JEREMIAH 9 - SHEEYU BAIBEL (BSI)

¹ Oh apei hai dzübvü ali-e tulouzü, ae anghithou hai dzüla toulouzü, Enou Amaitaoye southayu vanou hea-khei sümoa kra-a bua bailai.

² Enou radeiki hinou buloure buh bulouzü Amaitaoye thaowu-a sühinou tuho bua bailai. Daiolouzü puletao mai hrülai nou louchelou shire, dazhuyu maime baire.

³ Puletao hai teile busasü dayu chi paore donou bua baire; cheche-a teidei khore thaosü tsüle shee more. Mapao nou paoe, “Avei maitao nou vah ashi souyu thainou soupu khaikhai-a baire, ae E hai puletao vei Ramai nasüe touyu süpei more.”

⁴ Mai hrülai nou kinapatao hinou kailo, ae thaihou jürai maitaoye louche khaiso; daiolouzü thaihou jürai mai hrülai nou Jakob büa dare, ae mai hrülai nou lahvei samai khamai hi da-a baire.

^5-6 Puletao mai hrülai nou samai khamaiye süthaimah peia baire, ae mai linoua cheche chi paomore; puletao nou dayu chi paore donou doupeiwe, ae puletao nou mah soua buyu nasü baibare. Puletao hai tobai soumoa züva-a bure, ae dazhuyu thainou dakhai dakhai-a baire. Mapao nou puhvei maitaoye malaire tea puhnou paowe.

⁷ Haivanou Khoukhoulai Mapao nou haibüa paoe, “Enou avei maitaoye sü hu ali mei hinou dei-a zhai zhuyu büa zhulai. Amaitao nou hashi khesü soupfüre — Enou puletao hi dai soupu peire bue?

⁸ Puletao vei mali sü thailou veiyu vouloushu kue; teisa nou dayu chi paobaiwe. Mü hi louzü kinapa mai hi kaonayu chi paowe, anou le khevai louzü soushi peire donou da-a baiwe.

⁹ Haidonou puletaoye E tudee zümovu? Haibüyu tyahrü ali pei hi Enou khüngu phou laimowu? Haisü Mapao Enou paowe.”

¹⁰ Enou paoe, “Enou deichitao donou dopfülai ae heiphaotao donou kralai, daiolouzü buh sütao sü kitare, ae mai linoua veihao soua tamore. Hrikhaona vei pairo-a choupu more; tei hi raohou ae rekhaona teitei-a tuta khaire.”

¹¹ Mapao nou paoe, “Enou Jerusalem sü tangina khaiyu buh ali soupeilai, ae lakhaotao panou bure buh soupeilai; Judah vei nuhdu khesü radeiki hi soudathou peiwulai, mai panou hrüloushi buh ali soupeilai.”

¹² Enou chinoue, “Mapaowo, daisounou teidei taosü soushi khaiwure ae thekei tea panou radeiki vita-a mai lia panou veihao soulou shiwe? Thaonou tsü veisho-a haitao sü sükulou süyu bue? Thao hi paopei-a haitao hai paopa peilou süyu bue?”

¹³ Mapao nou chila peie, “Enou peikhai touyu avei chikha taosü avei maitao nou laiwure, ae achi sü zümore, alia Enou puletao hi paopeiyu sü soumoyu donou haitao sü vepare.

¹⁴ Puletao nou rochi sholoure ae puletao vei puopao maitao nou doupeiyu büa Baal vei bashara sü tho tare.

¹⁵ Südonou Israel maivei Khoukhoulai Ramai Mapao nou soulaiyu sü keilo: Enou avei maitaoye khataoyu vupou peilai ae kelou-a thailou veiyu poudzü nou pa kelai.

¹⁶ Enou puletaoye puletao nou moa puletao vei puopao mainou sümoyu tyahrütao hrohi sourarou peilai ae puletaoye southa khaimo koute khochenou poa panou ngoure donou reihmaitao sü seive peilai.”

Jerusalem hi Maitao nou Kra-a Soukha Khoyu

¹⁷ Aku kulai Mapao nou haibüa paoe, “Vepayu vah haso khesü lichokhaio! Dopfüa kra peire mai kulo, kouli lilou süyu naotu maitaoye kulou.”

¹⁸ Maikhe maitao nou paoe, “Etao ngheidzü soukou peiloure donou, ae nghithou hi panou ngheidzü phoupei loure donou thasho-a puletaoye panou velou kouli lipei khaio.”

¹⁹ Zion hinou kra-a kouli liyu pai sü kei khaio, “Etaoye soushi khaitoure! Esü hrao hraodu ngaore! Etao vei teidei sü thaowua ta-a bailaire; daiolouzü Etao vei ki khesü souha laiwure.”

²⁰ Enou paoe, “Oh naotu maitaore, Mapao vei chipaotao sü keikhaio, ae puhvei chipaotao sü keilo. Neletao vei nah naotu maitaoye kabüa dopfüa kralai touyu sü doupei khaio, ae samai khamaitao hi kabüa kouli lilai touyu sü doupeio.

²¹ Daiolouzü athai sünou Etao vabomü hinou velou loure, ae Etao vei vebuh hisü velou loure, hai nanou maisou ludu hi buyu nahmaitao sü souhawure, ae hupobu kinou nahle maitaoye southare.

²² Thaiphao sü buh veishi hi lairarou khaitoure, tangiyu na ali büa bure, dou vayu mainou chachi lou-a deraikou khaitouyu roukotao büa bure. Haisü Mapao nou paowe.”

²³ Mapao nou haibüa paoe, “Tsüveiyu maitao panou puletao vei tsüsü vanou khaophu souso, moyuma khouko buyu maiye panou puletao vei khouchi vanou khaophu souso, moa toungiyu mai panou puletao vei kini vanou khaophu souso.

²⁴ Ana mai talinoua khaophu soulai toulouzü Eye süyu hinou panou khaophu soulo, daiolouzü Avei leshi hai tobai soumoa bukoute peilai, ae Enou acheche ae kaozü vah sü soupeilai. Enou jüpayu vah sü haitaore. Haisü Mapao Enou paowe.”

^25-26 Mapao nou paoe, “Zhukhaio, Enou hee rodeyu mai-a hee rodemoyu maiye koa tudee laiyu teile sü velaire — süolouzü Ejipt mai, Judah hi mai, Edom mai, Ammon nahpoututao, Moab maitao, alia radeiki hinou peishu bijüpfüa hrüyu mai hrülaiye souvea peilai; daiolouzü mai haitao nou hee rodewure, ana vo soukhai touyu nasü tsükhou peimoe. Mai haitao alia Israel maitao nou Eye koa vo soukhai touyu nasü pfüthowure.”