JEREMIAH 8 - SHEEYU BAIBEL (BSI)

¹ “Sükisü Judah hi vemaitao ae peikho maitao vei rao, alia napao maitao vei rao, rachipaola maitao vei rao, ae Jerusalem hinou hrüa buyu maitao rao khesü puletao vei khüh hinou pophawulai.

² Sütaosü puletao nou leshi-a kuvah soutayu, alia thaihua phoutayu khouh teinghi, alia vuhtao hi popa rapha khaipeilai, puletao vei rao khesü poku khaipeilai moe, porarou laiwulai, sütao sü deiphi hinou tanguyu natao soutalai.

³ Ashi soua buyu tyahrü haina hinou shokhaitoua hria buyu maitao, Enou hupoho khaitouyu buh hinou hrüyu maitao hai hri-a buyu jünou thaiyu na-a jüpa pulai. Haisü Mapao Enou paowe.”

Mah ae Tudeiyu

⁴ Mapao nou puhvei maitao hi haibüa paopeio tea ahi paoe, “Mai alinou kaodu talouzü, puhnou kushupu loumowu? Mai alinou ludu tamah talouzü, puhnou dakhai velou movu?

⁵ Sükulouzü, daisounou avei maitao hai ahi dakhai vemoe? Puletao nou dayu nasü taotei touloure, ahi dakhai vebare.

⁶ Enou lenousou-a keia bue, ana puletao nou acheche chi paokhai moe. Mai ali koute-a vah ashi souyu hinou levea more; mailia ‘Enou daio soumahwure?’ tea noumoe. Rhei alinou reihbu hi tukou tayu büa mai hrülai sü lahkuku nou sounü pfünü hisü ta-a bubaire.

⁷ Tei hi raohou koutu koutea lah puletao vei teile süwe; teile thaifüa budatayu raohou taonou puletao teile sü-a datawe. Anou avei maitao nou Enou puletaoye khasa-a hrüyu chikha khesü sülou more.

⁸ Neletao hai kabüa ‘Ewo tsü veiwe, ae Mapao vei chikhatao sü süwe’ tea paolouwe? Zhukhaio, chikha khesü tsüle sheemoyu larü rümaitao nou mada-a rüpeiwure.

⁹ Neletao hi tsüvei maitaoye souhao peiwure. Puletao tsüsü souhao peiwu-a panou shorü hinou muloure. Puletao nou avei chipao khesü pobare. Sükuyu thaisü, puletao vei tsüsü nasü daiki bue?

¹⁰ Südonou Enou puletao vei ki-lu ae chapfü maitao sü mai kukhe hi peiwulai. Daiolouzü taidu sümoa mai hrülai nou chi zü moyu hinou dutou nüre ae viyu sü phou-a baire. Rachipaola maitao ae napao mai koutea maikhe mai hisü da-a baire.

¹¹ Puletao nou amaitao vei zhilouyu zhimü sü hazholia moyu büa popeia baie. ‘Veimoa bulukhu hai veishi nou vei-a baie,’ tea puletao nou paoe.

¹² Avei maitaore, neletao nou vah ashi souyu sü maijü hraomovu? Moe, neletao hai haokhai timore, neletao hai haongu-a pfülou sümore. Südonou Enou neletaoye tudeeyu phaki, neletao hai kaotayu mai büa kaodu talai, ae neletao vei teile akhai soulai. Haisü Mapao Enou paoe.”

¹³ Mapao nou paoe, “Tatamai ali nou chachi pove jükhaiyu büa Enou avei maitaoye sü pove jükhai lounüe; ana puletao hai darkhabe rashithou ali-a taomoyu büa baire, ae doushibe hi thou lia taomoyu büa baire; süünghou koutea kitakhai toure. Südonou Enou puletao vei teidei sü vakou maiye panou poloure.”

¹⁴ Ramai vei maitao nou haibüa noue, “Daisoua etao ngasoua hai hinou chobue? Tapaloulai she, Etao veishoa soukhai touyu nuhdutao hi tuholou laikhe, ae sühinou ve thaia bailai khe. Daiolouzü Eletao vei Ramai Mapao pei hi Etao nou mah souyu donou puhnou Etao panou hakare donou ae thaire donou Etaoye poushi sü kere donou peiwure.

¹⁵ Etao nou kaonayu ae souvei peiyu teile nasü vuzhia nou bue, ana havei liro vemore, ngaopiyu sünou vea baire.

¹⁶ Dan nuhdu hisü ngaoba maitao nou ve buloure; puletao vei rhei nou rayu pai sü Etao nou choue. Puletao vei rhei nou rayu kho sü choulou-a teidei veishi nou pi-ngu loure. Etao ngaobayu maitao nou Etao vei teidei ae sühi buyu na veishi alia mai hrülaiye souhawure donou veloure.”

¹⁷ Mapao nou paoe, “Zhukhaio, Enou neletao hisü nghou seive peilai, sei-jülou hoyu tushi shoyu khaonghou khesü seive peilai, ae sütao nou neletaoye daopeilai.”

Jeremiah nou Puhvei Maitao donou Doyu

¹⁸ Avei veayu hai sü souvei louhore;

¹⁹ Keikhaio! Teidei veishi hinou Amaitao nou kra-a buyu pai sü Enou choue, “Mapao sü Zion hi bumovu? Zion hi veo sü sühi bumodou?” Puletao vei veo, Mapaonou haibüa chila peie, “Neletao daidonou basharatao tho-a Alekha soupawe, ae komoyu vakou maivei rah khesü thowe?”

²⁰ Maikhe mainou kra-a paoe, “Chachiyu sü chere, Hou teile sü tacho tare, ana Etao louzü khailulou mohie.”

²¹ Avei lethou sü pepore, daiolouzü amaitao sü zhipeiwure; Enou dopfüa kra-e, veayu ae chathaiyu nou A hisü phouloure.

²² Gilead teidei hi souvei peiloure pou harevu? Sühisü pou apeimai ngaolou hodou? Bulouzü daidonou zhikhai touyu Amaitaoye souvei peimoe?