ Deiphao mainou neletaoye ngaoba louhoe, ana sünanou Eye ngaobawe daiolouzü Enou puh vah taohai ashi baie tea zhopaoh peiwe.

⁸ Neletao lah nüh buh hi takhewo; Ewo nüh buh hi takhelaimoe, daiolouzü Ateile hai vetelou mohie.”

⁹ Puhnou sübüa paowu-a Galilee hinou nai-a bue.

Jisu nou Repaonüh hi Taveyu

¹⁰ Ana puh thaihou jürai maitao nou nühbuh hi tahoyu thaisü, pu-a dumoa khei-a nüh buh hi takhere.

¹¹ Jihudimai taonou nühbuh hinou puhye phoua, “Puh hai kahi bue?” tea nouwe.

¹² Alia sühisü maisou hrohinou puh vanou mülealea loure. Kamainou paoe, “Puh hai maivei maie,” ana mai kukhenou paoe, “Moe, puhnou maikhe maiye sümah tare.”

¹³ Ana Jihudimaiye piyu donou maita linoua dua puh vanou chi paomoe.

¹⁴ Nüh süna tsüle kouyu phakisü Jisu nou Rathoki hi talouloua doushu tare.

¹⁵ Jihudimai taosü süvanou khupa loua, “Mai hainanou larü doukhai moa kabüa haizhozhou süloue?” tea paoe.

¹⁶ Südonou Jisu nou puletao hi chila peie, “Enou doupeiyu hai Avei moe, ana Eye seive peiyu puh veie.

¹⁷ Maita linou Ramai züpa sounüa bulouzü, Enou doupeiyu hai Ramai hinou veho, lah Amadonou paosa touyu sü sülai.

¹⁸ Puh lah puh madonou pao-a buyu puhsü lah puh kathe phoubaie; ana puhye seiveyu puh vei kathe phouyu puhwo chekhaoe ea puh hisü madayu alia hae.

¹⁹ Moses nou neletao hi Razhai nasü peimowu? Ana neletao maili koutea Razhai nasü reimoe. Neletao daivanou Eye southeare phouwe?”

²⁰ Maikhe mainou chila peie, “Nehi rashi ali bue! Neye southeare donou thaohnou phouwe?”

²¹ Jisu nou puletao hi chila peie, “Enou vah ali soue, alia neletao veishinou süvanou khupae.

²² Moses nou neletao hi hee-vadeyu naa peie (sünasü Moses hinou vemoe, ana puo-paomaitao hinou ve), alia neletao nou Soteithe kinou nahpoutumai aliye hee-vadewe.

²³ Moses vei chikha soukho more donou nahpoutumai aliye Soteithe kinou hee-vade louzü, Enou mai aliye puh vasou teitei hai Soteithe kinou soushee shahpeiyu vanou neletao nou Apei hi rarouwu?

²⁴ Khao-zhai zhua chikuwuso, ana zü zhua chikulo.”

Puh hai Razhepu Nawu?

²⁵ Südonou Jerusalem hi buyu mai kamainou paoe, “Puletao nou southealai tea phouyu mai nasü haina mowu?

²⁶ Ana zhukhaio! puhnou dua chi pao-a bu-a puletao nou puh hi ha chilia paomoe. Haisü tsümai taonou chekhaoa puh hai Khrista nasüe tea sülouyu vanou moma?

²⁷ Sütoukhaia mai haina hai daikinou vesa touyu hai Ehnou süe; ana Khrista nanou veyu kisü, maita linoua puh hai daikinou vesa touyu hai sülaimoe.”

²⁸ Südonou Jisu nou Rathoki hinou doupeia buyu hinou paikua paoe, “Neletao nou Eye süwe, alia E hai daikinou vesa touyu hai neletao nou süwe. Sütoukhaia, Ehai lah Amado hinou vemoe, Eye seiveyu puh hai chekhaoe, alia puhye neletao nou sümoe.

²⁹ Ana Ewo puhye süwe, daiolouzü Esü puh hinou ve, alia puhnou Eye seive-e.”

³⁰ Südonou puletao nou puhye niloure donou phoue; ana maita linoua puh pei hi bah khakhai moe, daiolouzü puh phasü velou mohie.

³¹ Sütoukhaia mai taolinou puhye louche loure; alia puletao nou paoe, “Khrista nanou veyu kisü puhnou mai hainanou souyu jünou koua shee soulaiwu?”

Jisu ye Niloure donou Reihmaiye Seiveyu

³² Maisou khemainou Jisu vanou chi kulealeayu sü Pharisee maitao nou chouloure, alia napao adumaitao ea Phariseemai taonou puhye niloure donou reih maiye seive-e.

³³ Sükisü Jisu nou paoe, “Enou neletaoye koa phajü donou bulaihie, alia süthaisü Esü Eye seive peiyu puh hi vetalai.

³⁴ Neletao nou Eye phoulai, ana neletao nou Eye ngaolaimoe, alia Abuh hi neletao velouhoe.”

³⁵ Jihudimai taonou puletao lah alinou lihi paoe, “Eletao nou puhye ngaolai moyu buh kahi puhnou talai? Puh hai Greekmai hrohi poralouyu Jihudimai taohi taholoua Greek tamaiye doupei laiwu?

³⁶ ‘Neletao nou Eye phoulai, ana neletao nou Eye ngaolai moe?’ alia ‘Abuh hisü neletao velou hoe’ tea puhnou paoyu hai daiye paosa?”

Ahri Dzüla

³⁷ Nüh süna akhai ea matsü tsülai teithe kisü, Jisu nou lashuloua ea paikushoa paoe, “Maitalia reilouzü, puhye panou Ahi taveloua küloukhaio.

³⁸ Eye loucheyu puhsü, sheeyu larübvü nou paoyu kua, ‘Puh lekhe hinou hriyu reidzütao kütalai.’ ”

³⁹ Hainahai Jisu nou puhye loucheyu maitao nou ngaolaiyu Rako vanou paoe; daiolouzü Rakohai süki peilou mohie, daiolouzü Jisu hai khouko-ava hi hrida shulou mohie.

Maikhemai hrohinou Me Kukutayu

⁴⁰ Puletao nou chipao haitao choulouyu kisü, mai kamainou paoe, “Mai haina hai chekhaoa Rachi paolawo nasüe!”

⁴¹ Mai kukhenou paoe, “Puh hai Khristae!” Ana kamainou paoe, “Khrista hai Galilee hinou velaiwu?

⁴² Sheeyu larübvü hinou Khrista hai David khü hinou, alia David nou hrüyu nuh Bethlehem hinou velai toumowu?”

⁴³ Südonou Jisu vanou maikhemai hrohisü me kuku tare.

⁴⁴ Puletao kamainou puhye nilouyu züpae, ana maitalinoua puh pei hi bahkha khakhai moe.

Jihudimai Tsümai taonou Louche Moyu

⁴⁵ Reihmai taonou dakhai veyu kisü napao adumaitao ea Phariseemai taonou puletao hi paoe, “Neletao daidonou puhye save moe?”

⁴⁶ Reihmai taonou chila peie, “Mai haina büa maitalia chi paokhai mohie.”

⁴⁷ Phariseemai taonou puletao hi chila peie, “Neletaoye-a sümah tare moma?

⁴⁸ Tsümaitao hrohinou moa Phariseemaitao hrohinou puhye maita linoua louchewu?

⁴⁹ Ana razhai sümoyu maisou haitaowo louzü acha ngaolouyu maitao baie!”

⁵⁰ Pharisee maitao hrohinou vuhli Jisu ye tave daoyu Nikodemas touyu nanou kukhemai taohi paoe,

⁵¹ “Eletao vei razhainou mai aliye raia puh chi keikhai moa ea puhnou dai sousa touyu phoupa loumoa chiku baiwu?”

⁵² Puletao nou chila peie, “Ne-a Galilee hinou vewu? Sheeyu Larübvü hinou phoukhaio ea Galilee hinou rachi paolamai lia pakhaimoe touyu sü nenou ngaolai.”