JOHAN 12 - SHEEYU BAIBEL (BSI)

Bethani hinou Jisu ye Theadzü Noupeiyu

¹ Jisu nou Tachonüh vemo jühi teithe arou buyu phahinou puhnou athai hinou souhri peiyu Lazaras nuh Bethani hi tave loure.

² Sühinou puletao nou puhye donou tovai ali souda peie. Martha nou vahva-a bue ea Lazaras-a Jisu ye koa arübuh hinou buyu maitao hrohinou alie.

³ Sükisü Meri nou muhtei shoyu ea kai veishoyu sheetouyu Nard theadzü dzüchovou dali poloua Jisu phihi noupei-a puh peishunou puh phisü posou peire; alia sühisü theadzü sünavei kai avei sünanou phoupei loure.

⁴ Ana puh rozümaitao hrohinou maili, Jisu ye ngaobamai bah hi thoupei laiyu Iskariot Judasnou paoe,

⁵ “Daidonou kaivei theadzü haina hai denarü kaihsü muh zholoua toure hamai hi peimosa?”

⁶ Puhnou sübüa paoyu hai toure hamaiye donou tsüchoa paoyu moe, ana puh hai avaomai ali baiyu donou paobaie ea shavü pokuyu mai ali soua sühi thoukhai touyu taosü puh lah vaoloulou baiwe.

⁷ Ana Jisu nou paoe, “Puh lah panou puh do soukhaio, alia puhye panou sünahai Eye povure teitheki donou pokhailouwo.

⁸ Daiolouzü toure hamai taoye neletao nou teisa koa bulai, ana neletao nou Eye koa teisanou bulai touyu moe.”

Lazarasye Southeare Do Phouyu

⁹ Jisu hai Bethani hi bue touyu kosü Jihudimai maisounou sülouyu kisü, puletao nou puhye donou likheibai moa puhnou athai hinou souhri peiyu Lazarasye-a zhure donou tave loure.

¹⁰ Südonou napao adumai taonou Lazarasye-a southeare donou do phouloure,

¹¹ daiolouzü puh vanou Jihudimai taolisü puletaoye thaowu-a Jisu ye nou louche tare.

Jisu nou Kolouyu Asah hinou Jerusalem hi Talouyu

¹² Thainaisho kisü nühbuh hi tavelouyu maisounou Jisu-a Jerusalem hi veloure donou laire touyu kosü chouloure.

¹³ Südonou puletao nou habo poloua puhye daore donou tapare alia shusoua shaloure, “Hosanna! Mapao zhih hinou tave louyu, Israelmai Veo puhsü rako veie!”

¹⁴ Alia Jisu nou rheisüh toutu ali ngaoloua süna phaohi pabu loure; daiolouzü sheeyu larübvü hinou haikua rüthouwure,

¹⁵ “Piso, Zion hi nah naotupai; Zhukhaio, nevei Veosü Rheisüh toutu ali phaohinou bua tavewe!”

¹⁶ Sükisü puh rozümai taonou hainavei ko alia sükhai moe; ana Jisu nou adusho hi hrishu louyu thainou, haina hai puh vanou rükhaitoue ea haisü puletao nou puh hi soupeire touyusü puletao nou sükinou liloure.

¹⁷ Jisu nou Lazarasye khüh hinou kupaloua puhye athai hinou souhri louyuki puhye koa buyu maisounou süna vanou zhopaoh soloure.

¹⁸ Maisounou puhye daore donou taveyu qo louzü puhnou shee hainasü soushe tea chouyu donoue.

¹⁹ Südonou Phariseemai taonou alinou lihi haibüa paoe, “Nele-a chokhaio, Eletao nou halia soulou hore! Zhukhaio, deiphaomai hrülainou puhthai fütakhaire.”

Greek Mainou Jisu ye Phouyu

²⁰ Alia nühbuh hi rathore donou tave loulouyu maikhemai hrohisü Greekmai kamaia louwe.

²¹ Südonou mai haitaonou Galilee hi Bethsaida nuh hinou veyu Philip hi taveloua puh hi paoe, “Dou-apeio, Ehnou Jisu ye daonüwe.”

²² Philip nou taho Andrew hi paopeie, ea Andrew nou Philip ye koa taho Jisu hi paopeie.

²³ Alia Jisu nou puhai hi chila peie, “Mai Nahpoutu nou kathe souloure phasü veloure.

²⁴ Cheche vuzünou Enou neletao hi paowe, southou pfüli hai deiphihi dekou louloua thaimosa süna lah bubaiwe; ana sünasü thaita louzü thou alaosou shilouwe.

²⁵ Lah puh hrümaiye leshi baiyu mai sünou sünasü habailai, alia deiphao haina hinou lah puh hrümaiye ngaorayu mai sünou sünahai teisa hrire donou pokhai loulai.

²⁶ Maita linou Akuvah soulouzü, puhnou Athai füvuzülai; alia Enou buyu buh hisü Akilai-a bulai; maitalinou Akuvah soulouzü, Apuonou puhye tsükhoulai.

Jisu nou Puhvei Athai vanou Raia Paoyu

²⁷ “Chuo Alehai veasho loure, alia Enou dai paolai? ‘Apuo, pha teile haina hinou Eye khaipapeio’ tea Enou paolaiwu? Moe, soure vah haina donou Enou pha hainahi velou loure.

²⁸ Apuo, nezhih adusho soulouwo!” Sükisü rakinou paili shakoue, “Enou sünahai soudusho peire, alia Enou sünahai soudusho pupeilai.”

²⁹ Sühinou la-a buyu maisounou pai sünasü choue ea puletao kamainou sünahai teisüwe tea paoe. Ana kukhe mainou sünahai, “Rakivamai alinou puh hi chi paobaie!” tea paoe.

³⁰ Ana Jisu nou puletao hi paoe, “Pai haina hai Eye donou moe, ana neletaoye donou baie.

³¹ Chu deiphao hainaye chikure pha nasüe, chuo deiphao hainavei paopuye hutawulai.

³² Alia Eye deiphi hinou polashuyuki, Enou mai hrülaiye Ahi paivelai.”

³³ Puhnou haibüa paoyu hai kakuyu athai zhaido hinou puh hai thailaisa touyu pongaobaie.

³⁴ Maisounou puh hi chila peie, “Ehnou razhai hinou Khrista hai teisanou hrilai tea choue. Sükulouzü nenou kakua Mainah Potuoye sü polashu vuzülai tea paowe? Mai Nahpoutu hainasü thaoh-e?”

³⁵ Jisu nou puletao hi chila peie, “Phajü donou ava nasü neletaoye koa bupulai. Avana bubu kinou neletao nou takhaio, molouzü teizhi nanou neletaoye nulou shulai; teizhi hinou tayu mai sünanou puh hai daiki tahosa touyu sümoe.

³⁶ Neletao hi avana bubu kinou, ava nahmaitao souloure donou neletao nou ava naye sü louchelo.” Jisu nou chi haina paocheyu thaisü, puh lah puletao hinou taloua tutsü loure.

Jihudimainou Louche moyu

³⁷ Puhnou shee alaosou puletao nghojühi soungao peiyuma, puletao nou puhye louche peimoe.

³⁸ Sünahai Isaiah rachi paolawo vei chipao sü vetere donoue: “Mapao, thaohnou Eh vei Chipao louche peie? Alia thaoh hi Mapao nou puhvei Khouko pongao peie?”

³⁹ Alia südonou puletao nou louchelou hore, daiolouzü Isaiah nou paopukhaie:

⁴⁰ “Puhnou puletao nghithou souchare ea puletao le soukhoure, sükumo louzü puletao nou puletao nghithounou ngaolou shulai ea puletao lenou sülou shulai, alia puletaoye souvei peire donou Ahi khaive shulai.”

⁴¹ Isaiah nou haisü paoe, daiolouzü puhnou Jisu vei adusho sü ngaoe ea puhnou puh vanou paopeie.

⁴² Sütoukhaia, Jihudimai peichamai koutea mai alaosou puhye loucheloue, ana Phariseemai taoye piyu donou puletao nou sünasü dua paopamoe, molouzü puletaoye rathobuh hinou huta shulai;

⁴³ daiolouzü puletao nou Ramai nou shoyuna jünou mainou shoyuna-a züpahie.

Jisu vei Chipaonou Chikuyu

⁴⁴ Alia Jisu nou paikushoa shapae, “Eye loucheyu mai talinou Eye likhei louche baimoe ana Eye seiveyu puhye-a louchewe.

⁴⁵ Alia Eye ngaoyu mai talinou Eye seiveyu puhye-a ngaowe.

⁴⁶ Eye loucheyu talinou teizhihi bumore donou, Enou ava büa deiphao hi velouloue.

⁴⁷ Maita linou Achipaotao chouloua sütao hai zümo louzü, Enou puhye chiku moe; daiolouzü deiphao maiye chikure donou Enou vemoe, ana deiphao maiye khaipeire donou vebaie.

⁴⁸ Eye laiyu ea Achipao pobayu mai sünaye chikuremai ali bue. Enou paopa khaitouyu chipao nanou akhai teitheki puhye chikulai!

⁴⁹ Daiolouzü lah Amadonou chi paopamoe; ana Eye seiveyu Apuonou dai paolai ea kabüa paolai touyu chikhasü Ahi peikhaitoue.

⁵⁰ Alia puhvei chikhahai teisa ahrina süe touyu hai Enou süe. Südonou Enou paoyu talisü Apuonou Ahi paopeiyu büa Enou paobaie.”