JOEL 3 - SHEEYU BAIBEL (BSI)

Tyahrütaoye Mapao nou Chikure

¹ Mapao nou paoe, “Zhukhaio, süzhou teithe Enou Judah alia Jerusalem ye vasayu sü peida khailai.

² Enou tyahrü teiteiye save jüloulai alia Jehoshaphat deikho hi save khailoulai, alia Avei maitao ae A kaalo thaolaiyu Israel mai vanou puhtao pei hi chikulai, daiolouzü puletao nou A maiye tyahrütao hrohi hurarou laipeie, ae puletao nou Avei dei sü zhiloure,

³ alia puletao nou Amai pei hisü rako zhu-e, ae poutu mai-a khakhare donou peiwe, alia naotu maiye sü zhaoh nou zholoure, sübüa puhtao nou zhi-a laire.”

⁴ “Ne ahi dai soulai tiwe, Oh Tair, ae Sidon, alia Philistia vei deizhe hi buyu maitao? Ne Eye hali peidakhailai tiwu? Ne nou ahi peire bulouzü, Enou ne vah thaifüa neye thashoa dakhai peilai.

⁵ Daiolouzü nenou avei shahu alia sana, alia avei kini khesü nevei rathoki hi pove khailoure.

⁶ Neletao nou Judah alia Jerusalem hi amai khesü puletao vei deirai hinou doushoa Grik mai bah hi zhothou peire.

⁷ Ana chuo, Enou puletaoye sü pa neletao nou zhothou peiyu teidei nasü thaowua talai, alia neletao nou soukhai touyu vahna thaifüa E-a neletao hisü soudakhai peilai.

⁸ Enou ne nahpoutu ae naotutaoye sü Judah mai bah hi zhothou peilai, alia puletao nou ne nahpoutu ae naotutaoye sü dousho-a buyu Sabean tyahrü mai hi zho dakhai thoupeilai; daisounou touyuo haisü Mapao nou paoe.

⁹ “Haihai tyahrütao hi paopei khaio: ‘Reih soure donou soudalouo, soureih souveiyu maiye süpeira-o. Reih mai hrülaiye sü kujülou khaio, pa puletao ye sü tashulouo.

¹⁰ Nevei hukai nasü khoche kulouo, alia ne phou nasü poa ngheu soulouo; ae lülouho maiye panou “E reih veimaie” teanou paokhaio.

¹¹ Thasho-a tavelou khaio, pehao hinou buyu tyahrü hrülaiye panou vejü loukhaio.’ ” Oh Mapao, nevei reihmaiye sü sakouh khaio.

¹² “Tyahrütaoye pa lah puletao le souhro loua lashukhaio, alia pa Jehoshaphat deikho hisü taveo; daiolouzü sühinou Enou buloua süpehao buyu tyahrü khesü chikulai.

¹³ Kai polouo, daiolouzü dourou sü meire. Talou taidei khaio, daiolouzü darkha shithou khesü phoutao-a bure. Zhaochi sü phoutao-a külyare, daiolouzü puletao nou ashi vah souyu sü dushore.”

¹⁴ Mai thethe thethe nou chiku laiyu deikho hisü bure! Daisounou tiyuo, chila peilaiyu deikho hisü Mapao vei teithe hai nghitei toure.

¹⁵ Teinghi alia khouh sü zhitare, alia teivutao hai-a vamo tare.

Ramai nou Puh Maiye Shiha Peilaiyu

¹⁶ Mapao nou Zion hinou sha-e, alia Jerusalem hinou puhnou paoe, ae raki alia deiphao sü pingure. Ana Mapao hai puhmaitaoye donou bailoure bue, alia Israel maivei reih khoyu füe.

¹⁷ “Süthaisü neletao nou süloulai, E hai neletao vei Ramai Mapao-e, sheeyu Zion deichi hinou bue touyu. Alia Jerusalem hai sheeyu bue, ae vakou mainou buh sühi loupu khailoulai moe.

¹⁸ “Süzhou teithe sü dzüyu darkha dzünou deichi vanou yaokoulai, ae deitao khesü chonaodzü nou külai, alia Judah hi reitou teitei nou dzü külai; Mapao ki hinou dzüla ali palai, alia Akasia Deikho sü dzünou züpeilai.

¹⁹ “Ejipt hai mainou hrülou shiyu dei soutalai, alia Edom haisü kitayu rekou soutalai, daiolouzü mah lia hayu Judah maiye souveawure alia southawure.

²⁰ Ana Judah louzü teisa nou mai hrülou veiyu buh souwulai, alia Jerusalem hai bonakha koutea sühinou hrülai.

²¹ Puletao nou zhe soukouhyu khü sü Enou phoulai, alia puletao mah sü Enou khaipei laimoe, daiolouzü Mapao E hai Zion hi bue.”