JEREMIAH 7 - SHEEYU BAIBEL (BSI)

Rathoki hinou Jeremiah nou Chi Paoyu

¹ Mapao vei chipao Jeremiah hi haibüa nou ve-e:

² Mapao vei ki hi talouyu robomü hinou laloua chipao haitao sü shangao peie: “Mapao ye tholai tea robomü hai hinou talouyu Judah mai hrülai, Mapao vei chipao sü keikhaio.

³ Israel maivei Ramai Mapao nou haibüa paoe, ‘Neletao vei hrü ae vah shovei taosü soudalo, süku loure toulouzü Enou neletaoye buh hai hinou panou hrülai.’

⁴ Neletao nou haibüa dayu chipao sü louchewusou, ‘Etao louzü kaozhou vei-a bailai! Haisü Mapao vei Rathoki-e, hai nasü Mapao vei Rathoki-e, hai hai Mapao vei Rathokie!’ ”

⁵ “Neletao vei hrü dalo ae neletao nou soupfüyu vah khesü bailo. Ali nou ali hi cheche vah soulo.

⁶ Vakou mai hi, pfüpuo hayu maitao hi, ae mimeamai pfütaoye souvea souchoro peiso. Teidei hai hinou mahmo soumoyu maiye southapuso, ae rah kukheye thopuso, daiolouzü sütao nou neletaoye souha-a bailai.

⁷ Neletao nou hrü daloure toulouzü, neletao vei puopao maitao hi teisa vei souloure donou peikhai touyu teidei hisü Enou neletaoye panou hrülai.

⁸ “Zhukhaio, neletao nou cheche moyu chipaotao sü louchewe.

⁹ Neletao nou maivei vao, taitha datha, khulou sou, dahrührüa chaachou sou, Baal rah hi poukeivei meideia posheela, ae neletao nou sümoyu rahtao thaifü talou,

¹⁰ ae Enou ngaorayu vah souloua rathoki hai hi tave anghoujü nou lalou-a azhih kua haibüa paowe, ‘Etao louzü kaozhou vei-a bailai!’

¹¹ Avei Rathoki hai neletao nou maivei vaoyu maitao vei tutsüyu buh alie tea tsüchowu? Neletao nou soupfüyu vahtao sü Enou ngaowe.

¹² Enou rairailai soua dopa khaitouyu Shiloh nuhdu nasü taho zhukhaio, ae avei Israel maitao nou mahmo souyu donou soupei khaitouyu vahtao sü taho zhukhaio.

¹³ Neletao nou vah ashi haitao teitei sü soupfüre, ae Enou neletao hi paoyu thainou paokhaikhai-a neletao nou keipei bare. Enou neletaoye kuyu phaki, neletao nou khüpei moe.

¹⁴ Südonou Enou Shiloh hi souyu büa neletao nou louche-a buyu avei Rathoki haina hia soupeilai. Buh hai nasü Enou neletao vei puopao maitao hi ae neletao hi peikhai toue, ana Enou Shiloh hi souyu zhaibüa soupeilai.

¹⁵ Enou neletao thaihou jürai soua buyu Israel maitaoye hulaiyu büa neletaoye avei nghingao hinou hulaiwulai. Haisü Mapao Enou paowe.”

Maikhe mainou Paochi Zübayu

¹⁶ Mapao nou paoe, “Jeremiah, mai haitao donou veachi paoso. Puletaoye donou kraso moa veachi paokhasou; puletaoye donou halia ahinou khoso, daiolouzü nenou kho-a buyuma Enou kei peilai moe.

¹⁷ Puletao nou Judah nuhdutao hinou ae Jerusalem vei ludu khonou daivah souwe touyu ne ngaomovu?

¹⁸ Puletao nou Rakiva Vepfüpai tea kua buyu rah pfüpaiye raokhao khaolou-a sheelare donou nahmaitao nou süü raowe, puo maitao nou mei souwe ae pfü maitao nou sou shaoloua raokhao souwe. Puletao nou avei lekha rarou soupeire donou rah kukhe hia zhaoh nghou peiwe.

¹⁹ Ana puletao nou haitao sü avei lekha rarou soupa peilai tea souwu? Moe, puletao lah puletaoye zhiloua baie ae lah puletao hi hraongu sü poveloua baie.

²⁰ Südonou Ramai Mapao Enou Rathoki haina hisü avei lekha rarou lakou peilai. Avei rarou nasü maikhe maitao hi ae kikhaorütao hi, alia süübetao ae shina maratao pei hia raibütoua koupeilai. Avei lekha rarou nasü mei büa taolai, ae mai linoua hai nasü souhei loulai moe.

²¹ “Avei maitaore, posheelabu hinou meidei-a posheela peiyu kamai-a neletaoye panou toure donou soupei khaitoue. Ana Mapao Enou paowe, sülouzü posheela peiyu veishi sü lah neletao nou touloua baio.

²² Daiolouzü Enou neletao puopaoye Ejipt teidei hinou sapa peiyu teile hio meidei-a posheela peire donou ae posheela peiyu kukhe vanou kharochi liro peimoe.

²³ Ana Enou puletao hi achi zülo tea kharochi peie, sükulouzü Enou puletao vei Ramai soulai ae puletao hai avei mai soulai, alia Enou kharochi peikhai touyu thaifüa puletao nou soulouzü, hai teitei hai puletaoye donou kaozhou veia bailai.

²⁴ Ana puletao nou achi zü moe, ae puletao nou lenoua keipei moe. Sütao soure thaosü puletao nou rochia puletao vei kezhe jüpa thaifüa tare; ae nghoujülo takou moa thaikhai tare.

²⁵ Neletao vei puopao maitao nou Ejipt hinou tapa louyu nou zhou koute hai Enou avei kilai, rachipaolayu maitaoye seive peie.

²⁶ Ana mai linoua puletao vei chi sü keipei moe. Neletao hai neletao vei puopao maitao jünou-a rochipu loure ae khaityapu loure.

²⁷ “Südonou, Jeremiah, nenou chipao haitao sü avei maitao hi paolai, ana puletao nou ne chi kei peilai moe; nenou puletaoye kulai, ana puletao nou neye chila peilai moe.

²⁸ Nenou puletao hi puletao vei Ramai Mapao chi zübare, moyuma puletaoye daivanou tukha peiwe touyu sü sülou more. Acheche nasü hatare, ae hai nasü puletao vei mü hinou paopapu more.

Hinnom Deikho hinou Mahmo Souyutao

²⁹ “Jerusalem hi maitaore, dopfülo; Neletao vei peishu biloua khilaiwuo. Deichi hi taopalou-a kouli likhaio, daiolouzü Mapao Enou rarou loure, ae avei maitaoye sü malaiwure.

³⁰ “Judah hi maitao sü mah souwure. Enou ngaorayu bashara khesü puletao nou avei Rathoki hi pove khaipeire ae hai nasü souzhaiwure.

³¹ Puletao vei nah naotu poutu khesü meideia posheela peire donou Hinnom Deikho hinou puletao nou Topheth tea kuyu posheelabu ali souloure. Puletao hi hai nasü soulo tea Enou kharochi peimoe — haisü avei tsüle hia vemoe.

³² Haibüyu teile sü veloure, süolouzü Topheth moa Hinnom Deikho tea kupulai more, ana Maiye Southayu Deikho tea salai, daiolouzü buh kukhe hayu donou puletao nou buh sühinou pove maiye daovulai.

³³ Thaiphao sünou tei hi raohou ae rekhaona vei touso soulai; ae mai linoua puletaoye pilailou laimoe.

³⁴ Enou Judah vei nuhdutao ae Jerusalem vei ludutao hisü savayu paikho ae shanghi soua vasayu pai khesü panou akhai soulaire. Teidei sü panou radeiki vita-a bailai.