JOHAN 16 - SHEEYU BAIBEL (BSI)

¹ “Neletaoye panou kao-du tamore donou chi haitaohai Enou neletao hi paopeire.

² Puletao nou neletaoye rathobuhtao hinou hutalai. Cheche vuzünou phasü veloure, süolouzü neletaoye southeayu maitalinou sübüa souyu hai puhnou Ramai kuvah souwe tea cholai.

³ Alia puletao nou Puo moa Eye sümoyu donou vah haitaosü neletao hi soulai.

⁴ Ana Enou haitao hai neletao hi paopeire, süolouzü puletao nou vah sütao soure pha veyu kisü Enou neletao hi sütao vanou paosü peire touyu sü neletao nou liloulai. “Shurai hiwo Enou neletao hi haitao hai paopeimoe, daiolouzü Esü neletaoye koa bue.

Rako Mashi Vah

⁵ Ana chuo Esü Eye seive peiyu puh hi tavelaire; sütoukhai-a neletao hrohinou maita linoua Ahi, ‘Ne daiki vetalai?’ tea noumoe.

⁶ Ana Enou neletao hi haitao paopeiyu donou, neletao lesü veasho loure.

⁷ Ana Enou neletao hi acheche nasü paowe: Enou tayuhai neletao donou veipuhie, daiolouzü E tamo louzü, soukha-apeio nasü neletao hi velaimoe. Ana Enou talouzü, puhye Enou neletao hi seive peilai.

⁸ Alia puhnou veyu kisü, deiphao maiye mah vanou, acheche vanou ea chikuyu vanou puletao hai mahre touyusü panou süloulai:

⁹ mah vanou louzü, puletao nou Eye louche moe;

¹⁰ acheche vanou louzü, Esü Puohi talai, alia neletao nou Eye ngaopukhai laimoe;

¹¹ chikuyu vanou louzü, deiphao hainavei paopuye chi kuwure.

¹² “Enou neletao hi paore alaosou buhie, ana sütao veishi hai neletao nou chu pfüpai louhoe.

¹³ Ana cheche Rako sünanou veyu kisü, puhnou neletaoye acheche teiteihi süthaive peilai; daiolouzü puhnou lah puh mado hinou chi paolai moe, ana puhnou chouyu talisü puhnou paolai, alia puhnou neletao hi thaikhai veretao vanou paopa peilai.

¹⁴ Puhnou Eye soudusho peilai, daiolouzü puhnou Avei nasü poloua sünasü neletao hi paopeilai.

¹⁵ Apuo hi buyu teiteisü Aveie; südonou puhnou Avei nasü poloua sünasü neletao hi paongao peilai tea Enou paowe.

Leveayu ea Lesayu

¹⁶ “Phajütou thaisü neletao nou Eye ngaolaimoe; alia phajütou thaisü neletao nou Eye ngaopu khailai.”

¹⁷ Puh rozümai kamainou alinou lihi noue, Puhnou Eletao hi, “Phajütou thaisü neletao nou Eye ngaolaimoe, alia phajütou thaisü neletao nou Eye ngaopu khailai, alia, ‘Sünahai Enou Puohi tayu donoue,’ tea paoyu hai daie?”

¹⁸ Puletao nou paopukhaie, “Puhnou ‘Phajütou thaisü’ tea paoyu hai daiye paosa? Puhnou dai vanou paosa touyu Eletao nou sümoe!”

¹⁹ Puletao nou puh hi nounüa buyu sü süloua Jisu nou puletao hi paoe, “Neletao hrohinou alinou lihi noua buyu nasü, ‘Phajütou thaisü neletao nou Eye ngaolaimoe, alia phajü thaisü neletao nou Eye ngaopukhailai’ tea Enou paoyu vanouwu?

²⁰ Cheche vuzünou Enou neletao hi paowe, neletaosü kralai ea dopfülai, ana deiphao maiwo le salai; neletao hai le vealai, ana neletao vei le veayu hai panou le sayuhi soudalai.

²¹ Naotumai alinou nare kisü khya soushowe, daiolouzü puhvei veare phasü vere; ana nah sünaye nalouyu thaisü deiphao hi nah ali nakoure tea puhnou le sayu donou puhvei veayu nasü ngaiwu baiwe.

²² Sübüa, neletao hi-a chupha hisü le veayu bue, ana Enou neletaoye ve daopulai ea neletao lesü saloulai, alia maita linoua neletao vei sayu nasü neletao hinou pota laimoe.

²³ “Teithe sükisü neletao nou Ahinou halia kholaimoe. Cheche vuzünou Enou neletao hi paowe, neletao nou hatali Puo hinou kholouzü, puhnou Azhih hinou sünasü neletao hi peilai.

²⁴ Chu koute neletao nou Azhih hinou hatalia khokhai mohie. Khokhaio ea neletao vei asah nasü chekhoure donou neletao nou ngaoloulai.

Deiphao jünou Kolouyu

²⁵ “Enou neletao hi chi haitao hai nada hinou paopeire. Ana Enou neletao hi nada hinou paomoa, Puo vanou dua neletao hi paopei laiyu phasü vere.

²⁶ Teithe sükisü neletao nou Azhih hinou kholai; alia Enou neletao sühsoua Puo hinou kholai tea Enou neletao hi paomoe;

²⁷ daiolouzü Puo lah puhnou neletaoye leshiwe. Puhnou neletaoye leshiwe daiolouzü neletao nou Eye leshiwe ea Esü Apuo hinou ve touyusü neletao nou louche loure.

²⁸ Enou Apuo hinou tashuloua deiphao hi veloure; alia chuo Enou deiphaosü thaowu-a Apuohi vetalai.”

²⁹ Süthaisü puh rozümai taonou puh hi paoe, “Zhukhaio, chuo nenou nada hinou moanou dua pao-are!

³⁰ Nehai ha teitei süwe, alia maitaliye panou nehinou chi nouyu komoe touyu hai chuo Ehnou süre; süna vanou nehai Ramai hinou ve touyu Ehnou louche.”

³¹ Jisu nou puletao hi chila peie, “Chuo neletao nou louchewu?

³² Zhukhaio, neletaosü lahlah kihi poraveloua Eye lah thaokhai laiyu phasü laire, alia chekhaoa pha sünasü veloure. Ana Elah baimoe, daiolouzü Apuonou Eye koa bue.

³³ Eye koa buyu hinou neletao hi kaonayu buloure donou, chi hainahai Enou neletao hi paopeire. Deiphao hisü neletao vea-holai; ana khuveilo! Enou deiphaoye koloure.”