JEREMIAH 49 - SHEEYU BAIBEL (BSI)

Ammon Mai Pei hi Mapao nou Chikuyu

¹ Ammon mai vanou Mapao nou haibüa paoe: “Israel maitao daiki vetare? Puletao hai lahvei teidei vuloure mailia harevu? Puletao daisounou Molek rahye thoyu mai panou Gad maivei teidei sü poloua sühinou pa hrüwe?

² Ana haibüyu teile sü velaire, süolouzü Ammon maivei Rabbah nuhbei hinou hrüa buyu maitaoye panou soureih souyu reihvo sü choulaire, ae nuhbei hai nasü soushikhai toulai ae nuh khesü meidei laiwulai. Süthaisü Israel maitao teidei nasü podakhai loulai.

³ Heshbon hi maitaore, kra-a dopfülo! Ai maiye sü souhawure! Rabbah hi naotu maitaore, dopfülo! Soukhousah banaolo ae dopfülou khaio. Bürarou poa nou tuta khaio. Neletao vei Molek rahye sü puhvei napao maitao ae veo nahpoutu maitaoye koa vakou nüpoa tare.

⁴ Chili moyu maitaore, neletao daisounou khaophu souwe? Neletao vei khouko sü hata-a bailai. Neletao daisounou lah neletao vei pfüchi nasü louche-a mai linoua neletaoye dulou hoe tea paowe?

⁵ Enou neletao hisü pirayu hai buh liki hinou vepeilai. Neletao hai tuta-a bailai. Neletao hai lahlah vei hrirai vupa loure donou tuta-a bailai, ae mai linoua neletao vei reihmai me sü sapoa ve jüpeilai moe.

⁶ “Ana Enou haithai naki Ammon maiye savayu sü dakhai peilai. Haisü Mapao Enou paowe.”

Edom Mai hi Mapao nou Chikuyu

⁷ Edom vanou Khoukhoulai Mapao nou haibüa paoe, “Edom maitao hai puletao vei tsü aveih nasü hadou? Puletaoye paodou-apei maitao hai haliro paodou peiloure sü harevu? Puletao vei ratsü veishi sü hatadou?

⁸ Dedan hi maitaore, tutalo! Tutsülo! Enou Esau vei tyaosholea ye sü souha laire, daiolouzü Enou puletaoye tudeere teile sü vere.

⁹ Darkhashi haiyu mainou darkhashi sü haikhai toulou moa daotu hai be hi shokhai peiwe, ae avao mainou khei teile hi vaoyu phaki, puletao nou jüpayu natao likhei poloua baiwe.

¹⁰ Ana Enou Esau vei tyaosholea hrülaiye sü souha khaiwure, puletao nou tutsüyu buh veishi sü Enou popa ngaokhai toupeire, südonou puletao hai tutsü loushire. Edom mai hrülaiye sü mai ali koutea shokhai peimoa nou souhakhai touwure.

¹¹ Pfüpuo hayu nahmaitao sü ahi peio, Enou kiko peilai. Neletao vei mimeapfütao sü panou Eye louchelo.

¹² “Tudeeyu vei chapai hinou kezü moa buyu maitao-a tudee peiyu vei chapai hinou ke laie. Neletaoye tudee peilai moe tea neletao tsüchowu? Moe, neletao hai chapai süna hinou kelai!

¹³ Daiolouzü Enou lah ahi haibüa chaachou souwure, süolouzü Bozrah nuhdu nasü panou ngaopi shoyu ae radeiki soupeiwulai, sübüa maikhe maiye panou chaa soua polai, ae süpehao hi buyu nuh veishi sü teisa donou soushi khaiwulai. Haisü Mapao Enou paowe.”

¹⁴ Enou paoe, “Enou Mapao hinou ko ali choue. Puhnou tyahrü hrülai hi kopomaiye seiho ne pei hi soureih soure donou tave jülo tea seitawure.

¹⁵ Mapao nou nevei khouko sü souhawulai, ae mai linoua neye tsükhou peilai moe.

¹⁶ Ne lekhenou khaophu souyu nasü nou neye süthaimah peiwure. Nenou tsüchoyu büa mai linoua neye ngaopi moe. Nenou deichi kushoyu chuhlya hinou hrüa bue; teihi lüche büa kushoyu buh hinou buyuma Mapao nou neye sü ponakou khaiwulai. Haisü Mapao nou paoe.”

¹⁷ Mapao nou paoe, “Edom maiye soushi khaitouyu sü ngaolouyu mai hrülai nou khupa soua ngaopi sholai.

¹⁸ Sodom ae Gomorrah alia süpehao hi buyu nuhtao soushi khaitouyu büa Edom hia vepalai. Mailia sühisü ve hrüpu khailai moe. Haisü Mapao Enou paowe.

¹⁹ Chipeikhaoduo nou Jordan vaohro hinou tapa heiphao hinou poutoua buyu zhaotu aliye nütou louyu büa Enou Edom maiye sü tave puletao vei teidei hinou hulaikhai touwulai. Süthaisü Enou dopa louyu süthai-apeio nanou tyahrü nasü khasa-a hrülai. Thaonou Eye paonada laige? Thaonou Eye chare bue? Süthai-apei mai kananou Eye dulaige?

²⁰ Südonou Enou Edom maitao hi soupeilai tea tsüchoda khaitouyu ae Teman maitao hi soulai tea tsücho-a buyu khesü keilo. Puletao vei nahmaitao hai pairou poa talai, ae mai hrülai sü pihi rara-a bulai.

²¹ Edom nou kaodu tayu hai deiphao veishi soulü peilai, ae puhnou rayu pai sü Zai Ho koute hia chou velai.

²² Lüche ali nou shouh topaloua zhaokou hanüyu büa ngaobayu maitao nou Bozrah nuhdu sü dulai. Süzhou teithe Edom maivei reihmaitao hai naotumai ali nou nah nare phaki ngaopiyu büa ngaopilai.”

Damaskas Pei hi Mapao nou Chikuyu

²³ Damaskas vanou Mapao nou haibüa paoe, “Hamath ae Arpad hi maitao sü levea sholai, daiolouzü puletao nou ko ashi sü chouloure. Ngaopiyu sünou zaidzü lüveyu büa puletao hisü vere.

²⁴ Damaskas hi maitao sü lülou hore, ae ngaopi shopoa nou tutare. Puletao hai naotumai alinou nahnare phaki khya souyu büa soua bure.

²⁵ Zhih tasho-a nou ae sava sho-a nou buyu nuhdu nasü chuo mailia hrümore.

²⁶ Süzhou teithe puhvei nahle maitao hai nuhdu vei ludu kinou southawulai, ae puhvei reihmaitaoye sü souhawulai.

²⁷ Enou Damaskas vei kivo sü meidei laiwulai ae Veo Benhadad vei vebuh sü meideilai. Haisü Khoukhoulai Mapao Enou paowe.”

Kedar Maitya ae Hazor Nuhdu Pei hi Chikuyu

²⁸ Babilon hi Veo Nebukhadnezzar nou reih kolouyu Kedar ae Hazor nou khasa-a buyu teideitao vanou Mapao nou haibüa paoe, “Kedar maitaoye taho reih soukhaio, ae teinghei palova hrüyu maitaoye souhawo!

²⁹ Puletao vei sahpaotao ae kikhaorütao, puletao vei haosahtao alia sahpao hinou buyu na veishi polo. Puletao vei rachotao sü polo alia maikhe maitao hi haibüa paopeio, ‘Puletao vei pehao teitei hisü pirayu khaiko bua baire.’

³⁰ “Hazor hinou hrüyu maitaore, kadoukou tuta lourao ae tutsülo tea Mapao Enou neletaoye paopi peiwe. Babilon hi Veo Nebukhadnezzar nou neletaoye soushire donou souda-a bure, ae haibüa puhnou paoe,

³¹ ‘Tavelo! Etao nou kaozhou ashi daore chomoa vaphi tea nou hrüa buyu maitaoye sü reih soulai! Puletao vei nuhdu sü rokhubomü ha-e, ae halia khumoa nou sakhai-a bubaie.’

³² “Puletao vei rachotao ae kikhaorütao sü hulo! Enou peishu bijüa pfüyu maitao sü holo hailo hupho rarou laiwulai, ae kainghou veishi hinou veahoyu sü pove peilai.

³³ Hazor sü lakhao panou hrüyu buh soupeiwulai, teisa donou soushi khaiwua mailia panou sühisü hrüpulai moe. Haisü Mapao Enou paowe.”

Elam Pei hi Mapao nou Chikuyu

³⁴ Judah hi Zedekiah nou vekou louyu thaibü, Mapao nou Elam maivei teidei vanou ahi haibüa paoe.

³⁵ “Elam mainou khaophu sousho-a buyu puletao vei voulou poveiyu maitao sü Enou southa khailai.

³⁶ Enou Elam mai hisü kainghou adai hinou pa teikhai ashi sü hüve peilai, ae Enou puletaoye sü tyahrü veishi hi shetumai soua bukhaimo koute hupho raroulai peilai.

³⁷ Enou Elam maiye sü panou puletaoye ngaoba-a southa nüa buyu maitaoye ngaopi-a nou bulai. Enou puletaoye souha khaimo koute avei lekha rarou hinou puletao hisü soureih mai seive thoupeilai.

³⁸ Enou puletao vei vemaitao ae süthai-apei maitao sü southalai, ae avei vebuh sü sühinou soushu loulai.

³⁹ Ana haithai naki louzü Enou Elam sü sousava peipulai, Haisü Mapao Enou paowe.”