JOHAN 1 - SHEEYU BAIBEL (BSI)

Ahri Chipao

¹ Shurai nou Chipao hai bue, Chipao hai Ramaiye koa bue, alia Chipao hai Ramaie.

² Puh hai shurainou Ramaiye koa bue.

³ Na teitei hai puh vanou souloue, alia soukhai touyu taosü puh loumoa hatalia soulou moe.

⁴ Puh hisü ahri bue, alia ahri nasü maikhemai vei ava nasüe.

⁵ Ava nanou teizhi hi vapeie, alia teizhi nanou sünaye kolou moe.

⁶ Teile lihi Johan tea kuyu Ramai hinou seiveyu maili bue.

⁷ Puhnou ava navei zhopaoh soure donou, süolouzü puh vanou panou mai hrülaiye louche loure donou, puhnou zhopaoh donou ve-e.

⁸ Puhwo ava süna moe, ana ava navei zhopaoh soure donou ve-e.

⁹ Mai hrülaiye souva peiyu checheyu ava nasü deiphao hi velou loure.

¹⁰ Puh hai deiphao hi bue, alia deiphao hai puh vanou souloue, ana deiphao mainou puhye sülou moe.

¹¹ Puh sü lah puh kihi ve, ana lah puh mainou puhye sü popei moe.

¹² ana puhye polouyu mai hrülai hisü, süolouzü puh zhih hinou louche louyu maitaoye, puhnou Ramainah panou souloure khouko sü peire.

¹³ Puletao nalouyu haiolouzü zhe hinoua, vasounou li-choyu hinoua, moa mainou li-choyu hinoua moe, ana Ramai hilonoue.

¹⁴ Alia Chipao sünasü vasou daloua zhuvea ea achechenou phoupeia alia Eletao nou puh vei khouko-ava hai Puo hinou veyu likhuyu Nahpoutu vei khouko-ava kua ngaoe.

¹⁵ Johan nou puh vanou zhopaoh soua sha-a paoe, “ ‘Athainou veyu puhnou Ajünou duhie, daiolouzü puh hai Ajünou raia bue,’ tea Enou paoyu mai nasü hainare.”

¹⁶ Alia puh vei phoupeia buyu zhuveana hinou Eletao hrülainou zhuvea peinou zhuvea nasü ngaoloure.

¹⁷ Daiolouzü razhai nasü Moses vanou peie; ana zhuvea ea acheche na louzü Jisu Khrista vanou ve.

¹⁸ Maitalia Ramaiye ngaokhai mohie; Puo ngheikinou buyu likhuyu Nahpoutu puhnou Ramaiye süngao peire.

Johan Baptist vei Chipao

¹⁹ Alia Jerusalem hinou Jihudimai taonou Johan hi napaomaitao ea Levi maitaoye seive-a panou puh hinou, “Ne thaoh-e?” tea ve nouyuki Johan nou haibüa zhopaoh peie.

²⁰ Puhnou paopae, puhnou bamoe, ana sheesha-a paopeie, “Ewo Khrista moe.”

²¹ Alia puletao nou puh hi noue, “Sükulouzü ne thaoh-e? Ne Elijahwu?” Puhnou chila peie, “E moe,” Puletao nou noupukhaie, “Ne rachi-paolamai sünawu?” Puhnou chila peie, “Moe.”

²² Puletao nou puh hi paoe, “Sükulouzü ne thaoh-e touyu Eletao hi paongao peio. Eletaoye seiveyu maitaohi paore donou chilali peikhaio. Nelah neyenou thaoh-e tea paoe?”

²³ Puhnou paoe: “Isaiah rachi paolawo nou paoyu kua, ‘Mapao vei ludu nasü souzülo!’ tea rükounou mailinou shayu pai nasü E-e.”

²⁴ Puletao hai Phariseemaitao hinou seive.

²⁵ Puletao nou puh hi noue, “Sükulouzü nehai Khrista-a, Elijah-a moa rachi-paolana-a molouzü daidonou nenou dzükhao dapeiwe?”

²⁶ Johan nou puletao hi chila peie, “Enou dzünou dzükhao dapeiwe; ana neletao hrohinou neletao nou sümoyu maili la-a bue.

²⁷ Puh hai Athainou laie, ana Ewo puh phikharai pheipayu koutea khamoe.”

²⁸ Chiphayu haihai Johan nou dzükhao da-a buyu buh Jordan rei teinghi palova Bethani hinoue.

Ramai Zhaotu

²⁹ Thainaisho kisü Johan nou Jisu hai puh hilo taveyu ngaoloua paoe, “Zhukhaio, deiphaomai mah pota peiyu Ramai Zhaotunaye sü!

³⁰ ‘Ajünou duyu maili Athainou lai-e, daiolouzü puh hai Ajünou raia bue,’ tea Enou paoyu nasü hainare.

³¹ Ewo louzü puhye sümoe; ana puhye Israel maitao hi pongao peire donou Enou dzünou dzükhao dapeia ve-e.”

³² Alia Johan nou zhopaoh peia paoe, “Enou Rako hai khao büa raki vanou kou-a puh pei hi kou tao-a buyu ngaoe.

³³ Ewo louzü puhye sümoe; ana dzünou dzükhao dapeire donou Eye seivepeiyu puhnou Ahi paoe, ‘Rakonou kou maili peivahi taoa buyu nenou ngaolai; puh hai Rako Mashinou dzükhao dapeiyu mai sünasüe.’

³⁴ Enou süsü ngaoloure ea zhopaoh soua paowe süolouzü haina hai Ramai Nahpoutue.”

Jisu Rozümai Raikaitao

³⁵ Süthaia, thainaisho sü Johan nou puh rozümai ahaiye koa la-a bue,

³⁶ alia Jisu nou ta-a buyu sü ngaoloua puhnou paoe, “Zhukhaio, Ramai Zhaotu naye sü!”

³⁷ Puh rozümai ahai nou puhnou sükua paoyusü choulou-a Jisu thaifü tare.

³⁸ Jisu nou thailo reiveyu kisü puhai nou puh thai fülaiyu ngaoloua puhaihi noue, “Nehai dai phouwe?” Alia puhai nou puh hi chila peie, “Rabbi” (süolouzü Dou-apeio toue), “Ne dai kinou bue?”

³⁹ Puhnou puhai hi paoe, “Taveloua zhukhaio.” Puhainou taveloua puhnou buyu buh sü ngaoloure; alia süzhousü puhai nou puhye koa chaobaire, daiolouzü sükisü koukhe teilecho adai tayu phahi koure.

⁴⁰ Johan nou paoyu chouloua Jisu thai fülouyu mai ahai hinou alina louzü Simon Pitar thaihou Andrew-e.

⁴¹ Puhnou raikaia puh jürai Simon ye ngaoloua puh hi paoe, “Ehwo Razhepuye ngaoloure” (süvei kowo louzü Khrista toue).

⁴² Süthaisü puhnou Simon ye Jisu hi save. Jisu nou puhye zhuloua paoe, “Newo Johan nahpoutu Simon-e, ana neye Kephas tea kulai.” (Haihai Pitar touyu kheihaoe, süvei konou “Chuh” toue.)

Jisu nou Philip ea Nathanel ye Kulouyu

⁴³ Thainaisho sü Jisu nou Galilee hi talai tea le laloure. Alia puhnou Philip ye ngaoloua puh hi paoe, “Athai fülo.”

⁴⁴ Philip hai Andrew ea Pitar nou hrüyu Bethsaida nuhdu hinou ve-e.

⁴⁵ Philip nou Nathanel ye ngaoloua puh hi paoe, “Moses nou razhaibvü hinou ea rachi paolamai taonou puh vanou rükhai touyu puhye sü Ehnou ngaoloure. Puh hai Nazareth hi Josef nahpoutu Jisue.”

⁴⁶ Nathanel nou puh hi paoe, “Nazareth hinou avei tali palou süwu?” Philip nou puh hi paoe, “Taveloua zhukhaio.”

⁴⁷ Jisu nou Nathanel hai puh hilo takouyu ngaoloua puh vanou paoe, “Zhukhaio, haihi checheyu Israel maili bue; puh hisü le sheemoyu alia hae!”

⁴⁸ Nathanel nou puh hi noue, “Nenou Eye kabüa süloue?” Jisu nou puh hi chila peie, “Philip nou neye kumo jühi nenou doushibe phihi bubu kinou Enou neye ngaoe.”

⁴⁹ Nathanel nou puh hi chila peie, “Rabbi, newo Ramai Nahpoutue! Newo Israel mai Veo süe!”

⁵⁰ Jisu nou puh hi paoe, “Enou neye doushibe phihi bubu kinou ngaore tea ne hi paoyu vanou ne louchewu? Nenou hai jünou adu dulih ngaolai hie!”

⁵¹ Alia Jisu nou puletao hi paoe, “Enou neletao hi chichenou paowe, neletao nou raki houpayu alia rakivamai taonou Mai Nahpoutu peinou takou takheyu ngaolai.”